Byggðarráð Svf. Skagafjarðar

Undir þessum dagskrárlið tóku forsvarsmenn Sótahnjúks ehf. Ólöf Ýrr Atladóttir og Arnar Þór Árnason þátt í fundinum í gegnum fjarfundabúnað.
Byggðarráð samþykkir að fela sveitarstjóra að útbúa drög að samningi um leigu og umsjón sundlaugarinnar að Sólgörðum við Sótahnjúk ehf.

Lagður fram lóðarleigusamningur um Lóð 70 við Sauðárhlíð á Sauðárkróki milli Ljónagryfjunnar ehf. og Sveitarfélagsins Skagafjarðar. Landnúmer 144009.
Byggðarráð sem einnig er stjórn eignasjóðs Sveitarfélagsins Skagafjarðar samþykkir framlagðan lóðarleigusamning.

Byggðarráð Sveitarfélagsins Skagafjarðar fagnar ákvörðun félags- og barnamálaráðherra um fjölgun starfa hjá brunamálasviði Húsnæðis- og mannvirkjastofnunar á Sauðárkróki. Slíkt er í anda stjórnarsáttmála ríkistjórnar Katrínar Jakobsdóttur um fjölgun opinberra starfa á landsbyggðinni og kemur jafnframt fram í ríkistjórnarsamþykkt þar um.
Fjölgun opinberra starfa á landsbyggðinni er landsbyggðarsveitarfélögum þýðingarmikið og mikilvægur þáttur í að efla atvinnu og auka fjölbreytileika atvinnulífs hjá fjölmörgum sveitarfélögum landsbyggðarinnar. Sveitarfélög landsbyggðarinnar eru misjöfn að stærð og gerð en eiga það öll sammerkt að fjölgun opinberra starfa eykur samkeppnisfærni þeirra og skapar þeim tækifæri til vaxtar og framþróunar.
Byggðarráð hvetur stjórnvöld til áframhaldandi góðra verka er kemur að fjölgun opinberra starfa hjá landsbyggðarsveitarfélögum og skorar á önnur sveitarfélög að taka undir áskorun byggðarráðs um eflingu og fjölgun opinberra starfa á landsbyggðinni.

Lagður fram til kynningar ársreikningur Eyvindarstaðaheiðar ehf. fyrir 2019.