Stjórn Menningarseturs Skagfirðinga

Fram kom að núverandi lóðahafar Reykjarhólsvegar 4B hafa ekki sagt sig formlega frá lóðinni og beðið er bréfs þess efnis. Annað er á áætlun.

Tekið fyrir bréf frá Sigurði á Grófargili þar sem hann fer fram á þátttöku Menningarsetursins við kostnað við merkjagirðingu á milli Grófargils og Reykjarhóls. Meðfylgjandi eru drög að kostnaðaráætlun af net og gaddavírsgirðingu. Nefndin tekur jákvætt í erindið að því tilskyldu að girðingin hamli ekki lögbundnum umferðarrétti, gangandi og ríðandi fólks.

Menningarsetrið á 21,4% hlutafjár í Ferðasmiðjunni og þarf að taka þátt í kostnaði vegna viðhalds á húsi félagsins í Varmahlíð. (Upplýsingamiðstöðin) Búið er að taka tilboði Helga Sigurðssonar torfhleðslumanns í viðgerðina að upphæð kr. 1.6 milljónir, án samráðs við stjórn Menningarsetursins og fer hún fram á nánari útlistun á verkþættinum. Sömuleiðis kallar stjórnin eftir nánara samráði um málefni Ferðasmiðjunnar. Málinu vísað til nýrrar stjórnar Menningarsetursins.

Munnlegt erindi frá Kára Gunnarssyni Skógarstíg 2 um upptöku lóðaleigusamnings og stækkunar lóðar. Stjórn biður Kára um formlegt erindi ásamt viðeigandi gögnum.

Borist hefur ábending frá sýslumanni þar sem fram kom að misvísandi nöfn eru í opinberum gögnum um málefni Menningarseturs Skagfirðinga í Varmahlíð en þar má finna m.a. Varmahlíðarfélagið og fl. Formanni falið að leiðrétta.

Borist hefur erindi frá Kaupfélagi Skagfirðinga um framtíðarskipulag lóðar K.S. Varmahlíð og Ferðasmiðjunnar. Sveitarstjóri hefur falið Skipulags-og byggingarnefnd að sjá um málið. Ekki hefur verið haft samráð við stjórn Menningarhússins vegna málsins, en hún er lóðaeigandinn. Sveitarfélaginu hefur einnig borist erindi frá Páli Dagbjartssyni og Gísla Árnasyni um sama mál.