Hofsbót, styrktarsjóður - ósk um fund með byggðarráði

Lagt fram bréf frá stjórn Hofsbótar ses. þar sem stjórnin óskar eftir því að gert verði ráð fyrir tveggja milljón króna framlagi á fjárhagsáætlun 2010 til undirbúnings framkvæmd á byggingu íþróttahúss á Hofsósi. Einnig óskar stjórn Hofsbótar ses. eftir áframhaldandi viðræðum um málið samkvæmt fyrri samþykktum byggðarráðs Skagafjarðar.

Meirihluti byggðarráðs samþykkir að vísa erindinu til félags- og tómstundanefndar og gerðar fjárhagsáætlunar 2010. Jafnframt er nefndinni falið að afla frekari upplýsinga um hvað liggi að baki umbeðinni fjárhæð.

Páll Dagbjartsson óskar bókað:"Miðað við þær umræður sem fram hafa farið á milli byggðarráðs og fulltrúa Hofsbótar ses. um byggingu íþróttahúss á Hofsósi finnst mér eðlilegt að sveitarfélagið leggi fram fé á árinu 2010 til frekari undirbúnings framkvæmdarinnar og tel ég beiðni Hofsbótar ses. mjög í hóf stillt."

Bjarni Jónsson óskar bókað:"Undirritaður styður erindi Hofsbótar og telur að meirihluti byggðarráðs sé enn einu sinni að reyna að svæfa umræðu um íþróttahús með afgreiðslu sinni, líkt og fyrr á árinu þegar sama mál var til umfjöllunar og vísað til félags- og tómstundanefndar. Réttara væri að taka málið strax til raunhæfrar skoðunar með heimafólki og gera ráð fyrir þeirri úttekt í fjárhagsáætlun ársins 2010."

Þórdís Friðbjörnsdóttir og Gréta Sjöfn Guðmundsdóttir óska bókað:"Meirihluti byggðarráðs vísar í bókun 486. fundar ráðsins um málið og ítrekar mikilvægi þess að ákvörðun um byggingu íþróttahúss á Hofsósi tengist vinnu sveitarfélagins að þarfagreiningu og stefnumörkun sveitarstjórnar í uppbyggingu íþróttamannvirkja og forgangsröðun fjárfestingaverkefna til framtíðar litið. Því er eðlilegt að erindinu sé vísað til félags- og tómstundanefndar á þessu stigi málsins."

Fulltrúar sjálfstæðisflokks óska bókað:

"Við fulltrúar sjálfstæðiflokks viljum taka undir og árétta bókun fulltrúa flokksins frá byggðaráðsfundi 26.11. sl.svohljóðandi: Miðað við þær umræður sem fram hafa farið milli byggðaráðs og fulltrúa Hofsbótar ses fyrr á þessu ári um byggingu íþróttahúss á Hofsósi er eðlilegt að sveitarfélagið leggi fram fé á árinu 2010 til frekari undirbúnings framkvæmdarinnar og er beiðni Hofsbótar mjög í hóf stillt."

Fulltrúar framsóknarflokks og samfylkingar árétta bókun frá byggðarráði 26.nóv sl.

"Ítrekum mikilvægi þess að ákvörðun um byggingu íþróttahúss á Hofsósi tengist vinnu sveitarfélagins að þarfagreiningu og stefnumörkun sveitarstjórnar í uppbyggingu íþróttamannvirkja og forgangsröðun fjárfestingaverkefna til framtíðar litið. Því er eðlilegt að erindinu sé vísað til félags- og tómstundanefndar á þessu stigi málsins."

Gísli Árnason leggur fram eftirfarandi tillögu."Sveitarstjórn Sveitarfélagins Skagafjarðar samþykkir að í fjárhagsáætlun ársins 2010 sé gert ráð fyrir kr. 2.000.000 til undirbúnings byggingu íþróttahúss á Hofsósi, í samvinnu við Hofsbót ses."

Fram kom tillaga frá Sigurði Árnasyni um að tillögu Gísla Árnasonar verði vísað til seinni umræðu fjárhagsáætlunar 2010 Samþykkt með fimm atkvæðum en fjórir sitja hjá.

Afgreiðsla 499. fundar byggðaráðs staðfest á 255. fundi sveitarstjórnar með níu atkvæðum.

Málinu var vísað til nefndarinnar frá Byggðaráði . Á fundinn komu fulltrúar Hofsbótar, styrktarsjóðs sem kynntu hugmyndir félagsins og hvöttu nefndina til að leggja félaginu til tvær milljónir til frekari undirbúnings framkvæmdarinnar.

Afgreiðsla 153. fundar félags og tómstundanefndar staðfest á 257. fundi sveitarstjórnar með níu atkvæðum.

Félags-og tómstundanefnd hefur ekki gert ráð fyrir tveggja milljóna króna fjárveitingu til Hofsbótar ses. í fjárhagsáætlun 2010. Nefndin leggur til við Byggðaráð að óskað verði eftir því að tæknisvið sveitarfélagsins meti í samstarfi við Hofsbót ses., möguleika til að bæta íþróttaaðstöðu barna og unglinga út að austan.

Lögð fram bókun 154. fundar félags- og tómstundanefndar.

Byggðaráð samþykkir í ljósi niðurstöðu vinnu félags- og tómstundanefndar að fela tæknisviði Sveitarfélagsins að meta í samstarfi við Hofsbót ses. möguleika til að bæta íþróttaaðstöðu barna og unglinga út að austan.

Gísli Árnason óskar bókað: ´"Meirihluti sveitarstjórnar hefur þvælt þetta mál í tæpt ár, eða allt frá því að fulltrúar Hofsbótar lögðu fram tilboð um 105 milljón króna gjöf til sveitarfélagsins, sem ætluð var til byggingar íþróttahúss, frá íbúum við austanverðan Skagafjörð í maí síðastliðnum, sem Byggðaráð hafnaði svo með formlegum hætti í sumar.

Það eru vonbrigði að þrátt fyrir augljósa mismunun á aðstöðu grunnskólanemenda í sveitarfélaginu til íþróttaiðkunar, hefur meirihluti sveitarstjórnar ítrekað hafnað að koma eitthvað til móts við væntingar íbúa. Að lokum var ósk um að gera ráð fyrir tveggja milljóna króna framlagi til undirbúnings á framkvæmdinni, í fjárhagsáætlun ársins 2010 hafnað, og tillaga sama efnis felld á fundi sveitarstjórnar 17. desember síðastliðinn."

Gunnar Bragi Sveinsson og Gréta Sjöfn Guðmundsdóttir óska bókað: "Meirihluti byggðaráðs hafnar því að mál þetta hafi verið "þvælt" og telur að á allan hátti hafi verið staðið eðlilega að því. Þá er rétt að taka fram að verulegir óvissuþættir eru varðandi 105 mkr. framlag Hofsbótar en það átti m.a. að samanstanda af fjármunum, vinnuframlagi og sjálfboðavinnu. Verið er að byggja nýja sundlaug í Hofsósi þar sem sveitarfélagið leggur til tugi milljóna til framkvæmda tengdum sundlauginni, ásamt því að leggja til árlegt rekstrarfé sem áætla má um 20 ? 30 mkr. á ári. Með komu sundlaugarinnar mun aðstaða barna og unglinga út að austan verða sú besta í Skagafirði. Meirihlutinn mun áfram vinna að úrlausn varðandi íþróttamannvirki út að austan og er þessi afgreiðsla hluti af því."

Páll Dagbjartsson fagnar því að reynt verði að bæta íþróttaaðstöðu barna og unglinga út að austan og væntir þess að íþróttahús rísi innan tíðar.

Gísli Árnason ýtreka bókun frá 503. fundi Byggðarráðs svohljóðandi:

"Meirihluti sveitarstjórnar hefur þvælt þetta mál í tæpt ár, eða allt frá því að fulltrúar Hofsbótar lögðu fram tilboð um 105 milljón króna gjöf til sveitarfélagsins, sem ætluð var til byggingar íþróttahúss, frá íbúum við austanverðan Skagafjörð í maí síðastliðnum, sem Byggðaráð hafnaði svo með formlegum hætti í sumar. Það eru vonbrigði að þrátt fyrir augljósa mismunun á aðstöðu grunnskólanemenda í sveitarfélaginu til íþróttaiðkunar, hefur meirihluti sveitarstjórnar ítrekað hafnað að koma eitthvað til móts við væntingar íbúa. Að lokum var ósk um að gera ráð fyrir tveggja milljóna króna framlagi til undirbúnings á framkvæmdinni, í fjárhagsáætlun ársins 2010 hafnað, og tillaga sama efnis felld á fundi sveitarstjórnar 17. desember síðastliðinn."

Afgreiðsla 503. fundar byggðaráðs staðfest á 258. fundi sveitarstjórnar með níu atkvæðum.