Byggðarráð Svf. Skagafjarðar

Lögð fram tillaga um að þeim nemendum sem eru með lögheimili í Sveitarfélaginu Skagafirði, stunda nám við Fjölbrautaskóla Norðurlands vestra og búa á heimavist skólans verði greiddar húsaleigubætur samkvæmt sömu reglum og öðrum framhaldsskólanemendum úr sveitarfélaginu er greitt eftir, þrátt fyrir að enn sé beðið niðurstöðu um þátttöku Jöfnunarsjóðs sveitarfélaga. Gildir ákvörðun þessi fyrir tímabilið janúar-maí 2012.

Byggðarráð samþykkir tillöguna.

Frestað erindi frá 576. fundi byggðarráðs. Lagt fram erindi frá Markaðsskrifstofu ferðamála á Norðurlandi varðandi ósk um stuðning við verkefnið Flugklasinn Air 66N. Verkefnið snýst um öfluga og samræmda markaðssetningu Norðurlands erlendis, með áherslu á að koma á beinu millilandaflugi um Akureyrarflugvöll.

Byggðarráð samþykkir að vísa erindinu til umsagnar atvinnu- og ferðamálanefndar.

Lögð fram umsókn frá Húsfélaginu Víðigrund 5 (Oddfellow reglunni) um styrk til greiðslu fasteignaskatts skv. 2.mgr, 5.gr. laga um tekjustofna sveitarfélaga nr. 4/1995. Byggðarráð samþykkir í ljósi fyrirliggjandi gagna og með vísan til reglna sveitarfélagsins að fella niður 30% af álögðum fasteignaskatti ársins 2011 af fastanúmeri 213-2365.

Lagt fram bréf frá sjávarútvegs- og landbúnaðarráðuneytinu varðandi umsókn sveitarfélagsins um byggðakvóta fiskveiðíársins 2011/2012. Úthlutun ráðuneytisins er eftirfarandi: Hofsós, 71 þorskígildistonn, Sauðárkrókur, 66 þorskígildistonn.

Byggðarráð samþykkir að vísa erindinu til meðferðar og umsagnar atvinnu- og ferðamálanefndar.

Rætt um undirbúning og gerð þriggja ára áætlunar 2013 - 2015.

Sigurjón Þórðarson óskar eftir skýringum varðandi fjárhagsáætlun landbúnaðarnefndar 2012 og voru þær gefnar af sveitarstjóra.

Lagt fram erindi frá sýslumanninum á Sauðárkróki þar sem óskað er umsagnar um umsókn Stefáns Gísla Haraldssonar f.h. Gullengi ehf, um rekstrarleyfi fyrir Menningarhúsið Miðgarð, 560 Varmahlíð. Veitingastaður - flokkur III.

Byggðarráð gerir ekki athugasemdir við umsóknina.

Lögð fram til kynningar fundargerð 4. fundar bygginganefndar Árskóla, þann 8. desember 2011.

Fundargerð stjórnar SSNV frá 22. desember 2011 lögð fram til kynningar á 578. fundi byggðarráðs.

Á 274. fundi sveitarstjórnar var afgreidd ályktun vegna tillagna frá starfshópi sjávarútvegsráðherra. Lögð fram til kynningar svör sem borist hafa við ályktuninni.

Lagt fram til kynningar bréf frá innanríkisráðuneytinu varðandi breyttan útreikning og úthlutun framlaga vegna skólaaksturs úr dreifbýli, sem tók gildi 1. janúar 2011. Í bréfinu er óskað eftir umsóknum frá sveitarfélögum sem telja sig hafa orðið fyrir mjög íþyngjandi kostnaði við grunnskólaakstur á árinu 2011 umfram þau framlög sem greidd hafa verið úr Jöfnunarsjóði vegna akstursins úr dreifbýli sveitarfélagsins.