Byggðarráð Svf. Skagafjarðar

Indriði Einarsson sviðsstjóri veitu- og framkvæmdasviðs kom á fundinn og fór yfir framkvæmdir og framkvæmdaáætlun ársins 2013.

Lagt fram kauptilboð í fasteignina Grenihlíð 32, 213-1643.
Byggðarráð samþykkir að sveitarstjóri gangi frá kaupum á fasteigninni Grenihlíð 32, 213-1643 í samræmi við fyrirliggjandi kauptilboð.

Byggðarráð samþykkir að fasteignin Kvistahlíð 19, 213-1951 verði seld ef viðunandi kauptilboð fæst. Sveitarstjóra falið að auglýsa fasteignina til sölu.

Byggðarráð samþykkir að fasteignin Víðigrund 28, 2.hv, 213-2420 verði seld ef viðunandi kauptilboð fæst. Sveitarstjóra falið að auglýsa fasteignina til sölu.

Byggðarráð samþykkir að breyta innheimtuferli á kröfum sveitarfélagsins á þann veg, að tímabilið frá eindaga þar til krafa fer til milliinnheimtu, lengist um 10 daga og verður héðan í frá 30 dagar.

Sigurjón Þórðarson óskar bókað:
Þó svo að þetta skref sem byggðarráð tekur í dag til að koma til móts við skuldsett heimili sé ekki stórt, þá getur það reynst mikilsvert. Það er óneitanlega lóð á vogarskál ríkisstjórnar Sigmundar Davíðs Gunnlaugssonar að því takmarki að róttækasta skuldaleiðrétting veraldar nái fram að ganga núna í nóvember.

Það er ánægjulegt að sjá að byggðarráð er sammála um niðurstöðu í þessu máli, sem vonandi á eftir að koma íbúum sveitarfélagsins vel.
Stefán Vagn Stefánsson
Bjarni Jónsson
Jón Magnússon
Sigurjón Þórðarson
Gréta Sjöfn Guðmundsdóttir

Lagt fram aðalfundarboð Versins Vísingagarða ehf. þann 8. október 2013 í Verinu, Háeyri 1, Sauðárkróki.
Byggðarráð samþykkir að Bjarni Jónsson fari með atkvæðisrétt sveitarfélagsins á fundinum.

Fasteign Kiwanisklúbbsins Drangeyjar, Eyrarvegur 14 (213-1397), Sauðárkróki. Erindið áður tekið fyrir á 634. fundi byggðarráðs, 29. ágúst 2013.
Lagt fram gagntilboð frá Kiwanisklúbbnum Drangey.
Byggðarráð samþykkir fyrirliggjandi gagntilboð og felur sveitarstjóra að auglýsa húsnæði til sölu. Eignin skal seld til brottflutnings í núverandi ástandi.

Lögð fram drög að fjárhagsramma fyrir rekstur sveitarfélagsins og stofnana á árinu 2014. Gert er ráð fyrir jákvæðri niðurstöðu í rekstri sveitarfélagsins í heild.
Byggðarráð samþykkir fyrirlögð drög og vísar þeim til nefnda til frekari umfjöllunar.

Samþykktir Sveitarfélagsins Skagafjarðar sem samþykktar voru á 303. fundi sveitarstjórnar með breytingum sem voru staðfestar á 305. fundi sveitarstjórnar voru sendar til staðfestingar ráðherra. Gerðar voru athugasemdir við þær af hálfu innanríkisráðuneytisins. Á þessum fundi eru lagðar fram endurbættar samþykktir fyrir Sveitarfélagið Skagafjörð þar sem tillit hefur verið tekið til athugasemda varðandi 8.gr.
Byggðarráð samþykkir áorðnar breytingar og samþykktirnar í heild.
Byggðarráð samþykkir að fela sveitarstjóra að senda samþykktirnar til innanríkisráðuneytis til staðfestingar.

Lagt fram til kynningar fundarboð á ársfund Jöfnunarsjóðs sveitarfélaga 2013, sem verður haldinn 2. október 2013 á Hilton Hótel Nordica, kl. 16:00.
Ásta Björg Pálmadóttir sveitarstjóri verður fulltrúi sveitarfélagsins á fundinum.

Lögð fram til kynningar samantekt rekstrar- og útgáfusviðs Sambands íslenskra sveitarfélaga um skjalavörslu sveitarfélaga.

Lögð fram til kynningar fundargerð frá sameiginlegum fundi fulltrúa Sveitarfélagsins Skagafjarðar, Kongsberg, Köge, Kristianstad og Espoo á vinabæjamóti í Espoo síðastliðið vor.