Byggðarráð Svf. Skagafjarðar

Afgreiðslu frestað.

Lagt fram bréf frá hestamannafélögunum Léttfeta og Stíganda varðandi reiðveg milli Sauðárkróks og Varmahlíðar. Óskað er eftir styrk frá sveitarfélaginu í þetta verkefni árið 2010 að upphæð 1.500 þús.kr. Erindi áður á dagskrá 500. og 503. fundar byggðarráðs.

Meirihluti byggðarráðs hafnar erindinu á forsendum þess að um er að ræða framkvæmd sem fé hefur verið veitt til í gegnum reiðveganefnd Vegagerðarinnar og Landssambands Hestamanna. Fyrirsjáanlegt er að sveitarfélagið þarf að leggja fé til reiðvegagerðar á grundvelli aðalskipulags, sem bíður staðfestingar ráðherra.

Lögð fram bókun 154. fundar félags- og tómstundanefndar varðandi að greiðslur hvatapeninga gildi fyrir börn og unglinga á aldrinum frá 6 til 18 ára, frá og með 1. janúar 2010.

Byggðarráð samþykkir að fresta afgreiðslu málsins og óskar eftir nánari gögnum varðandi útreikning á kostnaðarauka við breytinguna.

Lögð fram beiðni frá SAMAN-hópnum um fjárstuðning sveitarfélagsins við forvarnarstarf á árinu 2010.

Byggðarráð samþykkir að vísa erindinu til afgreiðslu félags- og tómstundanefndar.

Lagt fram aðalfundarboð Landssamtaka landeiganda á Íslandi (LLÍ).

Byggðarráð samþykkir að vísa málinu til afgreiðslu landbúnaðarnefndar.

Lagt fram erindi frá Gísla Árnasyni, áheyrnarfulltrúa VG í byggðarráði, þar sem hann óskar eftir upplýsingum um samning á milli sveitarfélagsins og Skagafjarðarhraðlestarinnar frá 13. mars 2007, árangur samstarfsins, hlutverk aðila og eftirfylgni.

Byggðarráð samþykkir að vísa erindinu til atvinnu- og ferðamálanefndar og óskar eftir greinargerð nefndarinnar.

Gísli Árnason óskar bókað: "Meirihluti sveitarstjórnar samþykkti þann 17. desember síðastliðinn kostun og aðstöðu verkefnisstjóra fyrir Skagafjarðarhraðlestina, á grundvelli samnings milli sveitarfélagsins og Skagafjarðarhraðlestarinnar, sem rann út nokkrum dögum síðar, eða um áramótin. Þetta er vægast sagt hæpin stjórnsýsla og allrar gagnrýni verð.

Í ljósi fjárhagsstöðu sveitarfélagsins og þeirra erinda, sem felld voru af meirihlutanum við gerð fjárhagsáætlunar ársins, er þetta undarleg forgangsröðun að kosta atvinnuþróun fyrir lögaðila, þar eð sveitarfélagið sinnir þeim málefnum á öðrum vettvangi."

Lagt fram til kynningar uppgjör framlaga úr Jöfnunarsjóði sveitarfélaga á árinu 2009.