Byggðarráð Svf. Skagafjarðar

Lögð fram drög að uppfærðri samþykkt um stjórn Sveitarfélagsins Skagafjarðar. Sesselja Árnadóttir lögfræðingur hjá KPMG tók þátt í fundinum undir þessum dagskrárlið með fjarfundabúnaði.
Byggðarráð samþykkir að vísa samþykktinni með áorðnum breytingum til fyrri umræðu í sveitarstjórn.

Byggðaráð hefur lýst vilja til að Sveitarfélagið Skagafjörður verði áfram leiðandi sveitarfélag í málefnum fatlaðs fólks á Norðurlandi vestra. Akrahreppur, Blönduósbær, Húnavatnshreppur, Skagabyggð og Sveitarfélagið Skagaströnd og hafa lýst vilja sínum til áframhaldandi samstarfs. Húnaþing vestra telur ekki forsendur til að taka afstöðu til málsins fyrr en vinnu þess hvað varðar skipulag málaflokks m.t.t. Húnaþings vestra liggur fyrir. Núverandi samstarfssamningur rann út 28. febrúar sl. eins og legið hefur fyrir frá undirritun hans 22. mars 2021.
Byggðarráð Sveitarfélagsins Skagafjarðar samþykkir að fela sveitarstjóra að senda drög að endurnýjuðum samningi á önnur sveitarfélög í Austur-Húnavatnssýslu og Skagafirði, með lengri gildistíma en í fyrri samningi, eins og ákall er uppi um. Jafnframt að senda Húnaþingi vestra boð þess efnis að kjósi sveitarfélagið að halda áfram samstarfi við önnur sveitarfélög á Norðurlandi vestra, eftir að vinnu Húnaþings vestra hvað varðar skipulag málaflokksins er lokið. Yrði það gert með sérstökum viðauka við samning hinna sveitarfélaganna á svæðinu.

Umræður fóru fram um þörf á byggingu á nýjum leikskóla á Sauðárkróki, staðarval, fólksfjölgun o.s.frv.
Byggðarráð samþykkir að vísa málinu til umfjöllunar í fræðslunefnd.

Í fjárhagsáætlun ársins 2022 er gert ráð fyrir að íbúðarhús að Sólgörðum í Fljótum, F2143858, verði selt. Samkvæmt reglum sveitarfélagsins fær leigjandi fasteignarinnar að gera kauptilboð í eignina áður en hún verður sett í almenna sölu.
Byggðarráð samþykkir að gefa leigjanda fasteignarinnar kost á því að nýta forkaupsrétt sinn.

Lagt fram fundarboð vegna aðalfundar Eyvindarstaðaheiðar ehf. þann 27. apríl 2022.
Byggðarráð samþykkir að sveitarstjóri fari með atkvæðisrétt sveitarfélagsins á fundinum.

Byggðarráð Sveitarfélagsins Skagafjarðar samþykkir að gefa sveitarstjóra og staðgengli hans fullnaðarheimild til þess að afgreiða umsóknir um tækifærisleyfi fyrir hönd sveitarfélagsins.

Lögð fram drög að reglum um úthlutun byggingarlóða í Sveitarfélaginu Skagafirði.
Byggðarráð samþykkir að vísa reglum um úthlutun byggingarlóða í Sveitarfélaginu Skagafirði til afgreiðslu sveitarstjórnar.

Lagður fram tölvupóstur dagsettur 12. apríl 2022 frá forsætisráðuneytinu. Tilkynnt er um að umsagnarfrestur í Samráðsgátt, mál nr. 74/2022, "Grænbók um mannréttindi", hafi verið framlengdur til 1. maí 2022.

Lagður fram tölvupóstur úr Samráðsgátt, dagsettur 12. apríl 2022, þar sem innviðaráðuneytið kynnir til samráðs mál nr. 79/2022, "Viltu taka þátt í að einfalda regluverk og bæta þjónustu hins opinbera?". Umsagnarfrestur er til og með 06.05.2022.