Atvinnu- og ferðamálanefnd

Tekin fyrir umsókn frá Air 66N flugklasa um áframhaldandi stuðning við uppbyggingu millilandaflugs til Norðurlands. Atvinnu- og ferðamálanefnd hefur góðar væntingar til verkefnisins og samþykkir að veita kr. 250.000,- til verkefnisins að þessu sinni.

Tekin fyrir umsókn um styrk frá forsvarsmönnum tónlistarhátíðarinnar Gærunnar. Atvinnu- og ferðamálanefnd fagnar þessu ágæta framtaki og hvetur aðstandendur hátíðarinnar til að halda áfram uppbyggingu og þróun hátíðarinnar. Nefndin samþykkir að veita kr. 200.000,- til hátíðarinnar og beinir því til starfsmanna nefndarinnar að aðstoða eftir föngum við undirbúning hennar.

Tekin fyrir umsókn frá Skagfirsku kvikmyndaakademíunni um styrk til sumarskóla í kvikmyndafræðum í Skagafirði en þátttakendur skólans koma víða að úr heiminum. Atvinnu- og ferðamálanefnd lýsir yfir mikilli ánægju með þetta góða framtak og telur góðar líkur á að sumarskólinn í Skagafirði sé kominn til að vera. Nefndin samþykkir að veita kr. 150.000,- til skólans.

Tekin fyrir umsókn frá aðstandendum Bjórhátíðarinnar á Hólum í Hjaltadal um styrk til menningarviðburðarins. Atvinnu- og ferðamálanefnd telur sér ekki fært að styrkja Bjórhátíðina á Hólum í Hjaltadal að þessu sinni en minnir á að Sveitarfélagið Skagafjörður veitir umtalsverða fjármuni í Menningarsamning Norðurlands vestra og telur rétt að beina styrkbeiðni vegna þessa menningarviðburðar í þann farveg.

Tekin fyrir umsókn frá Lafleur web slf. um styrk til upplýsingamiðstöðvar fyrir ferðamenn á Aðalgötu 20. Atvinnu- og ferðamálanefnd þakkar fyrir erindið og óskar Benedikt Lafleur góðs gengis við rekstur upplýsingamiðstöðvar í Aðalgötu 20. Sveitarfélagið Skagafjörður stendur sjálft fyrir rekstri upplýsingamiðstöðvar fyrir ferðamenn í Minjahúsinu á Sauðárkróki í sumar og ekki er í fjárhagsáætlun fyrir árið 2013 gert ráð fyrir meiri fjármunum í rekstur upplýsingamiðstöðva. Nefndin hafnar því erindinu en telur ástæðu til að fara yfir rekstrarfyrirkomulag og opnunartíma upplýsingamiðstöðva fyrir ferðamenn á Sauðárkróki í fjárhagsáætlun fyrir árið 2014.

Kynnt niðurstaða umsóknar í Framkvæmdasjóð ferðamannastaða vegna verkefnisins "Bæjarfjöllin í Skagafirði - upplýsinga- og fræðsluskilti". Verkefnið fékk úthlutað styrk að upphæð kr. 1.025.000,-

Lagður fram til kynningar verkefnasamningur samkvæmt sóknaráætlun Norðurlands vestra en Sveitarfélagið Skagafjörður fær styrk í gegnum áætlunina til markaðs- og kynningarátaks.