Útgáfuhóf í Safnahúsi í tilefni af 100 ára afmæli Kristmundar Bjarnasonar

Í dag 10. janúar eru 100 ár liðin frá fæðingu Kristmundar Bjarnasonar rithöfundar og fræðimanns á Sjávarborg en hann dvelur nú á dvalarheimilinu á Sauðárkróki. Kristmundur er heiðursfélagi Sögufélags Skagfirðinga og í tilefni þessara tímamóta gefur félagið úr bernskuminningar hans frá Mælifelli, þar sem hann ólst upp.

Bókin ber heitið Í barnsminni og ritaði Kristmundur hana á árunum 2005-2006, nærri 240 blaðsíður, prýdda fjölda mynda ásamt nafnaskrá. Kristmundur á langan og góðan feril að baki sem rithöfundur og fræðimaður og í tilkynningu Sögufélagsins segir að hann sé óskoraður meistari í meðferð íslensk máls og texta enda óhætt að fullyrða að þessi bók er bráðskemmtileg aflestrar.

Laugardaginn 12. janúar verður bókarkynning og útgáfuhóf í Safnahúsinu á Sauðárkróki kl 16 sem Sólborg Una Pálsdóttir héraðsskjalavörður stýrir. Þar mun Hjalti Pálsson segja lítillega frá æviferli Kristmundar og kynnum sínum af honum og Unnar Ingvarsson segir frá kynnum sínum og samskiptum við Kristmund. Kristján B. Jónasson talar um bókmennta- og fræðistörf Kristmundar og Sölvi Sveinsson kynnir bókina og les upp úr henni.

Boðið verður upp á veitingar og bókin seld á tilboðsverði og eru allir velkomnir.