Viðræður um sameiningu sveitarfélaganna Skagabyggðar og Sveitarfélagsins Skagfjarðar

Sveitarfélögin, Sveitarfélagið Skagafjörður og Skagabyggð, hafa átt í óformlegum viðræðum um sameiningu sveitarfélaga.
Sveitarfélögin hafa nú sammælst um að hefja formlegar viðræður um kosti þess að sameinast.

Sveitarfélögin á starfssvæði SSNV sem hafa áhuga á að ræða kosti enn stærri sameiningar við Sveitarfélagið Skagafjörð og Skagabyggð, eru boðin velkomin til viðræðna á sameiginlegan fund sveitarfélaganna sem boðað verður til í byrjun júlí.

Lagt fram bréf frá oddvita Akrahrepps þar sem fram kemur að Akrahreppur ætlar að taka þátt í viðræðum um sameiningu Sv. Skagafjarðar, Skagabyggðar og Akrahrepps.

Byggðarráð fagnar þátttöku Akrahrepps í sameiningarviðræðum Sveitarfélagsins Skagafjarðar og Skagabyggðar.

Byggðarráð samþykkir jafnframt að stofna sameiningarnefnd þar sem sæti eiga að hálfu Sveitarfélagsins Skagafjarðar oddvitar allra flokka í sveitarstjórn.

Byggðarráð felur sveitarstjóra að boða fulltrúa sveitarfélaganna til fundar við fyrsta tækifæri.

Sveitarfélagið Skagabyggð og Sveitarfélagið Skagafjörður boðuðu til kynningafundar vegna fyrirhugaðra viðræðna um sameiningu sveitarfélaga mánudaginn 17.júlí 2017. Eftirtalin sveitarfélög hafa tilkynnt komu sína:
Akrahreppur og Húnaþing vestra.