Samtök sjávarútvegssveitarfélaga

Lagt fram bréf frá bæjarstjórum Dalvíkurbyggðar, Snæfellsbæjar, Vestmannaeyja, Grindavíkur og Fjallabyggðar varðandi stofnun samtaka sjávarútvegssveitarfélaga. Fyrirmyndin eru Samtök orkusveitarfélaga og tilefnið þær breytingar sem verið er að gera á umgjörð sjávarútvegsins.
Byggðarráð samþykkir að senda fulltrúa á stofnfund samtakanna til kynningar.

Afgreiðsla 604. fundar byggðaráðs staðfest á 293. fundi sveitarstjórnar með níu atkvæðum.

Lögð fram svohljóðandi ályktun frá fundi Samtaka sjávarútvegssveitarfélaga sem haldinn var 26. september 2012.
"Því fólki sem hefur beina atvinnu af veiðum og vinnslu hefur fækkað alla síðustu öld. Sú þróun er enn í gangi. Þekking, tækniframfarir og krafa um aukna hagræðingu og framlegð hafa afgerandi áhrif á fjölda starfa í veiðum og vinnslu, og þá jafnframt á íbúafjölda og stöðu sjávarútvegssveitarfélaganna. Þessar breytingar hafa verið einn stærsti áhrifavaldur í byggðaþróun undanfarinna áratuga. Ný störf, þekkingarstörf og eftirlit, sem orðið hafa til við þessar breytingar hafa ekki að sama skapi orðið til á sjávarútvegsstöðunum og hafa slík störf á vegum ríkisins haft tilhneigingu til að hnappast saman á höfuðborgarsvæðinu. Þá hafa sífelldar breytingar á starfsumhverfi sjávarútvegsins fremur aukið á óöryggi þess fólks sem vinnur í greininni og þá í leiðinni þeirra sveitarfélaga sem eru mjög háð atvinnu og tekjum af veiðum og vinnslu. Mikilvægt er að við breytingar á lögum og reglum er varða sjávarútveginn sé horft til þess að treysta starfsumhverfi þess fólks sem starfar í greininni.

Með lögum um sérstakt veiðigjald er enn hert á kröfunni um hagræðingu í greininni. Til þess að sveitarfélögin geti brugðist við þeim breytingum sem því munu fylgja, svo sem fækkun starfa, er nauðsynlegt að þau fái hlutdeild í sérstaka veiðigjaldinu. Fundurinn felur stjórn samtakanna að kynna þá kröfu fyrir stjórnvöldum og fylgja málinu fast eftir.

Þá samþykkir fundurinn að fela stjórn að kanna með hvaða hætti væri unnt að dreifa þeim ríkisstörfum sem þjóna sjávarútvegi betur um landið.

Sjávarútvegurinn hefur verið og er enn ein mikilvægasta efnahagsstoð þjóðarbúsins. Meðfram strandlengjunni allri eru byggðalög sem reiða sig nánast eingöngu á veiðar og vinnslu. Með stofnun Samtaka sjávarútvegssveitarfélaga er horft til þess að skapa öflugan sameiginlegan vettvang til sóknar og varnar fyrir sjávarútvegssamfélögin.

Sjávarútvegssveitarfélög sem ganga ganga til liðs við samtökin fyrir lok október 2012 teljast stofnfélagar.

Byggðarráð samþykkir að sveitarfélagið gerist stofnaðili í Samtökum sjávarútvegssveitarfélaga.

Sigurjón Þórðarson kvaddi sér hljóðs og lagði fram eftirfarandi bókun."Sveitarstjórnarfulltrúi Frjálslyndra og óháðra Sigurjón Þórðarson, styður ekki aðild Sveitarfélagsins Skagafjarðar að Samtökum sjávarútvegsfyrirtækja á þeim forsendum að margir þeirra sveitarstjórnarmanna sem hafa valist í forystu í samtökunum hafa um árabil stutt kvótakerfið og gera enn, sem hefur leitt af sér hörmungar fyrir þjóðina og leitt til þess að veiðiheimildir hafa flust á Höfuðborgarsvæðið.
Fyrsta ályktun Samtaka Sjávarútvegsfyrirtækja er í megin efnum kolröng s.s. sú staðhæfing að fólki sem vinnur við veiðar og vinnslu hafi fækkað alla síðustu öld. Mikill uppgangur var alla tuttugustu öldina í sjávarútvegi á Íslandi þar til kvótakerfið var sett á en það leiddi til aflasamdráttar og stöðnunar. Umtalsverðar tækninýjungar hafa ekki orðið við botnfiskveiðar á síðustu áratugum enda eru togararnir þeir sömu og fyrir daga kerfisins og karlarnir jafn margir á og áður. Helstu breytingarnar eru að leyfilegur afli er helmingi minni en áður.
Ekki er hægt að taka undir þá rakalausu fullyrðingu í ályktun samtakanna að veiðigjaldið auki á meintri hagræðingu í greininni en ef svo væri þá væri undarlegt að standa gegn gjaldtökunni.

Afgreiðsla 605. fundar byggðaráðs staðfest á 294. fundi sveitarstjórnar með átta atkvæðum, Sigurjón Þórðarson greiðir atkvæði á móti.