Félags- og tómstundanefnd Svf. Skagafjarðar

Kosning formanns, varaformanns og ritara - Félags- og tómstundanefnd. Gerð er tillaga um Guðnýju Axelsdóttur sem formann, Atla Má Traustason sem varaformann og Sigurlaugu Vordísi Eysteinsdóttur sem ritara.

Ný og breytt ákvæði laga um notendaráð, s.s. öldungaráð. Í nýsamþykktum breytingum á lögum um félagsþjónustu sveitarfélaga nr. 40/1991, sem taka munu gildi þann 1. október n.k., eru ný ákvæði um notendaráð, svo sem öldungaráð. Í ljósi þeirra er nauðsynlegt að endurskoða og uppfæra samþykkt fyrir Öldungaráð Sveitarfélagsins Skagafjarðar. Málið verður tekið upp að nýju og lagt fyrir nefndina í haust.

Skyldur sveitarfélaga samkvæmt jafnréttislögum. Lagt fram erindi frá Jafnréttisstofu þar sem ítrekaðar eru skyldur sveitarfélaga gagnvart jafnréttislögum nr. 10/2008. Sérstaklega er bent á að jafnréttisnefndir skuli fjalla um jafna stöðu og jafnan rétt kvenna og karla og jafnframt gera jafnréttisáætlun til fjögurra ára. Þá er einnig lögð áhersla á að þess skuli gætt við skipan í nefndir, ráð og stjórnir að hlutfalla kynjanna sé sem jafnast og ekki minna en 40% þegar um fleiri en þrjá fulltrúa er að ræða. Málið tekið upp að nýju að sumarleyfum loknum.

Lögð fram til kynningar dagskrá landsfundar jafnréttismála, sem haldinn verður í Hlégarði í Mosfellsbæ dagana 20.-21. september n.k. Landsfundurinn ber yfirskriftina Ungt fólk og jafnréttismál. Nefndin leggur til að fulltrúar Ungmennaráðs Sveitarfélagsins Skagafjarðar sæki ráðstefnuna og felur sviðsstjóra að koma því áleiðis.