Byggðarráð Svf. Skagafjarðar

Á fund byggðarráðs komu nokkrir foreldrar ungra barna sem eru á biðlista eftir leikskólavistun á Sauðárkróki. Afhentu þau opið bréf til Sveitarfélagins Skagafjarðar varðandi skort á dagvistunarúrræðum fyrir yngstu börnin að loknu fæðingarorlofi. Það er mat þeirra að það séu sameiginlegir hagsmunir sveitarfélagsins og íbúa þess að tryggja foreldrum dagvistunarúrræði fyrir börn sín að loknu fæðingarorlofi til að stuðla að áframhaldandi uppbyggingu sveitarfélagsins, atvinnuþátttöku foreldra sem og almennu ánægjustigi í sveitarfélaginu. Vonast þau til þess að sveitarfélagið sýni erindinu áhuga og óska eftir svörum við fyrsta tækifæri.

Byggðarráð þakkar fyrir erindið og vill koma á framfæri að vinna er í gangi til að leysa þann vanda sem fyrir er.

Erindið áður tekið fyrir á 774. fundi byggðarráðs, 16. febrúar 2017.

Fulltrúar skíðadeildar Umf. Tindastóls, Sigurður Bjarni Rafnsson og Helga Daníelsdóttir komu á fundinn undir þessum dagskrárlið til að ræða núgildandi samning milli deildarinnar og sveitarfélagsins.

Frestað erindi frá 774. fundi byggðarráðs, 16. febrúar 2017. Lagður fram tölvupóstur dagsettur 8. febrúar 2017 varðandi samfélagsviðurkenningu Byggðastofnunar, Landstólpann. Óskað er eftir tilnefningu um verðuga handhafa Landstólpans.

Byggðarráð samþykkir að tilnefna doktor Hólmfríði Sveinsdóttur, framkvæmdastjóra Iceprotein.

Lagður fram tölvupóstur dagsettur 21. febrúar 2017 frá Íbúðalánasjóði varðandi kynningarfund um gerð húsnæðisáætlana. Kynningarfundurinn verður í Reykjavík, 28. febrúar n.k. í húsnæði Íbúðalánasjóðs.

Lagður fram undirskriftarlisti frá íbúum og jarðeigendum í Skefilsstaðahreppi hinum forna, þar sem skorað er á sveitarstjórn Sveitarfélagsins Skagafjarðar að hún gangist fyrir ljósleiðaravæðingu á svæðinu hið allra fyrsta, þ.e. austanverðum Skaga og Laxárdal.

Byggðarráð þakkar fyrir erindið og er sammála um að það sé mikið hagsmunamál fyrir byggðina að hafa góðar net- og fjarskiptatengingar.

Lagður fram tölvupóstur dagsettur 17. febrúar 2017 frá Sambandi íslenskra sveitarfélaga varðandi XXXI. landsþing sambandsins sem verður haldið í Reykjavík þann 24. mars n.k.

Byggðarráð mun sækja landsþingið auk sveitarstjóra.

Lagður fram tölvupóstur dagsettur 15. febrúar 2017 frá Rúnari Þór Númasyni og Valdísi Brynju Hálfdánardóttur þar sem þau óska eftir að kaupa fasteignina Suðurbraut 7 á Hofsósi þar sem leikskólinn Barnaborg er rekinn í dag.

Byggðarráð þakkar fyrir erindið og hyggst skoða málið nánar.

Lagt fram bréf frá Bogveiðifélagi Íslands, dagsett 15. febrúar 2017, þar sem félagið óskar eftir afnotum af Litla-Skógi dagana 20.-25. júní 2017 vegna vallarbogfimimóts. Gengin er fyrirfram ákveðin braut og skotið á skotmörk á mismunandi fjarlægðum. Tvö mót hafa verið haldin á þessum stað og tekist vel.

Byggðarráð samþykkir að leyfa afnot svæðisins þennan tíma gegn því að fyllsta öryggis verði gætt og öll tilskilin leyfi séu til staðar s.s. frá lögregluyfirvöldum.

Afgreiðsla færð í trúnaðarbók.

Undir þessum dagskrárlið vék Gréta Sjöfn Guðmundsdóttir af fundi.

Mál varðandi þjónustu við fatlað fólk á Norðurlandi vestra rædd.

Bjarni Jónsson vék af fundi undir þessum dagskrárlið.

Lögð fram drög að samkomulagi Sveitarfélagsins Skagafjarðar, Akrahrepps, Húnaþings vestra og Sveitarfélagsins Skagastrandar um samstarf um rekstur Náttúrustofu Norðurlands vestra.

Byggðarráð samþykkir fyrirliggjandi samning.

Lögð fram til kynningar fundargerð aðalfundar Róta bs. frá 25. janúar 2017.