Skagafjörður tekur við útnefningu sem EDEN gæðaáfangastaður Íslands 2015

Á Ferðamálaþingi sem haldið var á Akureyri í gær, miðvikudaginn 28. október, tóku fulltrúar frá Sveitarfélaginu Skagafirði á móti útnefningu Ferðamálastofu sem EDEN gæðaáfangastaður Íslands 2015.

Ferðamálastofa er fyrir Íslands hönd aðili að verkefninu, sem stendur fyrir „European Destination of Excellence“. Markmið verkefnisins er að vekja athygli á gæðum, fjölbreytileika og sameiginlegum einkennum Evrópskra áfangastaða og kynna til sögunnar nýja, lítt þekkta, áfangastaði vítt og breitt um Evrópu þar sem áhersla er lögð á ferðaþjónustu í anda sjálfbærni. Þema ársins 2015 var matartengd ferðaþjónusta.

Á Ferðamálaþinginu var farið yfir hina ýmsu þætti ferðaþjónustu, umhverfisverðlaun Ferðamálastofu voru afhent ásamt því að afhentar voru viðurkenningar fyrir fyrsta og annað sæti í samkeppninni um gæðaáfangastaðinn 2015. Það var Ólöf Ýr Atladóttir ferðamálastjóri sem afhenti verðlaunin.

Ragnheiður Elín Árnadóttir iðnaðar- og viðskiptaráðherra ávarpaði þingið og margir áhugaverðir fyrirlesarar fluttu erindi.