Atvinnu-, menningar- og kynningarnefnd Svf Skagafjarðar

Tekin fyrir styrkbeiðni frá Videosport ehf. vegna viðburðar í Ljósheimum fyrir leikskólabörn í Sveitarfélaginu Skagafirði . Til stendur að fá Íþróttaálfinn og Sollu stirðu til að skemmta börnum á leikskólaaldri. Til þess að hægt sé að bjóða börnum frítt á viðburðinn óska þau eftir styrk að upphæð 150.000 kr.

Atvinnu-, menningar-, og kynningarnefnd fagnar erindinu og samþykkir að veita styrk að upphæð 150.000 kr.

Sæluvika Skagfirðinga verður haldin dagana 24. - 30. apríl nk. Til stendur að halda Sæluviku með hefðbundnum hætti þar sem engar samkomutakmarkanir eru í gildi. Setning Sæluviku verður í Safnahúsinu á Sauðárkróki sunnudaginn 24. apríl. Þar verða úrslit hinnar árlegu Vísnakeppni tilkynnt og Samfélagsverðlaun Skagafjarðar verða veitt. Auglýst hefur verið eftir áhugasömum aðilum til þess að halda viðburði á Sæluviku.

Atvinnu-, menningar- og kynningarnefnd felur starfsmönnum að óska eftir tilnefningum fyrir Samfélagsverðlaun Skagafjarðar, en Samfélagsverðlaun Skagafjarðar eru veitt árlega þeim einstaklingi, fyrirtæki, stofnun eða félagasamtökum í Sveitarfélaginu Skagafirði sem þykja standa sig afburða vel í að efla skagfirskt samfélag. Atvinnu-, menningar- og kynningarnefnd hvetur einnig áhugasama til þess að standa fyrir viðburði í Sæluviku.