Sveitarstjórn Sveitarfélagins Skagafjarðar

Fundargerð 14. fundar Samstarfsnefndar með Akrahreppi lögð fram til afgreiðslu á 290. fundi sveitarstjórnar eins og einstök erindi bera með sér. Sigríður Svavarsdóttir kynnti fundargerð. Enginn kvaddi sér hljóðs.

Stefán Vagn Stefánsson tók til máls og lagði fram eftirfarandi tillögu.

Sveitarstjórn Sveitarfélagsins Skagafjarðar hefur kynnt sér frummatsskýrslu Landsnets vegna Blöndulínu 3. Í skýrslunni eru tvær leiðir metnar þó svo að á fyrri stigum máls hafi sveitarstjórn bent á aðra möguleika í leiðarvali og framkvæmdakosti, svo sem að leggja línu í jörð, í að minnsta hluta til, aðrar stauragerðir loftlína, frekari rökstuðning fyrir áætluðu spennustigi og fleiri þætti sem krefðust meiri umfjöllunar. Því miður eru þeir, og aðrir kostir í leiðarvali ekki metnir með fullnægjandi hætti í umræddri skýrslu.

Sveitarstjórn áréttar ennfremur að við undirbúning og vinnu að línulögninni sé tekið ríkt tillit til hagsmuna heimamanna og skoðað hvort og þá með hvaða hætti hægt er að koma til móts við kröfur um línulögn í jörð að hluta til og er í því vísað til þingskjals 748 frá 1. febrúar 2012 um skipun nefndar á vegum iðnaðar- og umhverfisráðuneytisins sem móta á stefnu um lagningu raflína í jörð. Óráðlegt er að taka afstöðu til leiðarvals og málsins á meðan nefndin hefur ekki skilað niðurstöðu. Sveitarstjórn áskilur sér rétt til að setja skilyrði fyrir lagningu Blöndulínu 3 hvað varðar leiðarval, og framkvæmdakosti , þar með talið að raflína verði að hluta til lögð í jörð.

Stefán Vagn Stefánsson,

Bjarki Tryggvason,

Sigríður Magnúsdóttir,

Þórdís Friðbjörnsdóttir,

Bjarni Jónsson,

Jón Magnússon,

Sigríður Svavarsdóttir,

Guðrún Helgadóttir

Sigurjón Þórðarson.

Sigurjón Þórðarson, Jón Magnússon, Stefán Vagn Stefánsson, Sigurjón Þórðarson, Jón Magnússon, Sigurjón Þórðarson og Þórdís Friðbjörnsdóttir kvöddu sér hljóðs.

Tillagan var borin undir atkvæði og samþykkt með níu atkvæðum.

Sigurjón Þórðarson sveitarstjórnarfulltrúi Frjálslyndra og óháðara leggur fram eftirfarandi tillögu.

Sveitarstjórn Sveitarfélagsins Skagafjarðar samþykkir að halda opna borgarafundi sbr. 102 gr. sveitarstjórnarlaga, í fyrrihluta júní n.k. á: Sauðárkróki, Varmahlið, Hólum og Hofsósi, þar sem málefni sveitarfélagsins verða rædd m.a. fjármál, hagræðingaraðgerðir og þjónusta sveitarfélagsins.

Guðrún Helgadóttir kvaddi sér hljóðs. Þá Stefán Vagn Stefánsson sem bar upp þá tillögu að vísa erindi Sigurjóns til afgreiðslu byggðarráðs. Sigurjón Þórðarson tók til máls þá Jón Magnússon.

Forseti bar upp tillögu þess efnis að vísa tillögu Sigurjóns Þórðarsson til afgreiðslu í byggðarráði. Samþykkt samhljóða.

Ársreikningur Sveitarfélagsins Skagafjarðar fyrir árið 2011 lagður fram til síðari umræðu.

Sveitarstjóri kynnti niðurstöður ársreikningsins.

Helstu niðurstöðutölur A og B hluta eru eftirfarandi:

Rekstrartekjur 3.298.356 þús. kr.

Rekstrargjöld 3.213.680 þús. kr.

Fjármagnsgjöld 359.017 þús. kr.

Tekjuskattur 4.009 þús. kr.

Rekstrarniðurstaða neikvæð 270.332 þús. kr.

Fastafjármunir 5.405.913 þús. kr.

Veltufjármunir 458.448 þús. kr.

Eignir samtals 5.864.361 þús. kr.

Eigið fé 1.012.663 þús. kr.

Skuldbindingar 774.840 þús. kr.

Langtímaskuldir 3.293.151 þús. kr.

Skammtímaskuldir 783.708 þús. kr.

Eigið fé og skuldir samtals 5.864.361 þús. kr.

Jón Magnússon tók til máls, þá Guðrún Helgadóttir sem lagði fram eftirfarandi bókun.

Samfylkingin ítrekar skyldur sveitarstjórnar til að sýna ábyrgð í rekstri Sveitarfélagsins Skagafjarðar. Meirihluti Framsóknar og Vinstri grænna hefur ekki tekist á við fjárhagsleg vandamál sem steðja að sveitarfélaginu okkar, einsog ársreikningurinn fyrir árið 2011 ber glöggt vitni. Þvert á móti stefnir í enn meira óefni.Við þessar aðstæður verður sveitarstjórn að halda fast um taumana í rekstri sveitarfélagsins og sýna fyllstu aðgát.

Sigurjón Þórðarson kvaddi sér hljóðs og lagði fram eftirfarandi bókun.

Niðurstaða reikninga sýnir að áætlangerð meirihluta Vg og Framsóknarflokks hefur því miður brugðist en niðurstaðan er talsvert lakari en fjárhagsáætlanir gerðu ráð fyrir . Reikningarnir bera það með sér að það eina rétta í stöðunni sé staldra við og endurmeta núverandi rekstraráætlanir en forsendur þeirra eru augljóslega brostnar. Áframhaldandi rekstur sveitarfélagsins með óbreyttu sniði samhliða stórframkvæmdum er ávísun á stórfelldari halla á árinu 2012. Það er í raun galið að ætla að fara í stórframkvæmdir fyrr en að jafnvægi hefur náðst í rekstrinum en óbreytt stefna kemur sveitarfélaginu í mikla skuldakreppu.

Jón Magnússon tók til máls og lagði fram eftirfarandi bókun.

Jón Magnússon og Sigríður Svavarsdóttir óska bókað:

Ársreikningur Sveitarfélagsins Skagafjarðar fyrir árið 2011 er vitnisburður um getuleysi meirihluta Vg og Framsóknarflokks að ná tökum á rekstri sveitarfélagsins. Framsóknarflokkurinn hefur verið ráðandi afl í sveitarstjórn Skagafjarðar síðastliðin sex ár. Uppsafnað tap á rekstri sveitarfélagsins árin 2008 - 2011 nemur rúmum 1.200 milljónum króna á núvirði. Hallarekstrinum hefur verið mætt með nýjum lántökum og vandanum þannig velt yfir á skattgreiðendur framtíðar. Framsóknarmenn í Skagafirði hafa sýnt undanfarin ár að þeir ná ekki fram hagræðingu í rekstri sveitarfélagsins.

Sú staðreynd hlýtur að vekja ugg og vonbrigði meðal íbúa sveitarfélagsins sem á komandi árum munu, í boði framsóknarmanna, greiða hærri skatta og gjöld samfara minnkandi þjónustu. Varnarorð sjálfstæðismanna hafa verið hundsuð og afleiðingarnar blasa við. Fulltrúar Sjálfstæðisflokksins í Sveitarstjórn Skagafjarðar lýsa fullri ábyrgð á hallatölum ársreiknings 2011, á hendur ráðþrota meirihluta Vg og Framsóknarflokks.

Stefán Vagn Stefánsson kvaddi sér hljóðs og lagði fram eftirfarandi bókun.

Ljóst er að niðurstaða ársreiknings 2011 er óviðunandi og mikilvægasta verkefnið framundan er að snúa við taprekstri sveitarfélagsins á eins skömmum tíma og kostur er. Nú þegar hefur verið gripið til ýmissa aðgerða og í gangi er heildstæð rekstrarúttekt á öllum einingum sveitarfélagsins. Niðurstaða þeirrar vinnu verður kynnt von bráðar og er mikilvægt að samstaða náist um frekari hagræðingaaðgerðir í kjölfarið.

Þegar samanburður áætlunar og rauntalna í rekstri fyrir árið 2011 er skoðaður ber að hafa í huga að rekstrartap umfram það sem áætlað var fyrir árið 2011 er 107 milljónir sem helgast að stórum hluta af því að lífeyrisskuldbinding var 63 milljónir umfram áætlun og verðbætur 34 milljónir umfram áætlun eða samtals 97 milljónir sem er 91% af gjöldum umfram áætlun. Við áætlunargerð þessa tvegggja þátta er stuðst við utan að komandi ráðgjöf t.d. er lífeyrisskuldbinding reiknuð af tryggingarsérfræðingi og verðbólguspá er tekin frá Seðlabanka Íslands.

Sigurjón Þórðarson tók til máls.

Ársreikningur Sveitarfélagsins Skagafjarðar og stofnana þess fyrir árið 2011 borin undir atkvæði og samþykktur samhljóða.

Fundargerð stjórnar Sambands íslenskra sveitarfélaga frá 27. apríl 2012 lögð fram til kynningar á 290. fundi sveitarstjórnar.

Fundargerð stjórnar Skagafjarðarveitna frá 30. apríl 2012 lögð fram til kynningar á 290. fundi sveitarstjórnar.

Fundargerð 591. fundar byggðarráðs lögð fram til afgreiðslu á 290. fundi sveitarstjórnar eins og einstök erindi bera með sér. Stefán Vagn Stefánsson kynnti fundargerð. Sigurjón Þórðarson kvaddi sér hljóðs og lagði fram bókun við lið 1.7 Umferðarhraði á Sauðárkróki. Stefán Vagn Stefánsson tók einnig til máls.

Fundargerð 185. fundar félags- og tómstundanefndar lögð fram til afgreiðslu á 290. fundi sveitarstjórnar eins og einstök erindi bera með sér. Bjarki Tryggvason kynnti fundargerð. Sigurjón Þórðarson, Jón Magnússon og Bjarki Tryggvason kvöddu sér hljóðs.

Fundargerð 78. fundar fræðslunefndar lögð fram til afgreiðslu á 290. fundi sveitarstjórnar eins og einstök erindi bera með sér. Bjarki Tryggvason kynnti fundargerð. Guðrún Helgadóttir, Bjarki Tryggvason, Bjarni Jónsson, Sigurjón Þórðarson og Stefán Vagn Stefánsson kvöddu sér hljóðs.

Fundargerð 161. fundar landbúnaðarnefndar lögð fram til afgreiðslu á 290. fundi sveitarstjórnar eins og einstök erindi bera með sér. Bjarni Jónsson kynnti fundargerð. Enginn kvaddi sér hljóðs.

Fundargerð 234. fundar skipulags- og byggingarnefndar lögð fram til afgreiðslu á 290. fundi sveitarstjórnar eins og einstök erindi bera með sér. Stefán Vagn Stefánsson kynnti fundargerð. Stefán Vagn Stefánsson kvaddi sér hljóðs og lagði fram tillögu er varðar lið 6.10 Kolkuós - Umsókn um byggingarleyfi. Jón Magnússon kvaddi sér einnig hljóðs.