Veitunefnd Svf Skagafjarðar

Lögð voru fram drög að fjárhagsáætlun 2016 fyrir Skagafjarðarveitur.
Nefndin samþykkir áætlunina og vísar henni til byggðarráðs.

Lögð voru fyrir fundinn drög að framkvæmdaáætlun Skagafjarðarveitna fyrir árið 2016.
Nefndin samþykkir áætlunina og vísar til byggðarráðs.

Ræddar voru mögulegar gjaldskrárbreytingar hitaveitu og vatnsveitu.
Gjaldskrá hitaveitu vegna heitavatnsnotkunar hefur ekki breytst síðan í júlí 2013 og sama á við um kalt vatn þar sem vatn er selt skv. mældri notkun.
Nefndin leggur til 3,5% gjaldskrárhækkun hitaveitu og vatnsveitu og vísar til byggðarráðs.

Farið var yfir stöðu framkvæmda í Fljótum.
Mánudaginn 26. október sl. var heitu vatni hleypt á stofnlögn í Fljótum, hleypt var á stofnlögn í áföngum frá dæluhúsi við Langhús og í byrjun nóvember var búið að hleypa á alla stofnlögnina að Deplum, samtals um rúmlega 18km leið.
Verktaki vinnur nú að lagningu heimæða og stefnir á að ljúka framkvæmdum við þær á næstu vikum.

Borverktaki hefur hætt borun á nýrri borholu við Langhús, LH-03. Samtals voru boraðir um 380m án þess að teljandi vatnsmagn fyndist.
Sérfræðingar ÍSOR hafa skilað Skagafjarðarveitum skýrslu þar sem bent er á nýjan borunarstað í framhaldi af könnun svæðisins og vitneskju frá fyrri holum. Ný hola er staðsett sunnan við dæluhús og telja skýrsluhöfundar að lítil áhætta fylgi borun nýrrar lóðréttrar vinnsluholu, LH-04. Í nýrri holu er stefnt á að ná heita vatninu á 170 til 250m dýpi og ná úr henni meira vatni en núna fæst úr fyrri holum, LH-01 og LH-02.
Áætlaður kostnaður við nýja holu er 8 til 10 milljónir.
Nefndin leggur til að farið verði í borun á nýrri holu LH-04.