Þriggja ára áætlun 2013-2015

Þriggja ára fjárhagsáætlun Sveitarfélagsins Skagafjarðar fyrir árin 2013-2015 hefur verið unnin í samvinnu kjörinna fulltrúa, embættismanna og starfsfólks. Ber að þakka það starf. Við það starf var haft að leiðarljósi að þjónustuskerðingar yrðu sem minnstar gagnvart íbúum og kæmu fram þar sem notkun þjónustu væri minnst. Halda þarf þeirri vinnu áfram og greina enn frekar rekstur einstakra þátta og ákveða þjónustustig sveitarfélagsins til framtíðar. Mikilvægt er að samvinna verði áfram meðal allra sem málið snertir í þeirri viðleitni að ná fram þeim markmiðum sem fram eru sett í áætluninni.

Helstu forsendur áætlunar:

Ekki er gert ráð fyrir hækkun á verðlagi. Útsvarsprósentan er óbreytt á milli ára 13,28%, auk 1,2% hækkun útsvars frá ríki, vegna yfirfærslu málefna fatlaðra frá ríki til sveitarfélaga. Fasteignaskattshlutföll breytast ekki á milli ára. Gert er ráð fyrir nokkrum gjaldskrárhækkunum heilt yfir hjá stofnunum sveitarfélagsins sem er þó stillt í hóf og taka fyrst og fremst mið af vísitöluhækkunum og nýgerðum kjarasamningum.

Rekstur

Veltufé frá rekstri sem fer til að greiða niður skuldir sveitarfélagsins tekur mið af rekstrarafkomu sveitarfélagsins. Það er brýnt að sveitarfélagið leiti leiða til að hagræða í rekstri og/eða auka tekjur sínar á komandi árum til að viðhalda traustri fjárhagsstöðu þess.

Kostnaðareftirlit þarf að vera virkt og fjármálastjórn skipuleg, halda þarf áfram að leita leiða til hagræðingar í rekstri.

Almennt um áætlunina

Þriggja ára áætlun er gerð til að sveitarstjórn horfi til framtíðar og setji sér ramma um rekstur, framkvæmdir og fjármál sveitarfélagsins eftir þeim bestu upplýsingum sem hún hefur. Þannig er reynt að draga upp mynd af því sem búast má við miðað við gefnar, en þó einkum þekktar forsendur og sjá hvað er mögulegt ef við viljum reka sveitarfélagið af ábyrgð og standa vel við allar okkar skuldbindingar og uppfylla jafnframt þær kröfur sem gerðar eru til þjónustu við íbúana.

Í ár munum við vinna þriggja ára áætlun samkvæmt nýjum sveitarstjórnarlögum, þ.e. fjárhagsáætlun næsta árs og fyrir næstu þrjú árin verður unnin samhliða og rædd og samþykkt samhliða. Það mun væntanlega þýða meira álag fyrir nefndir og ráð sveitarfélagsins á þessu hausti en jafnframt, ef allt gengur eftir, að desember og janúar verði ekki eins annasamir og áður.

Ég vil þakka starfsfólki og sveitarstjórnarfulltrúum samstarfið við gerð þessarar áætlunar sem hefur verið gott eins og jafnan áður.

Sauðárkróki 7.mars 2012

Ásta Björg Pálmadóttir

Sveitarstjóri

Þorsteinn Tómas Broddason kvaddi sér hljóðs, þá Sigurjón Þórðarson og Þorsteinn Tómas Broddason sem lagði fram eftirfarandi bókun.

Þriggja ára áætlun sveitarfélags er stefnumótandi plagg sem ætti að vera ljóst hvað verður gert í rekstri og fjárfestingum. Þriggja ára áætlun sveitarfélagsins Skagafjarðar fyrir árin 2013-2015 snýst að mestu um að koma einu máli í gegn, það er viðbygging Árskóla. Með þessari framkvæmd verður skuldsetning sveitarfélagsins aukin verulega, án þess að það skili sér í hagræðingu sem hefði jákvæð áhrif á sjóðsstreymi. Á meðan sveitarfélagið Skagafjörður er rekið með miklum halla og meirihluti sveitarstjórnar veigrar sér við að hefja hagræðingu í rekstri get ég ekki stutt þessa áætlun. Ég sit því hjá við afgreiðslu hennar.

Þriggja ára áætlun Sveitarfélagsins Skagafjarðar fyrir árin 2013-2015 borin undir atkvæði og samþykkt með fimm atkvæðum. Fulltrúar Sjálfstæðisflokks og Frjálslyndar og óháðra óska bókað að þeir sitji hjá.