Umhverfis- og samgöngunefnd Svf Skagafjarðar

Slökkviliðsstjóri fór yfir tækjakost slökkviliðs og lagði fram áætlun um kaup á nýjum slökkvi- og dælubíl. Áætlaður kostnaður er um 60 milljónir sem hægt væri að dreifa á 3 ár, 2014-2016. Nefndin mælir með kaupum á nýjum slökkvi- og dælubíl.
Fjárhagsáætlun Brunavarna Skagafjarðar ásamt minnisblaði lögð fram til kynningar. Fjárhagsáætlun staðfest að hálfu nefndarinnar og vísað til Byggðaráðs.

Ræddar voru mögulegar breytingar á gjaldskrá fyrir sorphirðu.
Lagt til að hækka gjaldskrá vegna sorphirðu og sorpeyðingu fyrir íbúðarhúsnæði í samræmi við hækkun vísitölu neysluverðs.
Lagt til að taka upp sérstaka gjaldskrá fyrir býli með búrekstur vegna förgunar búfjár. Sviðsstjóra falið að koma með tillögu að útfærslu fyrir næsta fund.

Fjárhagsáætlun fyrir málaflokk 08 - Hreinlætismál lögð fram til staðfestingar. Fjárhagsáætlunin staðfest að hálfu nefndarinnar með áætluðum breytingum og vísað til Byggðaráðs.

Fjárhagsáætlun fyrir málaflokk 10 - Umferðar- og samgöngumál lögð fram til staðfestingar. Fjárhagsáætlunin samþykkt og vísað til Byggðaráðs.

Ræddar voru breytingar á tæmingargjaldi fyrir rotþrær. Í dag er gjaldið innheimt sem árgjald sem greiðist ár hvert og tæmingargjald sem greiðist eftir tæmingu á rotþró á 3ja ára fresti.
Lagt er til að breyta gjaldskrá vegna fráveitu. Árgjald verði fellt niður og eingöngu greitt tæmingargjald vegna rotþróa.

Óskað eftir umsögn um frumvarp til laga um brottfall laga um náttúruvernd, nr. 60/2013.

Fulltrúi samfylkingar, Guðrún Helgadóttir, óskar bókað að hún styður ekki brottfellingu laga um náttúruvernd nr. 60/2013. Endurskoðun laga um náttúruvernd er löngu tímabær enda eru umhverfis- og náttúruverndarmál eitt stærsta úrlausnarefni stjórnmálanna í dag. Þingmenn og ráðherrar hljóta að geta lagt til frumvarp til breytinga á lögunum fremur en að hverfa aftur til ársins 1999 með þessa mikilvægu löggjöf.

Fulltrúi framsóknarflokks, Sigríður Magnúsdóttir, óskar bókað að hún tekur undir athugasemdir sem koma fram við lög um brotfall laga um náttúruvernd. Allar athugasemdir sem gerðar hafa verið á frumvarpi á lögum nr. 60/2013 gefa tilefni til endurskoðunar en ljóst er að sú vinna yrði tímafrek þar sem um afar flókinn og viðamikinn lagabálk er að ræða. Ánægjulegt er að gert er ráð fyrir að nýtt frumvarp muni samt sem áður að einhverju leyti byggja á þeirri miklu vinnu sem unnin hefur verið.

Umferðarátak FÍB, gangbraut, já takk, lagt fram til kynningar.
Nefndin þakkar FÍB fyrir framtakið og mun hafa tillögurnar til hliðsjónar í vinnu sinni.

Samþykkt um búfjárhald í Sveitarfélaginu Skagafirði lagt fram til kynningar.

Nefndin leggur til eftirfarandi breytingu á 4. grein.
Með leyfi öðlast búfjáreigendur þó rétt til upprekstrar sauðfjár og hrossa á afréttir í sveitarfélaginu.

Nefndin beinir því til landbúnaðarnefndar að verklagsreglur verði unnar um framkvæmd samþykktar.