Hvatapeningar

Lagt fram yfirlit yfir hvatapeninga til íþrótta-, tómstunda- og menningarstarfs barna og ungmenna. Forstöðumanni íþrótta- og frístundamála falið að vinna að reglum með það að markmiði að einfalda reglur um hvatapeninga og gera fyrirkomulagið aðgengilegra. Frekari umræðum vísað til gerðar fjárhagsáætlunar.

Rætt um fyrirkomulag hvatapeninga vegna iðkunar íþrótta og tómstunda. Málinu frestað til næsta fundar.

Afgreiðsla 224. fundar félags- og tómstundanefndar staðfest á 333. fundi sveitarstjórnar 11. nóvember 2015 með átta atkvæðum.

Lagt er til að upphæð hvatapeninga vegna íþrótta- og tómstunda barna verði 8.000 kr. á ári að því tilskyldu að upphæð æfingagjalda nemi að lágmarki 30.000 kr. Ekki er gerð krafa um að barn stundi fleiri en eina íþrótta- eða tómstundagrein. Systkini geta samnýtt þessa upphæð. Ítarlegar reglur um hvatapeninga verða lagðar fyrir á næsta fundi nefndarinnar. Samþykkt samhljóða.

Afgreiðsla 225. fundar félags- og tómstundanefndar staðfest á 334. fundi sveitarstjórnar 9. desember 2015 með níu atkvæðum.

Afgreiðsla 226. fundar félags- og tómstundanefndar staðfest á 334. fundi sveitarstjórnar 9. desember 2015 með níu atkvæðum.

Forstöðumaður frístunda- og íþróttamála kynnti tillögu að reglum Sveitarfélagsins Skagafjarðar um hvatapeninga. Reglurnar samþykktar samhljóða og þeim vísað til sveitarstjórnar. Reglurnar verða kynntar á heimasíðu sveitarfélagsins.

Forseti gerir tillögu um að vísa afgreiðslu málsins til liðar nr.23 "Hvatapeningar." Samþykkt samhljóða.

Lagðar fram reglur um Hvatapeninga sem samþykktar voru á 230. fundi félags- og tómstundanefndar 5. febrúar 2016 og vísað til samþykktar í sveitarstjórn.

Öll börn í Sveitarfélaginu Skagafirði 6 - 18 ára ( fædd 1998-2010 ) eiga rétt á Hvatapeningum að upphæð 8.000 kr. Hvatapeningum er ætlað að auka jöfnuð í samfélaginu, fjölbreytileika íþrótta-, lista- og tómstundastarfs og styrkja félagslegt umhverfi og hafa jákvæð áhrif á þroska barna og unglinga.
Hvatapeningana er hægt að nýta til að greiða niður æfinga- / þáttökugjöld í skipulögðu íþrótta-, lista- og æskulýðsstarfi. Réttur til Hvatapeninga fyrir árið 2016 fellur niður í árslok. Ónýttir Hvatapeningar nýtast ekki milli ára.

Reglur um notkun hvatapeninga:
1. Skilyrði þess að hægt sé að nýta Hvatapeningana er að um skipulagt íþrótta-, lista- eða æskulýðsstarf sé að ræða og sé stundað undir leiðsögn þjálfara, leiðbeinenda eða kennara. Þetta á við um allt skipulagt íþrótta- og æskulýðstarf sem stundað er á vegum viðurkenndra íþróttafélaga, tónlistarskóla, skáta og önnur námskeið skipulögð af frístundasviði Sveitarfélagsins Skagafjarðar, sbr. Sumar-TÍM.

2. Forsendur Hvatapeninga er að heildargreiðsla fyrir íþrótta-, tómstunda eða tónlistarnám barns nemi að lágmarki 30.000.- á ári. Systkini geta nýtt sér eina Hvatapeninga ef upphæðin nær að lágmarki 30.000.-fyrir þau til samans.

3. Hvatapeninga er ekki hægt að nýta til kaupa á æfingakorti í líkamsræktarstöð en skipulögð unglinganámskeið innan líkamsræktarstöðva falla undir styrkinn. Undantekning frá þessu eru ungmenni fædd 1997 og 1996 en þau geta nýtt Hvatapeningana til kaupa á æfingakortum.

Framlagðar reglur bornar undir atkvæði og samþykktar með níu atkvæðum.