Atvinnu- og ferðamálanefnd

Ásbjörn Björgvinsson framkvæmdastjóri Markaðsskrifstofu Norðurlands kom til fundarins og kynnti starfsemi stofunnar.

Svanhildur Pálsdóttir formaður Félags ferðaþjónustunnar í Skagafirði kom til fundarins og kynnti starfsemi félagsins.

Sviðsstjóra falið að ganga frá samningi við Byggðasafn Skagfirðinga um rekstur upplýsingamiðstöðvar í Minjahúsinu á Sauðárkróki sumarið 2011 með sama hætti og gert var síðasta sumar.

Sviðsstjóra falið að halda áfram hugmyndavinnu varðandi skipulag rekstrar upplýsingamiðstöðvarinnar í Varmahlíð á komandi sumri. Niðurstöður skulu liggja fyrir á næsta fundi.

Tekið fyrir erindi frá Knattspyrnudeild Tindastóls þar sem óskað er eftir því að tímasetning Lummudaga verði endurskoðuð. Lummudagar eru haldnir af Skagafjarðarhraðlestinni sem ákveða þar af leiðandi tímasetningu þeirra. Nefndin sér hinsvegar ekki sérstaka ástæðu til að mæla með því að tímasetningu þeirra verði breytt og telur Lummudaga góða viðbót við þá viðburði sem fram fara í firðinum þessa sömu helgi.

Lagðar fram til kynningar upplýsingar um ráðstefnu sem Markaðsskrifstofa Norðurlands stendur fyrir á Akureyri 28. febrúar nk.

Svanhildur Guðmundsdóttir þurfti að víkja af fundi og tók því ekki þátt í afgreiðslu þessa dagskrárliðs.

Tekið fyrir erindi frá Gestastofu sútarans þar sem óskað er eftir stuðningi frá sveitarfélaginu varðandi frekari uppbyggingu stofunnar. Sveitarfélagið hyggst leggja fjármagn í að bæta umhverfi við og aðgengi að Gestastofunni á árinu. Atvinnu- og ferðamálanefnd samþykkir að styrkja verkefnið um kr. 300.000 og bíður þar að auki fram aðstoð starfsfólks á Markaðs- og þróunarsviði við kynningarmál og annað.

Svanhildur Guðmundsdóttir þurfti að víkja af fundi og tók því ekki þátt í afgreiðslu þessa dagskrárliðs.

Atvinnu- og ferðamálanefnd Sveitarfélagsins Skagafjarðar mótmælir neikvæðum yfirlýsingum framkvæmdastjóra Samtaka ferðaþjónustunnar um íslensk matvæli og þeim fullyrðingum að verð á þeim hamli ferðaþjónustu. Nefndin lýsir áhyggjum yfir þeim viðhorfum sem felast í ummælum hennar m.a. varðandi innflutning á matvælum á kostnað íslenskrar framleiðslu. Nefndin vill vekja athygli á að einn helsti vaxtarbroddur í ferðaþjónustu á landsbyggðinni er matartengd ferðaþjónusta og að í henni felast ótal tækifæri, ekki síst tengd sérkennum einstakra svæða. Þá er bent á að víða á landsbyggðinni er ferðaþjónusta nátengd landbúnaði. Nefndin lýsir einnig furðu yfir áhyggjum framkvæmdastjórans af því að erlendir ferðamenn skilji eftir of mikla fjármuni hér á landi, eins og skilja má ummæli hennar um matarverð og íslensk matvæli.
Nefndin samþykkir að bjóða framkvæmdastjóranum norður í Skagafjörð til að kynna sér ferðaþjónustu utan höfuðborgarsvæðisins, einkum þá blómlegu uppbyggingu sem hér á sér stað í matartengdri ferðaþjónustu og til að bragða á kræsingum úr skagfirsku matarkistunni.