Byggðarráð Svf. Skagafjarðar

Fundargerð 59. fundar fræðslunefndar lögð fram til afgreiðslu á 521. fundi byggðarráðs eins og einstök erindi bera með sér. Afgreiðsla 59. fundar fræðslunefndar staðfest á 521. fundi byggðarráðs með þremur atkvæðum.

Erindi frá Bílaklúbbi Skagafjarðar, þar sem sótt er um leyfi til að halda rallýkeppni, laugardaginn 24. júlí 2010. Eknar verða sérleiðirnar Ásgarður - Bakki, Mælifellsdalur og Nafir.

Byggðarráð samþykkir erindið fyrir sitt leyti svo fremi að öll önnur tilskilin leyfi fáist frá hlutaðeigandi aðilum og öllum reglum verði framfylgt.

Lagt fram erindi frá sýslumanninum á Sauðárkróki, þar sem óskað er umsagnar um umsókn Valgeirs Þorvaldssonar um rekstrarleyfi fyrir Prestbakka, Suðurbraut 27, Hofsósi - Íbúðir flokkur II.

Byggðarráð gerir ekki athugasemdir við umsóknina.

Lagt fram erindi frá sýslumanninum á Sauðárkróki, þar sem óskað er umsagnar um umsókn Valgeirs Þorvaldssonar um rekstrarleyfi fyrir Sunnuberg, Suðurbraut 8, Hofsósi - Gistiheimili flokkur II.

Byggðarráð gerir ekki athugasemdir við umsóknina.

Lögð fram tillaga um að þeim sveitarstjórnarmönnum sem vilja, gefist kostur á að kaupa fartölvur út á samning sveitarfélagsins. Sveitarfélagið greiði þriðjung af verði þeirra og sá kostnaður færður á málaflokk 2010.

Byggðarráð samþykkir tillöguna.

Sveitarfélagið hefur boðið vinabæjum sínum, Espoo, Kongsberg, Kristianstad, Köge til vinabæjamóts árið 2011.

Byggðarráð samþykkir að mótið verði haldið dagana 15. og 16. júní 2011 og felur sviðsstjóra markaðs- og þróunarsviðs að sjá um undirbúning þess.

Að beiðni Sigurjóns Þórðarsonar var rætt um ástand Sundlaugarinnar á Hofsósi og leiðir til að hraða úrbótum. Beiðninni fylgdi eftirfarandi greinargerð:

Það er ljóst að sundlaugin er mjög vinsæl og mikið notuð enda er umhverfi og útlitshönnun stórkostleg. Á þeim skamma tíma sem sundlaugin hefur verið starfrækt hafa komið í ljós gallar á húsnæðinu m.a. biluðum blöndunartæki, kanntar á veggjum farnir að molna og hurðir og innréttingar þola illa raka. Ég hef orðið þess áskynja að margir hafa hug á að leggja leið sína í rómaða sundlaug og er miður ef að við þeim tekur nýtt mannvirki, sem augljóslega þarf að sníða af ákveðna ágalla. Ég tel vera mikilvægt að fara sem fyrst í nauðsynlegar lagfæringar m.a. til þess að sundlaugin standi undir væntingum og verði ferðaþjónustunnni Skagafirði til sóma.

Sveitarstjóri kynnti þá vinnu sem er í gangi vegna þessa máls. Byggðarráð leggur áherslu á að úrbótum verði hraðað sem kostur er.

Lagðar fram til kynningar upplýsingar frá Sambandi íslenskra sveitarfélaga um nýtingu fasteignaskattsálagningar sveitarfélaga árið 2010.

Lagt fram til kynningar bréf frá Jöfnunarsjóði sveitarfélaga þar sem tilkynnt er um endurskoðun á áætlaðri úthlutun framlags til sveitarfélaga á árinu 2010 vegna hækkunar tryggingagjaldi úr 7,0% í 8,65% á árinu 2010. Áætlað endurskoðað framlag til sveitarfélagsins árið 2010 er 21.550.680 kr. og hækkar um rúmar 3 mkr. frá fyrri áætlun.

Lagt fram til kynningar bréf frá Jöfnunarsjóði sveitarfélaga, þar sem tilkynnt er um að ekki sé búið að ljúka gerð reglna um úthlutun sérstaks viðbótarframlags að upphæð 1.000 mkr. Gert er ráð fyrir að reglurnar verið tilbúnar í september nk. og 3/4 framlagsins verði greiddur til sveitarfélaga í október og 1/3 í desember 2010.

Undir þessum dagskrárlið komu á fund byggðarráðs fulltrúar SSNV, Jón Óskar Pétursson framkvæmdastjóri, Elín R. Líndal formaður stjórnar og Ágúst Þór Bragason stjórnarmaður. Kynntu þau samtökin og þau verkefni sem þar eru unnin. Einnig sátu fundinn undir þessum dagskrárlið sveitarstjórnarmennirnir Viggó Jónsson, Bjarki Tryggvason og Sigríður Magnúsdóttir.

Fundargerð 152. fundar landbúnaðarnefndar lögð fram til afgreiðslu á 521. fundi byggðarráðs eins og einstök erindi bera með sér. Ingi Björn Árnason formaður landbúnaðarnefndar kom á fundinn og kynnti fundargerðina.

Afgreiðsla 521. fundar byggðarráðs staðfest með þremur atkvæðum.