Atvinnu-, menningar- og kynningarnefnd Svf Skagafjarðar

Unnar Ingvarsson héraðsskjalavörður kom til fundar og kynnti starfsemi safnsins á síðasta ári, auk þess að ræða ýmis verkefni sem framundan eru.

Farið var yfir ferð fulltrúa Sveitarfélagsins Skagafjarðar á JEC Composites 2014. Sýningin er jafnframt kaupstefna og samhliða henni er haldin ráðstefna þar sem farið er yfir þróunina í trefjaiðnaði og notkun trefja í hinum ýmsu framleiðsluþáttum og vörum. Tilgangur ferðarinnar var sá að vekja athygli á Skagafirði sem vænlegum kosti fyrir framleiðslu koltrefja, eiga skipulagða fundi með fulltrúum trefjaframleiðenda um mögulega staðsetningu framleiðslustarfsemi í Skagafirði, auk þess að fá upplýsingar um þróunina í þessum geira á heimsvísu. Góðir fundir náðust með lykilaðilum í þessum geira og verður þeim fylgt eftir með frekari samskiptum.

Atvinnulífssýning verður haldin helgina 26. og 27. apríl nk. Rætt var um undirbúning og skipulagningu sýningarinnar og málstofur sem munu fara fram samhliða henni.

Atvinnu-, menningar- og kynningarnefnd samþykkir að ráðast í úttekt á nokkrum þáttum sem lúta að því að efla Skagafjörð sem valkost fyrir fyrirtæki til að staðsetja starfsemi sína í firðinum. Er það liður í markaðs- og kynningarátaki í Skagafirði sem unnið er samkvæmt sóknaráætlun Norðurlands vestra og skal úttektin greidd af styrk sem fékkst til átaksins. Meðal þess sem taka skal út er samkeppnisfærni Skagafjarðar hvað varðar atriði eins og jarðhita, vatn, rafmagn, samgöngur og mannauð. Skal úttektinni lokið á vordögum 2014.

Rætt um uppfærslu og uppsetningu á upplýsingaskiltum við innkeyrslur í þéttbýlisstaði sveitarfélagsins. Samþykkt að kanna hver getur verið hagkvæmasta og heppilegasta útfærslan á slíkum skiltum.