Byggðarráð Skagafjarðar

Lagður fram tölvupóstur dagsettur 6. júní 2024 frá forsvarsmanni Essa ehf. Óskað er eftir heimild til að loka Aðalgötunni frá Kirkjutorgi norður að Kambastíg þar sem fyrirhugað er að halda útitónleika, "Tónleikar í gamla bænum".
Samþykkt samhljóða með fyrirvara um samþykki lögreglunnar.

Málið áður tekið fyrir á 56. fundi Byggðarráðs Skagafjarðar þann 12. júlí 2023. Þar voru Sigfús Ingi Sigfússon sveitarstjóri og Steinn Leó Sveinsson sviðsstjóri veitu- og framkvæmdasviðs skipaðir í verkefnastjórn vegna Landsmóts hestamanna að Hólum í Hjaltadal árið 2026. Tillaga liggur fyrir að skipa Hjörvar Halldórsson núverandi sviðsstjóra Veitu- og framkvæmdasviðs í stað Steins Leós Sveinssonar fyrrverandi sviðsstjóra í verkefnastjórnina.
Samþykkt samhljóða.

Erindi vísað frá 28. fundi fræðslunefndar 10. júní sl., þannig bókað:
"Á fundi fræðslunefndar þann 18. janúar sl. stefndi í að fimm börn, 12 mánaða eða eldri, yrðu á biðlista við Birkilund haustið 2024. Fræðslunefnd fól starfsfólki að auglýsa eftir dagforeldrum og kanna kosti og galla þess að skólahópur yrði staðsettur í húsnæði Varmahlíðarskóla, sem leikskóladeild, þar til nýr leikskóli hefur starfsemi. Málið hefur reglulega verið rætt, bæði formlega og óformlega, í nefndinni síðan í janúar. Margir kostir hafa verið skoðaðir til að bregðast við biðlista sem hefur stækkað og stefnir í að 9 börn verði á biðlista eftir innritun í haust að öðru óbreyttu. Mikið samráð hefur verið við foreldra, m.a. í formi þriggja kannana og þriggja funda. Þar af hafa tveir fundir verið með foreldrum barna sem eru á leið í skólahóp á næsta ári auk fundar með starfsfólki, foreldrum leikskólabarna og foreldrum barna á biðlista í Birkilundi þar sem m.a. var farið yfir þá möguleika sem hafa verið kannaðir til að stytta biðlistann. Kannaður hefur verið möguleikinn á því að hafa leikskóladeild í Árgarði, Melsgili, Háholti, Miðgarði, Varmahlíðarskóla eða leigja gáma til að stækka Birkilund. Þá hefur verið kannaður möguleikinn á því að sveitarfélagið kaupi einbýlishús til að breyta í leikskóladeild eða leigi til dagforeldra. Þessir möguleikar eru ýmist kostnaðarsamir, tímafrekir eða óhentugir og ekki fyrirséð að þeir geti minnkað biðlista í náinni framtíð en áætlað er að ný leikskólabygging verði tekin í notkun haustið 2025. Þá hefur möguleikinn á að skólahópsbörn fari fyrr í Varmahlíðarskóla, þó ekki í 1. bekk, verið skoðaður. Á fundum og í könnunum hafa komið margar athugasemdir og ábendingar sem tekið hefur verið tillit til og brugðist við eftir bestu getu. Eftir að hafa skoðað alla kosti vel og rætt þá við foreldra og starfsfólk er niðurstaðan að besti kosturinn sé að stofna deild fyrir skólahópsbörn undir Varmahlíðarskóla í haust sem tilraunaverkefni út júní 2025 og hefur foreldrum þeirra barna verið kynnt hvernig nánari útfærsla á því gæti litið út. Fordæmi eru frá nokkrum sveitarfélögum, t.d. Vestmannaeyjum, Bolungarvík og Garðabæ. Fræðslunefnd vill þakka starfsfólki fjölskyldusviðs, Varmahlíðarskóla og Birkilundar ásamt foreldrum fyrir að leggja sitt af mörkum við að koma með hugmyndir og finna raunhæfar lausnir. Fyrir liggja umsagnir foreldraráðs Birkilundar og skólaráðs Varmahlíðarskóla um tilraunaverkefnið. Fræðslunefnd felur starfsfólki fjölskyldusviðs að auglýsa eftir starfsfólki í samráði við skólastjóra Varmahlíðarskóla og útfæra verkefnið enn frekar. Nefndin leggur áherslu á það að verkefnið verði ekki að veruleika nema a.m.k. einn starfsmaður með viðeigandi menntun verði til staðar á deildinni. Þrátt fyrir að deildin verði innan Varmahlíðarskóla er mikilvægt að starf deildarinnar byggi á starfi elstu deildar í leikskóla og að gott samstarf verði áfram á milli Birkilundar og Varmahlíðarskóla. Áfram skal leggja áherslu á samráð og samstarf við foreldra og góða aðlögun í haust áður en deildin tekur formlega til starfa innan Varmahlíðarskóla. Fræðslunefnd óskar eftir því að fá kynningu á stöðu verkefnisins á fyrsta fundi í haust. Tillagan er samþykkt samhljóða. Nefndin vísar málinu til byggðarráðs."

Byggðarráð samþykkir tillöguna samhljóða og vísar til afgreiðslu sveitarstjórnar.

Málinu vísað frá 24. fundi Félagsmála- og tómstundanefndar þann 6. júní 2024 þannig bókað:

"Lögð fram drög að reglum um útleigu íþróttahúsa Skagafjarðar til skemmanahalds. Nefndin samþykkir fyrirliggjandi drög samhljóða og vísar þeim til afgreiðslu í byggðarráði."

Byggðarráð samþykkir samhljóða að vísa málinu aftur til Félagsmála- og tómstundanefndar til frekari vinnslu og leggur jafnframt til að nefndin vinni drög að umsóknareyðublaði og samningi.

Ársskýrsla Landskjörstjórnar 2023 lögð fram til kynningar.