Byggðarráð Svf. Skagafjarðar

Lagður fram tölvupóstur dagsettur 8. júní 2016 frá Samtökum sveitarfélaga á Norðurlandi vestra varðandi stefnumótandi byggðaáætlun 2017-2023 sem Byggðastofnun vinnur nú að. Óskað er eftir upplýsingum um það hverjar eru áherslur aðildarsveitarfélaga SSNV varðandi Byggðaáætlun. Málið áður á dagskrá byggðarráðs 16.júní s.l.
Byggðarráð samþykkir að kalla eftir upplýsingum um hvaða áherslur liggi nú þegar fyrir þannig að hægt sé að koma með tillögur um hverju megi bæta við.

Lagður fram tölvupóstur frá Minjastofnun dagsettur 30.júní 2016 þar sem auglýst er eftir umsóknum um styrki vegna sérstakrar úthlutunar úr húsafriðunarsjóði til að undirbúa tillögur að verndarsvæði í byggð.

Á fjárlögum 2016 voru fjárheimildir húsafriðunarsjóðs auknar um 150 m.kr. til að gera sjóðnum kleift að styrkja vinnu sveitarfélaga við skipulagningu og þróun verndarsvæða í byggð í samræmi við ákvæði laga um verndarsvæði í byggð, nr. 87/2015.

Umsóknarfrestur er til og með 17. ágúst n.k. og stefnt er að því að úthlutun liggi fyrir í síðasta lagi 12. september 2016.

Byggðarráð samþykkir að óska eftir umsögnum frá atvinnu-, menningar- og kynningarnefnd og skipulags- og byggingarnefnd þar sem metnir verði kostir fyrir sveitarfélagið ef farið yrði í slíkt umsóknarferli.

Á fundi Atvinnu-, menningar- og kynningarnefndar þann 1.júlí s.l. var samþykkt að beina til byggðarráðs að gerður verði samningur við Kaupfélag Skagfirðinga um makaskipti á Aðalgötu 16b (Minjahúsið) og Aðalgötu 21-21a (Gamla samlagið að fyrrverandi Iðju meðtalinni og Grána) með það í huga að nota húsnæðið undir starfsemi Byggðasafns Skagfirðinga á Sauðárkróki.

Byggðarráð samþykkir að fara í makaskipti á Aðalgötu 16b (Minjahúsið) og Aðalgötu 21-21a (Gamla samlagið að fyrrverandi Iðju meðtalinni og Grána) með það í huga að nota húsnæðið undir starfsemi Byggðasafns Skagfirðinga á Sauðárkróki með fyrirvara um gerð og samþykkt samnings þar um. Byggðarráð samþykkir jafnframt að farið verði í stefnumótunarvinnu varðandi framtíðarskipulag og nýtingu húsnæðisins.

Minjahúsið Aðalgata 16b er 651fm, Aðalgata 21-21a er 1200fm, því felast mikil tækifæri í makaskiptunum enda núverandi húsnæði Minjasafnins á Sauðárkróki orðið of lítið og mjög óhentugt undir starfssemina.

Byggðarráð samþykkir að boða Atvinnu-, menningar- og kynningarnefnd til fundar um næstu skref.

Lagt var fram minnisblað frá Verkfræðistofunni Eflu varðandi gangbrautarljós við Árskóla á Sauðárkróki. Málið áður á dagskrá umhverfis-og samgöngunefndar 11.maí 2016.

Byggðarráð samþykkir að sett verði upp gangbrautarljós á gönguþverun á Skagfirðingabraut á móts við Árskóla. Samþykkt er tillaga Verkfræðistofunnar Eflu um svokölluð puffin-ljós og felur byggðarráð sviðsstjóra veitu- og framkvæmdasviðs að hefja vinnu við verkið.

Fundargerð 34. fundar atvinnu-, menningar-og kynningarnefndar lögð fram til afgreiðslu á 749. fundi byggðarráðs eins og einstök erindi bera með sér. Stefán Vagn Stefánsson kynnti fundargerð. Fundargerðin samþykkt.

Fundargerð 290. fundar skipulags- og bygginganefndar lögð fram til afgreiðslu á 749. fundi byggðarráðs eins og einstök erindi bera með sér. Stefán Vagn Stefánsson kynnti fundargerð. Fundargerðin samþykkt.

Lagður fram til kynningar tölvupóstur frá Gylfa Arnbjörnssyni forseta ASÍ til Karls Björnssonar, framkvæmdastjóra Sambands íslenskra sveitarfélaga varðandi húsnæðisþörf á landsbyggðinni.

Lagður fram tölvupóstur frá Orkusjóð þar sem auglýstir eru styrkir til uppbyggingar á innviðum fyrir rafbíla. Verkefnið er hluti af sóknaráætlun Íslands í loftslagsmálum sem samþykkt var af ríkisstjórn í nóvember 2015 og sett var fram í tengslum við 21. fund aðildarríkja loftslagssamningsins í París (COP21). Er verkefnið eitt af átta verkefnum í sóknaráætluninni sem miða að samdrætti í nettólosun gróðurhúsalofttegunda á Íslandi. Hámarksupphæð styrks fyrir hvert verkefni er 30 m.kr. á ári. Lágmarksupphæð styrks fyrir hvert verkefni er 2 m.kr. á ári.

Fundargerðir 840. fundar og 841.fundar stjórnar Sambands íslenskra sveitarfélaga lagðar fram til kynningar á 749. fundi byggðarráðs 7. júlí 2016.

Fundargerð 7. fundar stjórnar SSNV frá 15. júní 2016 lögð fram til kynningar á 749. fundi byggðarráðs 7.júlí 2016.