Félags- og tómstundanefnd Svf. Skagafjarðar

Lögð fram fundargerð Ungmennaráðs sveitarfélagsins frá 2. mars s.l. þar sem lagt er til að reglur um starfsemi ráðsins verði teknar til endurskoðunar. Frístundastjóra falið að vinna drög að nýjum reglum sem lagðar verða fram fyrir næsta fund. Samþykkt.

Eins og kunnugt er hefur verið unnið ötullega að viðbrögðum við Covid-19 faraldrinum í allri stjórnsýslu sveitarfélagsins. Leitast hefur verið við að fylgja öllum viðmiðum og ráðleggingum Sóttvarnarlæknis, Landlæknisembættisins og Lögreglustjóraembættisins. Varðandi félagsþjónustu og frístundaþjónustu sérstaklega hefur verið reynt að halda starfsemi stofnana í eins föstu formi og hægt er m.v. takmarkanir yfirvalda og aðstæður á hverjum stað.
Félags- og tómstundanefnd vill koma á framfæri þökkum til allra starfsmanna félags- og frístundaþjónustu fyrir þeirra samstöðu og samtakamáttar við að hindra útbreiðslu veirunnar.

Frístundastjóri upplýsti um reglubundna könnun Umboðsmanns barna. Könnuninni hefur verið svarað.

Á fundi sínum þann 4. mars s.l. fjallaði byggðarráð um erindi UNICEF á Íslandi þar sem hvatt er til þess að sveitarfélög á Íslandi skrái sig formlega til þátttöku í verkefninu ,,Barnvæn sveitarfélög ? Innleiðing Barnasáttmála Sameinuðu þjóðanna.“ Byggðarráð tók jákvætt í erindið og vísaði því til umsagnar í félags- og tómstundanefnd og fræðslunefnd.
Félags- og tómstundanefnd fagnar þessu erindi og beinir því til byggðarráðs að fela fjölskyldusviði að undirbúa þátttöku í verkefninu ásamt því að greina það ítarlega með tilliti til þess hvað nú þegar er verið að gera í sveitarfélaginu sem fellur vel að inntaki verkefnisins og hvar þarf að bæta úr. Greiningunni fylgi tillaga að úrbótum.

Vegna Covid-19 er leitað er eftir heimild félags- og tómstundanefndar til að gera tillögu til nefndarinnar að tímabundinni gjaldskrá fyrir Dagdvöl. Dagdvöl hefur verið lokað á meðan á veirufaraldri stendur en þess í stað hefur starfsfólk farið heim til fólks og veitt nauðsynlega þjónustu þar eftir því sem hægt er. Ekki þykir sanngjarnt að innheimta fullt gjald Dagdvalar heldur er vilji til að setja tímagjald á þjónustuna.
Félags- og tómstundanefnd samþykkir tillöguna.