Umhverfis- og samgöngunefnd Svf Skagafjarðar

Tekin var fyrir styrkbeiðni frá Ljósmáli ehf vegna fyrirhugaðrar heimildamyndar um vita á Íslandi.
Framleiðsla myndarinnar hófst í fyrra og á að vera lokið í ár. Myndin verður tilbúin til sýninga árið 2016.
Óskað er eftir styrk frá Skagafjarðarhöfnum vegna myndarinnar að upphæð allt að 400.000 krónum.
Hafnarsjóður Skagafjarðar telur sér ekki fært at styrkja verkefnið.

Lögð var fram til umsagnar tillaga Umhverfisstofnunar að starfsleyfi vegna bikbirgðastöð Vegagerðarinnar á hafnarsvæði Sauðárkrókshafnar.
Tillöguna má nálgast á vef umhverfisstofnunar; http://umhverfisstofnun.is/einstaklingar/mengandi-starfsemi/starfsleyfi-i-auglysingu/auglysing/2015/01/12/Tillaga-ad-nyjum-starfsleyfum-fyrir-bikbirgdastodvar-Vegagerdarinnar/.
Umhverfis- og samgöngunefnd gerir ekki athugasemdir við tillöguna.

Á 103. fundi umhverfis- og samgöngunefndar var lögð fram beiðni frá smábátaeigendum við svokallaðan öldubrjót, eða stærstu smábátabryggjuna, þess efnis að gönguhlið á landgangi yrði fært upp á steypta landfestu til að bæta aðgengi um bryggjuna. Sviðsstjóra var falið að fá tilboð í verkið frá söluaðila flotbryggja.
Tilboð hefur borist og leggur nefndin til að leita tilboða hjá fleiri aðilum.

Lagður fram til kynningar bæklingur vegna endurvinnslukortsins. Endurvinnslukortið hefur verið aðgengilegt á vefnum um nokkura ára skeið á vefslóðinni natturan.is. Þróun og rekstur kortsins hefur verið unnin í samstarfi við Sorpu og ýmsa aðra þjónustuaðila á sviði endurvinnslu og sorphirðu.
Umhverfis- og samgöngunefnd þakkar fyrir erindið en telur ekki tímabært að koma að verkefninu að svo stöddu.

Lagt var fram til kynningar erindi er varðar samstarf í úrgangsmálum á Norðurlandi. Vinna við svæðisáætlun um meðhöndlun úrgangs á Norðurlandi er langt komin og er þess óskað í bréfinu að 1-2 fulltrúar hvers sveitarfélags sæki fund þar sem þessi mál verða rædd og fundið út hvort almennur áhugi sé á samstarfi á vettvangi úrgangsmála. Undir bréfið skrifa Eriíkur Björn Björgvinsson, bæjarstjóri á Akureyri og Ólöf Harpa Jósefsdóttir, forstöðumaður Flokkun Eyjafjarðar ehf.
Umhverfis- og samgöngunefnd leggur til að formaður og sviðsstjóri sæki fundinn.

Lagðar voru fram til kynningar teikningar sem sýna mögulega staðsetningu á geymslusvæði á Hofsósi. Drögin gera ráð fyrir tveimur mögulegum staðsetningum á geymslusvæði, sunnan og norðan við áhaldahús við Norðurbraut.
Gert er ráð fyrir að svæðið verði með svipuðu sniði og geymslusvæði á Sauðárkróki, það verði afgirt og læst og hægt verði að leigja pláss á svæðinu gegn vægu gjaldi. Utan girðingar við geymslusvæði er gert ráð fyrir að staðsetja ruslagáma sem í dag eru staðsettir við áhaldahús og norðan við Pardus á Hofsósbraut.
Nefndin leggur til að geymslusvæðið verði staðsett norðan við áhaldahús.

Fjallað var um stöðu á flokkun hálendisvega. Verið er að vinna í málinu í samráði við landeigendur.