Byggðarráð Svf. Skagafjarðar

Lagðar fram hugmyndir um átak til fjölgunar sumarstarfa hjá sveitarfélaginu. Málinu vísað til byggðarráðs frá 46. fundi atvinnu- og ferðamálanefndar.
Byggðaráð tekur jákvætt í það að fundnar verði leiðir til þess að draga tímabundið úr atvinnuleysi í sumar með sérstökum ráðstöfunum í samvinnu við VMST, með fyrirvara þó um fjárahagslegt svigrúm sveitarfélagsins í þeirri vinnu sem stendur yfir við endurskoðun fjárhagsáætlunar.
Byggðaráð beinir því til atvinnu- og ferðamálanefndar að fundað verði með fulltrúum atvinnulífsins og Vinnumálastofnunar og farið yfir afstöðu þeirra til sumarafleysinga og ráðninga. Sveitarstjóra ásamt sviðstjórum falið að vinna að samþættingu þeirra aðgerða sem sveitarfélagið geti farið í og móta í framhaldi af því tillögu til byggðaráðs.

Lagt fram boð varðandi vinabæjamót í Køge 13.-15. maí 2009.
Byggðaráð samþykkir sem lið í sparnaðarleiðum í endurskoðun fjárhagsáætlunar að ekki verði sendir fulltrúar á vinabæjamót til Køge í Danmörku í vor og þakkar gott boð og sendir góðar kveðjur.

Lagt fram bréf frá Náttúrustofu Norðurlands vestra varðandi möguleika á uppbyggingu náttúrugripasafns/sýningar í Skagafirði. Óskar Dr. Þorsteinn Sæmundsson eftir viðræðum við fulltrúa sveitarfélagsins um hvort og hvernig megi byggja upp áhugaverða sýningu/kynningu/safn á lífríki og náttúru Skagafjarðar.
Byggðarráð samþykkir að vísa erindinu til menningar- og kynningarnefndar til afgreiðslu. Minnt er á að Náttúrugripasafn Skagafjarðar er til og bíður þess að því verði fundinn staður til framtíðar.

Lögð fram umsókn frá Frímúrarastúkunni Mælifelli á Sauðárkróki um styrk til greiðslu fasteignagjalda 2009.
Byggðarráð samþykkir í ljósi fyrirliggjandi gagna og með vísan til reglna sveitarfélagsins að fella niður 70% af álögðum fasteignaskatti ársins 2009. Páll Dagbjartsson vék af fundi við afgreiðslu málsins.

Lagt fram bréf frá sýslumanninum á Sauðárkróki, þar sem óskað er umsagnar um umsókn Hestamannafélagsins Léttfeta um endurnýjun á rekstrarleyfi fyrir Félagsheimilið Tjarnarbæ. Samkomusalur flokkur I og svefnpokagisting flokkur II.
Byggðarráð gerir ekki athugasemdir við umsóknina.

Erindið áður tekið fyrir á 466. fundi byggðarráðs. Lagt fram mat lögg. fasteignasala á líklegu verðmæti fasteignanna Kvistahlíð 19 og Grenihlíð 26.
Byggðarráð samþykkir að heimila sveitarstjóra að ganga til samninga um makaskiptin á grundvelli fyrirliggjandi upplýsinga.

Lagt fram til kynningar aðalfundarboð Tækifæris hf. 2009. Fundurinn verður haldinn á Akureyri 2. apríl nk.

Lögð fram til kynningar Ársskýrsla 2008 Sambands íslenskra sveitarfélaga.