Tillaga að ályktun byggðaráðs vegna samninga um afnám tolla á innfluttar landbúnaðarafurðir

Lögð fram svohljóðandi tillaga að ályktun frá Bjarna Jónssyni (VG og óháðum):

Ekki verði gengið lengra í afnámi tolla á innfluttar landbúnaðarafurðir án fyrirliggjandi úttektar á áhrifum á íslenska landbúnaðarframleiðslu og án þess að gerður hafi verið nýr búvörusamningur til lengri tíma.

Matvælaframleiðsla er ein meginstoð byggðar í Skagafirði. Héraðið er eitt sterkasta mjólkur- og kjötframleiðslusvæði landsins. Margvíslegur þjónustuiðnaður hefur byggst upp í kringum matvælaiðnaðinn. Ferðaþjónusta og matarmenning eru miklvægar greinar í örri þróun. Þessar greinar skipta sköpum fyrir búsetu og afkomu íbúa héraðsins.

Fréttir af nýgerðum milliríkjasamningi milli Íslands og Evrópusambandsins (ESB) um viðskipti með búvörur og niðurfelling tolla vekja því upp ugg um framtíðarhorfur landbúnaðar og matvælaiðnaðar í Skagafirði. Afnám tolla í þeim mæli sem samningarnir gera ráð fyrir geta haft ófyrirséðar afleiðingar í för með sér fyrir innlendan landbúnað og matvælavinnslu. Samningurinn við ESB virðist gerður án samráðs og í algjörri andstöðu við gildandi samninga um starfskilyrði greinarinnar sem og stefnu stjórnvalda um matvælaframleiðslu á Íslandi. Stjórnvöld virðast einnig hafa vanrækt að gera fyrirfram heildræna úttekt á áhrifum samningsins á vöruframboð, þróun og samkeppnisstöðu einstakra búgreina til lengri tíma. Atvinnuöryggi og störf fjölda fólks er sett í uppnám sem og rekstur afurðastöðva og fyrirtækja í matvælavinnslu og iðnaði.

Áður en lengra er haldið þarf að meta áhrif á afurðaverð til bænda, líklega þróun á markaðshlutdeild innlendrar framleiðslu og tekjuleg áhrif að teknu tillit til áhrifa aukins markaðsaðgangs. Störf og afkoma fjölda fólks, bænda og starfsfólks í úrvinnslugreinum er í húfi.

Byggðaráð skorar því á þingmenn að taka málið upp og staðfesta ekki slíka samninga nú án þess að gengið hafi verið frá nýjum samningum um starfsskilyrði landbúnaðarins til lengri tíma. Núverandi búvörusamningur rennur út í lok næsta árs. Fyrirkomulag tolla hefur verið hluti slíkra samninga og því eðlilegt að ákvarðanir um breytingar á þeim séu teknar samhliða gerð nýrra langtímasamninga um starfskilyrði landbúnaðar og matvælavinnslu í landinu.

Tillagan borin upp og felld með þremur atkvæðum.

Stefán Vagn Stefánsson, Sigríður Svavarsdóttir og Gréta Sjöfn Guðmundsdóttir leggja fram eftirfarandi bókun:

Byggðarráð Sveitarfélagsins Skagafjarðar hvetur stjórnvöld til að hraða gerð búvörusamninga eins og kostur er, sér í lagi vegna tilkomu samnings Íslands og Evrópusambandsins um viðskipti með landbúnaðarvörur. Byggðarráð telur mikilvægt að samningarnir verði gerðir samhliða og gildistími þeirra verði til jafn langs tíma og fagnar yfirlýsingum ráðherra og þingmanna kjördæmisins þess efnis.

Bjarni Jónsson óskar bókað:
Undirrituðum þykir miður að byggðarráð treystir sér ekki til að standa með beinskeyttari og afdráttarlausari hætti með skagfirskum bændum og þeim sem starfa í úrvinnslu landbúnaðarafurða og matvælavinnslu í Skagfirði.

Stefán Vagn Stefánsson, Sigríður Svavarsdóttir og Gréta Sjöfn Guðmundsdóttir óska bókað:
Erfitt er að meta áhrif samningsins á hagsmuni skagfirskra bænda og þeirra sem vinna við afleidd störf án þess að nýr búvörusamningur liggi fyrir og því mikilvægt að hann verði kláraður sem fyrst.

Afgreiðsla 712. fundar byggðaráðs staðfest á 332. fundi sveitarstjórnar 14. október 2015 með níu atkvæðum.