Tímabundin 50% niðurfelling gatnagerðargjalda af nokkrum lóðum á Hofsósi og Steinsstöðum samþykkt

Á 23. fundi sveitarstjórnar Skagafjarðar sem haldinn var 21. febrúar sl., var samþykkt að fella tímabundið niður 50% gatnagerðargjald af eftirtöldum lóðum:

Hofsós: Kárastígur nr. 4 og 6, Kirkjugata nr. 11, Sætún nr. 1-5 (raðhús) og 12 og Hátún nr. 1, 2, 3, 4, 5 og nr. 6-8 (parhús).

Steinsstaðir: Lækjarbakki nr 2, 4, 6 og 8, þegar þessar lóðir verða auglýstar til úthlutunar á heimasíðu Skagafjarðar að undangenginni samþykkt þar að lútandi í skipulagsnefnd og sveitarstjórn.

Framangreindar lóðir á Hofsósi og Steinsstöðum bera, verði ekki annað ákveðið, full gatnagerðargjöld eftir 31.12. 2025, sé þeim úthlutað eftir það tímamark.

Bókun sveitarstjórnar um málið var eftirfarandi:

Vísað frá 82. fundi byggðarráðs frá 31. janúar sl. til afgreiðslu sveitarstjórnar, þannig bókað:

"Vinna hefur verið í gangi við endurgerð og uppfærslu á gildandi deiliskipulagi sunnan Kirkjugötu á Hofsósi og við göturnar Lækjarbakka og Lækjarbrekku á Steinstöðum.

Deiliskipulagsferlinu er lokið á Hofsósi en verið er að leggja loka hönd á frágang skipulagsvinnunnar á Steinstöðum.

Í báðum þessum deiliskipulagstillögunum er bæði verið að auka framboð nýrra byggingarlóða og/eða endurbæta gildandi deiliskipulag með t.d. svæðum fyrir bílskúra og fleira.

Byggðarráð Skagafjarðar vill benda áhugasömum húsbyggjendum á allar þessar áhugaverðu lóðir og þá kosti sem þeim fylgja, og um leið leggja sitt af mörkum til að þær byggist sem hraðast upp.

Byggðarráð samþykkir samhljóða að beina því til sveitarstjórnar að samþykkja, að um lóðir sem úthlutað er frá og með 21. febrúar 2024, gildi tímabundin 50% niðurfelling gatnagerðargjalda af byggingu íbúðarhúsnæðis af hálfu einstaklinga og verktaka á eftir greindum lóðum við þegar tilbúnar götur á bæði Hofsósi og Steinsstöðum. Verði það gert á grundvelli sérstakrar lækkunarheimildar sem hægt er að veita skv. 6. gr. laga um gatnagerðargjöld nr. 153/2006.

Niðurfellingin gildir um eftirtaldar lóðir á Hofsósi: Kárastígur nr. 4 og 6, Kirkjugata nr. 11, Sætún nr. 1-5 (raðhús) og 12 og Hátún nr. 1, 2, 3, 4, 5 og nr. 6-8 (parhús).

Niðurfellingin gildir jafnframt um eftirtaldar lóðir á Steinsstöðum: Lækjarbakka nr 2, 4, 6 og 8, þegar þær verða auglýstar til úthlutunar á heimasíðu Skagafjarðar að undangenginni samþykkt þar að lútandi í skipulagsnefnd og sveitarstjórn, sbr. reglur um úthlutun byggingarlóða í sveitarfélaginu Skagafirði. Framangreindar lóðir á Hofsósi og Steinsstöðum bera, verði ekki annað ákveðið, full gatnagerðargjöld eftir 31.12. 2025, sé þeim úthlutað eftir það tímamark."

Framlögð tillaga byggðarráðs borin upp til afgreiðslu og samþykkt með níu atkvæðum.