Byggðarráð Svf. Skagafjarðar

Á fund nefndarinnar mætti ráðgjafahópur sem settur hefur verið á laggirnar til þess að fara yfir rekstur sveitarfélagsins og stofnana þess. Hópinn skipa Jón E. Friðriksson, Guðmundur B. Eyþórsson og Guðrún Lárusdóttir.

Byggðarráð felur sveitarstjóra að kalla hópinn saman til fyrsta fundar.

Gréta Sjöfn Guðmundsdóttir óskar bókað:

"Samfylkingin telur mikilvægt að ráðgjafahópnum verði sett erindisbréf þar sem fram komi markmið nefndarstarfsins, vinnutilhögun og skipunartími. Kostnaðaráætlun liggur ekki fyrir, en hópurinn er tekin til starfa. Þetta ber ekki vott um góða stjórnsýslu."

Á fund byggðarráðs kom Geir Eyjólfsson, formaður körfukn.deildar Umf. Tindastóls og Gunnar Gestsson formaður aðalstjórnar Umf. Tindastóls til að ræða um möguleika á endurnýjun gólfefnis í sal Íþróttahússins á Sauðárkróki. Einnig sátu fundinn undir þessum dagskrárlið Ingvar Páll Ingvarsson frá tæknideild sveitarfélagsins og María Björk Ingvadóttir frístundastjóri og Sævar Pétursson íþróttafulltrúi.

Lagt fram til kynningar bréf frá vinabæ Sveitarfélagsins Skagafjarðar í Finnlandi, Esbo (Espoo), þar sem Marketta Kokkonen borgarstjóri tilkynnir að hún hafi látið af störfum um síðustu áramót, eftir að hafa gegnt stöðunni í 15 ár. Eftirmaður hennar er Jukka Mäkenlä.

Lagt fram til kynningar bréf frá velferðarráðuneytinu þar sem velferðarráðherra beinir þeim tilmælum til sveitarstjórna að þær tryggi að einstaklingar hafi að lágmarki sambærilega fjárhæð og atvinnuleysisbætur til framfærslu á mánuði.

Byggðarráð samþykkir að vísa erindinu til félags- og tómstundanefndar til umsagnar.