Byggðarráð Svf. Skagafjarðar

Jón Örn Berndsen, sviðsstjóri Umhverfis- og tæknisviðs kom á fundinn undir þessum dagskrárlið og kynnti stöðu framkvæmda og þær breytingar sem gerðar hafa verið á hönnunarforsendum til hagræðingar.

Fulltrúar Sjálfseignarstofnunarinnar Hofsbótar komu á fundinn til að fara nánar yfir tilboð sitt til sveitarfélagsins varðandi íþróttahússbyggingu við sundlaugina á Hofsósi. Einnig sat Jón Örn Berndsen sviðsstjóri umhverfis- og tæknisviðs fundinn undir þessum dagskrárlið.
Byggðarráð samþykkir að skipaður verði starfshópur sem ætlað er að leggja fram nánari upplýsingar um framkvæmdina fyrir næsta eða þar næsta byggðarráðsfund, sem byggðarráð getur lagt til grundvallar afstöðu sinni til þátttöku sveitarfélagsins í verkefninu. Í starfshópnum verði formaður byggðarráðs, sveitarstjóri, sviðsstjóri umhverfis- og tæknisviðs auk fulltrúa Sjálfseignarstofnunarinnar Hofsbótar.

Lagt fram erindi frá Pegasus ehf þar sem óskað er eftir stuðningi sveitarfélagsins við gerð kvikmyndarinnar Rokland. Um er að ræða ósk um mannafla, aðstöðu og beina fjármuni.
Byggðarráð getur ekki orðið við beiðni um fjárstyrk, en heitir stuðningi við verkefnið með öðrum hætti eftir því sem aðstæður leyfa og þá í samráði við sveitarstjóra.

Lagt fram aðalfundarboð Gagnaveitu Skagafjarðar 2008. Fundurinn verður haldinn 10. júlí 2009.
Byggðarráð samþykkir að þeir sveitarstjórnarmenn sem sjá sér fært að mæta á fundinn fari hlutfallslega með atkvæði sveitarfélagsins.
Byggðarráð samþykkir að tilnefna Gísla Árnason í stjórn Gagnaveitu Skagafjarðar ehf í stað Gunnars Braga Sveinssonar.

Lögð fram tjónaskýrsla Siglingastofnunar vegna tjóns er varð á hafnarmannvirkjum sveitarfélagsins í Haganesvík, Hofsósi og Sauðárkróki í óveðri dagana 23.-27. október 2008. Jón Örn Berndsen sviðsstjóri umhverfis- og tæknisviðs sat fundinn undir þessum dagskrárlið og kynnti stöðu mála.

Lögð fram til kynningar vátryggingayfirlit Viðlagatryggingar Íslands yfir endurstofnverð veitu- og hafnarmannvirkja sveitarfélagsins pr. 1. janúar 2009.

Lagðar fram til kynningar upplýsingar um rekstur sveitarfélagsins og stofnana fyrir tímabilið janúar - maí 2009.

Lögð fram til kynningar ársskýrsla SSNV fyrir árið 2008.

Lagt fram til kynningar bréf frá Slysavarnafélaginu Landsbjörgu þar sem kynnt er gæsla björgunarsveitanna á nokkrum stöðum á hálendi Íslands tímabilið 25. júní - 10. ágúst 2009.

Lögð fram til kynningar fundargerð Skagafjarðarveitna ehf. frá 6. júlí 2009, 122. fundur.