Fjárhagsáætlun 2016

Lagðar fram forsendur fyrir fjárhagsáætlunargerð 2016-2019.

Lögð fram fjárhagsáætlun fyrir árið 2016.
Byggðarráð samþykkir framlagða fjárhagsáætlun fyrir árið 2016 og vísar henni til afgreiðslu sveitarstjórnar.

Forseti gerir tillögu um að vísa afgreiðslu málsins til liðar nr 9 "Fjárhagsáætlun 2016". Samþykkt samhljóða.

Forseti gerir tillögu um að vísa afgreiðslu málsins til liðar nr 9 "Fjárhagsáætlun 2016". Samþykkt samhljóða.

Margeir Friðriksson, sviðsstjóri stjórnsýslu- og fjármálasviðs tók til máls. Fjárhagsáætlun Sveitarfélagsins Skagafjarðar og stofnana þess fyrir árið 2016 lögð fram til fyrri umræðu. Áætlunin gerir ráð fyrir að A-hluti sveitarfélagsins verði rekinn með 168.523 þús. króna tapi. Samstæða A og B hluta verði rekin með 2.484 þús. króna rekstrarafgangi.

Forseti gerir tillögu um að vísa fjárhagsáætlun 2016 til nefnda og síðari umræðu í sveitarstjórn. Samþykkt með níu atkvæðum

Farið yfir mál vegna fjárhagsáætlunar 2016.

Afgreiðsla 715. fundar byggðaráðs staðfest á 333. fundi sveitarstjórnar 11. nóvember 2015 með átta atkvæðum.

Farið yfir gögn og upplýsingar vegna fjárhagsáætlunar 2016.

Unnið að gerð fjárhagsáætlunar fyrir árið 2016. Á fundinn komu og tóku þátt i þessum dagskrárlið, Gunnsteinn Björnsson formaður atvinnu-, menningar- og kynningarnefndar, Bjarki Tryggvason formaður félags- og tómstundanefndar, Þórdís Friðbjörnsdóttir formaður fræðslunefndar, Viggó Jónsson formaður skipulags- og bygginganefndar, Herdís Á. Sæmundardóttir sviðsstjóri fjölskyldusviðs og Margeir Friðriksson sviðsstjóri stjórnsýslu- og fjármálasviðs.

Unnið að gerð fjárhagsáætlunar fyrir árið 2016. Á fundinn komu og tóku þátt í þessum dagskrárlið, Gísli Sigurðsson formaður veitunefndar, Sigríður Magnúsdóttir formaður umhverfis- og samgöngunefndar, Viggó Jónsson formaður skipulags- og bygginganefndar, Indriði Þór Einarsson sviðsstjóri veitu- og framkvæmdasviðs, Jón Örn Berndsen skipulags- og byggingarfulltrúi og Vernharð Guðnason slökkviliðsstjóri.

Unnið við fjárhagsáætlun 2016.

Lögð fram fjárhagsáætlun fyrir árið 2016.
Byggðarráð samþykkir fyrirliggjandi fjárhagsáætlun fyrir árið 2016 með áorðnum breytingum og vísar henni til síðari umræðu í sveitarstjórn.

Forseti gerir tillögu um að vísa afgreiðslu málsins til liðar nr. 51 "Fjárhagsáætlun 2016" Samþykkt samhljóða.

Forseti gerir tillögu um að vísa afgreiðslu málsins til liðar nr. 51 "Fjárhagsáætlun 2016" Samþykkt samhljóða.

Forseti gerir tillögu um að vísa afgreiðslu málsins til liðar nr. 51 "Fjárhagsáætlun 2016" Samþykkt samhljóða.

Forseti gerir tillögu um að vísa afgreiðslu málsins til liðar nr. 51 "Fjárhagsáætlun 2016." Samþykkt samhljóða.

Forseti gerir tillögu um að vísa afgreiðslu málsins til liðar nr. 51 "Fjárhagsáætlun 2016" Samþykkt samhljóða.

Ásta Björg Pálmadóttir sveitarstjóri tók til máls og kynnti fjárhagsáætlun 2016.

Fjárhagsáætlun Sveitarfélagsins Skagafjarðar fyrir árið 2016 er lögð fram til seinni umræðu. Fjárhagsáætlunin sýnir rekstraráætlun, sjóðsstreymi og áætlaðan efnahagsreikning fyrir sveitarfélagið og stofnanir þess. Áætlun ársins gerir ráð fyrir að rekstrartekjur Sveitarfélagsins Skagafjarðar nemi 4.422 m.kr. hjá samstæðunni í heild, A- og B hluta, þar af eru rekstrartekjur A- hluta áætlaðar 3.801 m.kr. Rekstrargjöld án fjármagnsliða eru áætluð 4.067 m.kr., þ.a. A hluti 3.680 m.kr. Rekstrarafgangur A og B hluta án afskrifta og fjármagnsliða er áætlaður 519 m.kr, afskriftir nema 164 m.kr. og fjármagnsgjöld umfram fjármunatekjur nema 302 m.kr., rekstrarniðurstaða samstæðunnar í heild A og B hluta er áætluð jákvæð samtals með 53 m.kr. í rekstrarafgang. Rekstrarafgangur A hluta án afskrifta og fjármagnsliða er 220 m.kr, afskriftir nema 100 m.kr., fjármagnsgjöld umfram fjármunatekjur nema 221 m.kr. Rekstrarniðurstaða A hluta sveitarsjóðs er því áætluð neikvæð um 101 m.kr.
Eignir Sveitarfélagsins Skagafjarðar eru áætlaðar í árslok 7.790 m.kr., þ.a. eignir A hluta 5.988 m.kr. Skuldir og skuldbindingar eru áætlaðar í árslok 6.046 m.kr., þ.a. hjá A hluta 5.076 m.kr. Eigið fé er áætlað 1.744 m.kr hjá samstæðunni og eiginfjárhlutfall því 0,22. Eigið fé A hluta er áætlað 911 m.kr. og eiginfjárhlutfall 0,15. Ný lántaka er áætluð 850 m.kr. hjá samstæðunni í heild og að afborganir eldri lána og skuldbindinga verði um 738 m.kr. Reiknaðar lífeyrisskuldbindingar eru 1.031 m.kr. hjá samstæðu, þar af 940 m.kr. hjá A-hluta. Skuldahlutfall samstæðunnar er áætlað 137%.
Áætlunin gerir ráð fyrir að veltufé frá rekstri A - hluta verði 153 m.kr., og veltufé frá rekstri samstæðunnar A og B hluta verði samtals 376 m.kr. Þá er gert er ráð fyrir að handbært fé í árslok verði 132 m.kr. hjá samstæðunni í heild.

Gréta Sjöfn Guðmundsdóttir kvaddi sér hljóðs.
Bókun oddvita Skagafjarðarlistans vegna afgreiðslu fjárhagsáætlunar 2016.

Fjárhagsáætlun 2016 hefur verið unnin í ágætu samstarfi allra flokka sem sæti eiga í sveitarstjórn Sveitarfélagsins Skagafjarðar og hefur Skagafjarlistinn tekið þátt í því að setja sitt mark á áætlunina.
Fram kemur að rekstrarafgangur samstæðunnar sýnir hagnað en A- hluti sveitarsjóðs sýnir tap, er það ekki ásættanlegt til lengri tíma og leggja þarf áherslu á leiðrétta það á komandi árum. Sjá má að það er gert ráð fyrir því í þriggja ára áætlun 2017-2019
Það má ekki gleyma því að fjárhagsáætlun er ekki bara rammi um útgjöld og tekjur, heldur er hún stefna um þjónustu og framkvæmdir og leggur línurnar fyrir það öryggi sem börn og fölskyldur ásamt fyrirtækjum í sveitarfélaginu búa við næsta árið.
Skagafjarðarlistinn leggur áherslu á hófsemi í gjaldskrám sveitarfélagsins en ljóst var við áætlunargerðina að gera þurfti ráð fyrir gjaldskrárhækkunum til þess að viðhalda þjónustu og þjónustustigi sveitarfélagsins en gætt var að hækkanir yrðu ekki umfram verðlags -og kjarasamningshækkana.

Skagafjarðarlistinn lagði áherslu á að áfram yrði haldið með vinnu við að færa starfssemi leikskólans Birkilundar undir sama þak og grunnskólann í Varmahlíð ásamt því að leysa biðlista við leikskólann og er gert ráð fyrir hvoru tveggja í áætluninni.
Skagafjarðarlistinn leggur áherslu á sorpflokkun í dreifbýli og fagnar því að gert er ráð fyrir því að koma á sorpflokkun í Hjaltadal og Viðvíkursveit á árinu.

Skagafjarðarlistinn leggur áherslu á framkvæmdir við sundlaug Sauðárkróks og lýsir ánægju með að það er gert ráð fyrir því í áætluninni.
Skagafjarðarlistinn tekur undir viðhalds ? og framkvæmdaáætlun þar sem m.a. kemur fram að betrumbæta á umhverfi við gámastöðvar, tryggja betur umferðaröryggi barna svo sem með umferðaljósum við Árskóla og göngustíg í Hofsósi, fjármagn áætlað til að undirbúa bætta íþróttaaðstöðu við grunnskólann á Hofsósi, nýjan kaldavatnstank á Sauðárkróki svo eitthvað sé nefnt.

Þrátt fyrir það sem hér hefur verið tíundað höfum við í Skagafjarðarlistanum áhyggjur af tekjuforsendum sveitarfélagsins á komandi árum, ekki síst þar sem íbúum og ríkisstörfum hefur fækkað. Áfram þarf því að takast á við reksturinn af ábyrgð og fylgja eftir langtímaáætlunum um lækkun skuldahlutfalls og hallalausan rekstur.

Skagafjarðarlistinn skorar á meirihlutann að hefja vinnu starfshóps til að vinna innkaupareglur fyrir sveitarfélagið en það er mikilvægur þáttur í því að tryggja jafnræði fyrirtækja við innkaup sveitarfélagsins og til að stuðla að hagkvæmni í rekstri sveitarfélagsins með virkri samkeppni. Ég vil minna á að Sveitarstjórn Sveitarfélagsins Skagafjarðar hefur í tvígang samþykkt að koma á starfshópi til að vinna að innkaupareglum fyrir sveitarfélagið, fyrst árið 2013 og nú árið 2015.
Skagafjarðarlistinn leggur áherslu á að farið verði í markvissa vinnu til að efla leigumarkað í Skagafirði, en öflugur leigumarkaður er ein forsenda þess að fólk og þá sér í lagi ungt fólk geti flutt til og sest að í sveitarfélaginu.

Framundan er vinna við að sækja á ríkisvaldið og ná til baka fyrri styrk í allri opinberri þjónustu í héraði. Snúa við neikvæðri íbúaþróun og stuðla að fjölgun íbúa og atvinnutækifæra svo sem með því að tryggja rétt íbúa sveitarfélagsins til að nýta nálæg fiskimið. Leggja þarf áherslu á öfluga kynningu á sveitarfélaginu Skagafirði sem ákjósanlegan kost til búsetu og starfa. Skagafjarðarlistinn er reiðubúin til þess að koma að þessari vinnu með opnum huga og ábyrgð.

Undirrituð mun greiða atkvæði með framlagðri fjárhagsáætlun.

Starfsfólk sveitarfélagsins eru færðar þakkir fyrir góða og árangursríka vinnu við að ná fram sparnaði og auknu hagræði í rekstri. Að lokum þakka ég fyrir góða samvinnu og samstarf fulltrúa í nefndum og ráðum sveitarfélagsins. Íbúum sveitarfélagsins sendi ég góðar óskir um gleðileg jól og farsæld á komandi ári.
Gréta Sjöfn Guðmundsdóttir, oddviti Skagafjarðarlistans.

Bjarni Jónsson tók til máls og lagði fram eftirfarandi bókun.

Sveitarstjórn er samstíga í meginatriðum um fjárhagsáætlun ársins 2016. Ekki er gert ráð fyrir miklum breytingum á rekstrareiningum eða þjónustu sveitarfélagsins. Ráðist var í umfangsmiklar hagræðingaraðgerðir árið 2012 sem öll sveitarstjórn stóð sameiginlega að. Skiluðu þær aðgerðir umtalsverðum árangri fyrir rekstur sveitarfélagsins og stofnanna þess, án þess að dregið væri úr þjónustu eða auknar álögur settar á íbúa. Ljóst er af framlagðri fjárhagsáætlun ársins 2016, að aftur þarf að taka upp þráðinn varðandi bættan rekstur sveitarfélagsins og sparnaðaraðgerðir, því núverandi rekstrarhalli er óviðunandi. Á heildina litið er enn fylgt stefnumörkun meirihluta síðustu sveitarstjórnar sem kynnt var við upphaf kjörtímabilsins 2010-2014 m.a um þjónustu, framkvæmdir og uppbyggingu innviða og er það vel. Nýr meirihluti sveitarstjórnar hefur hinsvegar ekki enn kynnt stefnumörkun sína fyrir sveitarfélagið eða sett fram heildstæða stefnu um forgangsverkefni og áherslur á yfirstandandi kjörtímabili.

VG og óháðir leggja áherslu á að sveitarfélagið bjóði upp á góða og ódýra þjónustu við börn og barnafólk og standa því til að mynda ekki að þeim gjaldskrárhækkunum sem meirihlutinn leggur til á leikskólagjöldum og fæðisgjöldum barna á leikskóla og grunnskólaaldri. Gert er ráð fyrir að farið verði í framkvæmdir við Sundlaug Sauðárkróks og fleiri verkefni sem VG og óháðir hafa lagt áherslu á og barist fyrir. Haldið verður áfram að bæta útvistarsvæðið í Litla Skógi, unnið verður áfram að stígagerð, að bæta umferðaröryggi við gönguleiðir barna og farið verður yfir valkosti til að bæta íþróttaaðstöðu grunnskólabarna á Hofsósi svo fátt eitt sé nefnt.

Þunginn af fjárhagsáætlunarvinnu ársins 2016 hefur að langmestu leyti hvílt á herðum sveitarstjóra og fjármálastjóra ásamt sviðstjórum og forsvarsfólki einstakra rekstrareininga sveitarfélagsins. Umgjörð um vinnslu fjárhagsáætlunar hefur undanfarin ár orðið enn markvissari og skýrari og er það ekki síst að þakka góðri vinnu lykilstjórnenda. Þó fyrir liggi að framundan sé að bæta verði rekstrarstöðu sveitarfélagsins og núverandi meirihluti sveitarstjórnar hafi ráðið ferðinni í tillögugerð um gjaldskrár, er fjárhagsáætlun ársins 2016 í meginatriðum í samræmi við stefnu og áherslur VG og óháðra. Af framansögðu greiðir fulltrúi VG og óháðra atkvæði með framlagðri fjárhagsáætlun fyrir Sveitarfélagið Skagafjörð og stofnanir þess.
Að lokum eru sveitarstjóra, fjármálastjóra og öðru starfsfólki sveitarfélagsins færðar þakkir fyrir gott verk við vinnslu og framlagningu fjárhagsáætlunar.
Bjarni Jónsson, V- lista

Stefán Vagn Stefánsson tók til máls og lagði fram bókun.

Það er ánægulegt að leggja fram fjárhagsáætlun fyrir árið 2016 sem gerir ráð fyrir rekstrarafgangi af samstæðureikningi sveitarsjóðs að upphæð 519 milljónir fyrir afskriftir og fjármagnsliði. Rekstrarafgangur samstæðunnar í heild A- og B hluta er áætluð samtals 53 milljónir. Ef áætlanir ganga eftir verður árið 2016 fimmta árið í röð sem gert verður upp með jákvæðri rekstrarniðurstöðu hjá Sveitarfélaginu Skagafirði, en slíkur árangur hefur ekki áður náðst í sögu þess. Óhætt er að segja að ákveðinn stöðuleiki hafi náðst í reksturinn og ber að þakka það ábyrgri fjármálastjórn og aðhaldi í rekstri undanfarinna ára. Einnig ber að þakka starfsmönnum sveitarfélagsins en ljóst er að án samstillts átaks þeirra hefði sá árangur ekki náðst líkt og rekstur undanfarinna ára ber með sér sem og sú áætlun sem lögð er fram nú. Mikilvægt er að áfram verði haldið á þeirri braut og aðhalds gætt í rekstri en ljóst er að tap á A-hluta sveitarsjóðs þarf að leiðrétta á komandi árum.

Miklar launahækkanir höfðu áhrif á áætlunina en hækkanir launa á milli áætlana 2014 og 2016 eru rúmar 333 milljónir króna. Það er gleðilegt að geta kynnt fjárhagsáætlun með viðlíka rekstrarafgangi og gert er ráð fyrir hér þrátt fyrir það.

Í fjárhagsáætlun fyrir árið 2016 er miðað við að þar sem gjaldskrár væru hækkaðar yrðu þær hækkanir ekki umfram verðlags- og kjarasamningshækkanir. Það er því ljóst að Sveitarfélagið Skagafjörður verður áfram með einhver lægstu gjöld í leik- og grunnskólum landsins sem og að orkukostnaður verður áfram hvað lægstur á íbúa í Skagafirði. Afar mikilvægt er að hafa þau markmið uppi þegar framtíðaruppbygging svæðisins er höfð í huga. Mikilvægt er að halda þannig á málum að eftirsóknarvert sé fyrir fólk að setjast að í Skagafirði. Frá þeirri stefnu má ekki kvika.

Gert er ráð fyrir að veltufé frá rekstri samstæðunnar verði rúmar 376 milljónir á árinu og framkvæmt verði fyrir 371 milljón. Stærsta fjárfestingaverkefnið á næsta ári verða framkvæmdir við Sundlaug Sauðárkróks. Samkvæmt sveitarstjórnarlögum má skuldahlutfall sveitarsjóðs ekki fara yfir 150% af tekjum og höfðu ýmsir áhyggjur af því að með þeim framkvæmdum sem ráðist var í á síðasta kjörtímabili myndi sveitarstjóður rjúfa það viðmið. Gerir fjárhagsáætlun 2016 hins vegar ráð fyrir því að skuldahlutfallið verði 137%, en þegar búið er að draga frá lífeyrisskuldbindingu að hluta og skuldir orku- og veitufélaga líkt og lögin gera ráð fyrir, er skuldahlutfall samstæðunnar um 120% sem er vel innan allra marka.

Sú áætlun sem lögð er fram nú var unnin í samvinnu allra flokka, bæði í nefndum sveitarfélagsins og í byggðarráði sem er mikilvægt og ber að þakka fyrir þá vinnu.

Með slíkar kennitölur í rekstri er ljóst að áfram er hægt að halda áfram á þeirri braut sem mörkuð hefur verið til hagsældar og uppbyggingar innviða sveitarfélagsins.

Við óskum íbúum Sveitarfélagsins Skagafjarðar til hamingju með þá áætlun sem hér er lögð fram og óskum öllum íbúum gleðilegra jóla og farsældar á komandi ári.

Stefán Vagn Stefánsson, fulltrúi Framsóknarflokks
Sigríður Magnúsdóttir, fulltrúi Framsóknarflokks
Bjarki Tryggvason, fulltrúi Framsóknarflokks
Viggó Jónsson, fulltrúi Framsóknarflokks
Þórdís Friðbjörnsdóttir, fulltrúi Framsóknarflokks
Sigríður Svavarsdóttir, fulltrúi Sjálfstæðisflokks
Gunnsteinn Björnsson, fulltrúi Sjálfstæðisflokks

Þórdís Friðbjörnsdóttir tók til máls, þá Gunnsteinn Björnsson og Sigríður Svavarsdóttir, með leyfi varaforseta.

Fjárhagsáætlun 2016 borin upp til afgreiðslu sveitarstjórnar og samþykkt með níu atkvæðum.