Frístundaakstur

Lagður fram tölvupóstur dagsettur 1. desember 2024 þar sem annars vegar er verið að þakka fyrir fyrirkomulag frístundaferða þar sem ekið er með börn frá Hofsósi og Varmahlíð á Sauðárkrók. Aksturinn er tilraunaverkefni til áramóta og hefur verið mikið nýttur af börnum til íþróttaiðkunar. Þess er einnig farið á leit við sveitarfélagið að fyrirkomulaginu verði haldið áfram eftir áramót og jafnvel skoðað að aka bæði frá Hofsósi og Varmahlíð á Sauðárkrók og aftur til baka frá Sauðárkróki í Varmahlíð og á Hofsós. Undir erindið rita U.Í. Smári, Neisti, Knattspyrnudeild Tindastóls og Körfuknattleiksdeild Tindastóls.

Byggðarráð tekur jákvætt í erindið og samþykkir samhljóða að vísa málinu til félagsmála- og tómstundanefndar. Byggðarráð óskar jafnframt eftir upplýsingum um afstöðu nefndarinnar.

Lagt fram minnisblað um nýtingu viðbótarfrístundaaksturs á þriðjudögum, sem samþykktur var til prufu fram að áramótum á 27. fundi nefndarinnar þann 14. október síðastliðinn. Nefndin fagnar frumkvæði íþróttafélaganna að koma að máli við nefndina og samþykkir samhljóða framlengingu á núverandi fyrirkomulagi, þ.e. akstur aðra leið að loknum skóladegi á þriðjudögum frá Hofsósi og Varmahlíð, á æfingar á Sauðárkróki, til loka skólaársins 2024-2025. Nýting og fyrirkomulag verður skoðað með skólum, íþróttafélögum og forráðamönnum að nýju þegar líða fer að vori. Nefndin vísar málinu til byggðarráðs og óskar eftir því að verkefnið fái fjármögnun með viðauka við fjárhagsáætlun ársins 2025.