Byggðarráð Svf. Skagafjarðar

Á fund byggðarráðs mættu Páll Pálsson og Einar Gíslason forsvarsmenn Gagnaveitu Skagafjarðar ehf. ásamt Kristjáni Jónassyni, endurskoðanda hjá KPMG, til viðræðu um fjárhagsleg málefni félagsins.

Unnið með fjárhagsáætlunargögn sem vísað hefur verið til ráðsins frá nefndum.

Byggðarráð hvetur þær nefndir sem eiga eftir að skila inn fjárhagsáætlun fyrir árið 2010 að gera það hið fyrsta. Sveitarstjóra falið að vinna með sviðsstjórum, fari yfir áætlanir og fyrir næsta fundi liggi fyrir greinargerðir vegna áætlananna.

Lagt fram bréf frá félagsskapnum Maddömum sem hafa til umráða geymslu í eigu sveitarfélagsins á lóð Aðalgötu 16b. Í bréfinu er óskað eftir því geymslan verði tengd rafmagni og hitaveitu, en í dag eru þessar tengingar ekki til staðar.

Byggðarráð samþykkir að fela sveitarstjóra að ræða við bréfritara um erindið og áréttar að húsnæðið var afhent félagsskapnum til afnota endurgjaldslaust og án skuldbindinga fyrir sveitarfélagið.

Lagt fram til kynningar erindi frá allsherjarnefnd Alþingis, þar sem óskað er umsagnar um frumvarp til laga um kosningar til Alþingis (persónukjör), 102. mál. Óskað er eftir að umsögnin berist fyrir 19. nóvember 2009.