Yngvi Jósef Yngvason ráðinn í starf varaslökkviliðsstjóra

Yngvi Jósef Yngvason hefur verið ráðinn í starf varaslökkviliðsstjóra hjá Brunavörnum Skagafjarðar og mun hann hefja störf í desember. Yngvi tekur við stöðunni af Sigurði Bjarna Rafnssyni sem mun láta af störfum í október.

Yngvi hefur starfað sem hlutastarfandi slökkviliðsmaður í tæplega 20 ár hjá Brunavörnum Skagafjarðar og er með löggildingu slökkviliðsmanns sem og í sjúkraflutningum. Hann er með sveinsbréf í rafvirkjun og málmsteypu, ásamt því að vera með vélavarðar- og vélstjórnarréttindi. Hann er með meirapróf og réttindi til að stjórna minni vinnuvélum, köfunarréttindi, skipstjórnarréttindi (30 tonna) ásamt skotvopnaleyfi. Að auki hefur hann lokið ýmsum námskeiðum sem tengjast slökkviliðinu og sjúkraflutningum.

Um leið og við þökkum Sigurði Bjarna fyrir hans góðu störf undanfarin ár, bjóðum við Yngva hjartanlega velkominn til starfa og óskum óskum honum velfarnaðar í sínum störfum.