Byggðarráð Svf. Skagafjarðar

Talsmenn verktaka í byggingariðnaði í Skagafirði mættu á fund byggðarráðs til ræða verkefnastöðu fyrirtækjanna og horfur framundan. Lýstu þeir áhyggjum sínum af verkefnastöðu fyrirtækjanna og þverrandi verkefnum. Véku þeir síðan af fundi.

Byggðarráð telur ekki forsendur til að hefja framkvæmdir við byggingu íþróttahúss á Hofsósi á grundvelli tilboðs Hofsbótar ses og Ungmannafélagsins Neista þar um. Öll forvinna er of skammt á veg komin til að forsvaranlegt sé fyrir sveitarstjórn að taka skyndiákvörðun um þátttöku í verkefninu og ýmsir þættir er lúta að framkvæmdinni óljósir.
Lýsir byggðarráð þó yfir vilja sveitarfélagsins til þess að starf vinnuhóps aðila sem stofnaður var um verkefnið haldi áfram og tengist vinnu sveitarfélagsins að þarfagreiningu og stefnumörkun sveitarstjórnar í uppbyggingu íþróttamannvirkja og forgangsröðun fjárfestingarverkefna til framtíðar litið.
Um leið og byggðarráð þakkar þann áhuga og stórhug sem tilboðsgjafar sýna þessu verkefni vísar ráðið hugmyndum um byggingu íþróttahúss á Hofsósi að öðru leyti til umfjöllunar í Félags- og tómstundanefnd í tengslum við vinnu nefndarinnar að tillögu til sveitarstjórnar um forgangsröðun uppbyggingar íþróttaðstöðu í sveitarfélaginu.
Bjarni Jónsson óskar bókað: "Fleiri kynslóðir skólabarna frá Hofsósi og nágrannabyggðum hafa ekki átt þess kost að hafa aðgang að boðlegri íþróttaaðstöðu á svæðinu. Nú hafa íbúar tekið saman höndum um að breyta því og staðið fyrir almennri fjársöfnum og áheitum meðal heimafólks sem nægir fyrir talverðum hluta kostnaðar við byggingu lítils íþróttahúss í tengslum við nýja sundlaug á Hofsósi. Einnig er miðað við að lagt verði í umtalsverða sjálboðaliðsvinnu til að bygging íþróttahúss geti orðið að veruleika. Þegar hefur verið lagt í mikla vinnu við undirbúning af hálfu aðstandenda verkefnisins. Því er mikilvægt að unnið verði áfram að farsælli lausn og útfærslu verksins með heimamönnum sem allir aðilar geta fellt sig við."

Lagt fram erindi frá Skátafélaginu Eilífsbúum um styrk til greiðslu fasteignaskatts fyrir árin 2007-2009 vegna skátaskála í landi Brekku og fasteignar félagsins við Borgartún 2.
Byggðarráð hafnar erindinu á grundvelli 2.gr. e) liðar reglna sveitarfélagsins um styrki til greiðslu fasteignaskatts.

Lagt fram til kynningar bréf frá Sambandi íslenskra sveitarfélaga þar sem boðað er til málþings 19. ágúst nk. um lýðræðismál í sveitarfélögum. Vakin er athygli á að hægt verður að fylgjast með á netinu á meðan þinginu stendur og eftirá.

Lagt fram dreifibréf frá Vinnueftirlitinu þar sem vakin er athygli sveitarfélaga á skyldu þeirra að gera skriflega áætlun um öryggi og heilbrigði á vinnustað, sbr. lög nr. 46/1980, 65. gr.

Fundargerð 180. fundar skipulags- og byggingarnefndar lögð fram til afgreiðslu á 486. fundi byggðarráðs eins og einstök erindi bera með sér.