Byggðarráð Svf. Skagafjarðar

Lagt fram bréf dagsett 6. nóvember 2015 frá Flokkun Eyjafjörður ehf. þar sem stjórn félagsins óskar svara um hvort sveitarfélagið sé hlynnt því að stofnað verði byggðasamlag eða félag með öllum sveitarfélögum á Norðurlandi í kjölfar nýrrar svæðisáætlunar um meðhöndlun úrgangs á Norðurlandi. Tilgangur félagsins yrði að halda utan um úrgangsmál á svæðinu og fylgja svæðisáætlun eftir.
Byggðarráð vill koma því á framfæri að Sveitarfélagið Skagafjörður er nú þegar í byggðasamlagi um urðun úrgangs og hefur öfluga flokkunarstöð staðsetta á Sauðárkróki. Sveitarfélagið Skagafjörður hefur verið leiðandi á sviði úrgangsmála og leggur áherslu á að halda þeirri stöðu. Að svo komnu máli sér sveitarfélagið ekki ástæðu til að útvíkka samstarf á sviði sorpmála á Norðurlandi.

Lagður fram undirritaður og ósamþykktur ársreikningur Róta bs. fyrir árið 2014 sem er á dagskrá aðalfundar byggðasamlagsins 16. desember 2015.

Lögð fram tillaga um breytingu á skipan fulltrúa Sveitarfélagsins Skagafjarðar á aðalfund Róta bs.

Varafulltrúar til viðbótar við þá sem áður hafa verið skipaðir:
Gunnar M. Sandholt, Björg Baldursdóttir og Guðný Axelsdóttir.

Samþykkt samhljóða.

Bjarni Jónsson starfsmaður Náttúrustofu Norðurlands vestra fór yfir drög að ársreikningum 2013 og 2014 fyrir stofnunina og endurreisn starfsemi hennar.

Undir þessum dagskrárlið komu á fundinn fulltrúar Húnavatnshrepps, Þorleifur Ingvarsson og Einar Kristján Jónsson til viðræðu um viðhaldskostnað Ströngukvíslarskála og Galtarárskála á Eyvindarstaðaheiði svo og rekstur þeirra. Húnavatnshreppur á 5/17 hluta í skálunum en Sveitarfélagið Skagafjörður 12/17 hluta.
Samþykkt að koma á fundi með stjórn Eyvindarstaðaheiðar ehf. og fulltrúum sveitarfélaganna til að ræða eignarhald og rekstur skálanna til framtíðar.

Lögð fram til kynningar teikning að skjólgarði við smábátahöfnina á Sauðárkróki, sem liggja á að mestu eins og flotbryggjan fyrir stærri báta. Garðurinn verður gerður á árinu 2016.

Lagður fram til kynningar tölvupóstur frá Sambandi íslenskra sveitarfélaga dagsettur 9. desember 2015 um umræðu- og upplýsingafund um niðurstöður endurmats vegna yfirfærslu þjónustu við fatlað fólk. Fundurinn verður haldinn 16. desember 2015 á Hilton Reykjavík Nordica hótelinu.

Fundargerð 23. ársþings SSNV frá 16. október 2015 lögð fram til kynningar á 723. fundi byggðarráðs 9. desember 2015.