Félags- og tómstundanefnd Svf. Skagafjarðar

Lagt fram yfirlit yfir greidda Hvatapeninga og fjölda iðkenda á árunum 2017-2021. Ánægjulegt er að sjá að íþrótta- og tómstundaiðkun barna og ungmenna hefur aukist á þessu árabili. Áhugavert verður að sjá fjölda iðkenda í árslok þegar hækkun Hvatapeninga upp í 40.000 er að fullu komin til framkvæmda.

Lagt fram erindi frá Bertínu Rodriguez þar sem farið er fram á að reglur um Hvatapeninga verði endurskoðaðar með það að markmiði að lækka aldursviðmið fyrir kaup á kortum í líkamsræktarstöðvum. Reglurnar eins og þær eru nú gera ráð fyrir að einungis 17-18 ára börn geti keypt slík kort og fengið Hvatapeninga á móti, en fyrir yngri börn eru skilyrði fyrir greiðslu Hvatapeninga þau að um sé að ræða skipulagt íþrótta- og frístundastarf undir leiðsögn viðurkenndra þjálfara eða leiðbeinenda.
Erindinu frestað til næsta fundar.

Frístundastjóri kynnti vinnuskjal sem sýnir þá styrki sem sveitarfélagið veitir frjálsum félagasamtökum, s.s. íþróttafélögum í sveitarfélaginu. Um er að ræða þrenns konar styrki, beina styrki til félagasamtaka t.d. vegna barna- og unglingastarfs, styrki í formi afnota af húsnæði eða öðrum mannvirkjum í eigu sveitarfélagsins og í þriðja lagi styrki þar sem vinnuframlag kemur á móti svo sem sláttur á sumrin o.fl.

Umræða um hjólabrettapalla tekin upp að nýju. Nú er lagt til að þeir verði í suðausturhorni lóðar við Árskóla. Sviðsstjóra og frístundastjóra falið að koma málinu áfram.

Lögð fram kynning vegna skuggakosninga í elstu bekkjum grunnskóla og yngstu árgöngum framhaldsskóla í tilefni af kosningum um sameiningu sveitarfélaganna í Skagafirði sem fram fara þann 19. febrúar n.k. Skuggakosningarnar fara fram í næstu viku.

Lögð fram til kynningar þingsályktunartillaga um upplýsingamiðlun um heimilisofbeldi. Um er að ræða tillögu um að bæta verklag í upplýsingamiðlun á milli kerfa en til þess þarf rýmri lagaheimildir.

Lagt fram til kynningar bréf frá Umboðsmanni barna þar sem áréttað er mikilvægi þess að sveitarfélögum beri skylda til að leggja sérstakt mat á áhrif ákvarðana á börn sem teknar eru á vettvangi þeirra, sbr. 3. gr. Barnasáttmálans.

Eitt mál tekið fyrir. Synjað. Sjá trúnaðarbók.