Landbúnaðar- og innviðanefnd

Lagt fram samningsform um þrifabeitarhólf innan bæjarlandsins.
Landbúnaðar- og innviðanefnd samþykkir samhljóða að fela sviðstjóra veitu- og framkvæmdasviðs og umhverfis- og landbúnaðarfulltrúa að gera skriflega samninga um þau hólf sem þykir þörf á að beita, eftir framlögðum samningsdrögum með áorðnum breytingum, við þá sem haft hafa umrædd þrifabeitarhólf til afnota á Sauðárkróki.

Landbúnaðar- og innviðanefnd samþykkir samhljóða að Gísli Jóhannsson fyrrum bóndi í Bjarnastaðahlíð segi af sér formennsku Fjallskilanefndar Hofsafréttar og er honum þakkað kærlega fyrir áratuga starf. Landbúnaðar- og innviðanefnd samþykkir samhljóða að við taki Jón Ragnar Gíslason, gangnastjóri Hofsafréttar og bóndi í Bjarnastaðahlíð.

Landbúnaðar- og innviðanefnd samþykkir samhljóða að veita 200.000 kr. af fjármunum deildar 13210 til endurbóta á Rósarétt og niðurrifs á elsta hluta hennar, sviðstjóra veitu- og framkvæmdasviðs er falið að ráða aðila til verksins. Sviðsstjóra einnig falið að leita eftir aðila eða samtökum, sem haft gætu umsjón með réttinni og 10.000 m2 hólfi við hana, svo hún megi nýtast til áningar fyrir ferðafólk með hross.

Sveitarfélagið Skagafjörður fékk 3.000.000 kr. úr Styrkvegasjóði Vegagerðarinnar fyrir árið 2024.
Landbúnaðar- og innviðanefnd samþykkir samhljóða eftirfarandi úthlutun:

Hrollleifsdalsvegur 900.000 kr.




Staðarafrétt - Þúfnavallaleið
200.000 kr.
Deildardalsafrétt - báðir dalir
500.000 kr.
Molduxaskarðsvegur 200.000 kr.
Gilsbakkavegur 700.000 kr.
Hlíðarréttarvegur - Bjarnastaðarhlíð 200.000 kr.
Kálfárdalsvegur 300.000 kr.

Landbúnaðar og innviðanefnd fagnar því að Matvælaráðherra ætli að skipa nýjan og þá smærri vinnuhóp til að meta umfang þess tjóns sem illviðrið hafði sem gekk yfir landið 3. til 8. júní s.l. og gera þá í framhaldinu tillögur um aðgerðir sem gætu komið til móts við það tjón. Eitt af fyrstu verkefnum hópsins verður að koma á skipulagðri gagnasöfnun, sem að öllum líkindum verður rafræn, en ekki liggur fyrir hvenær formleg tjónaskráning hefst. Það er því mikilvægt að bændur skrái á meðan vel og nákvæmlega hjá sér allt það tjón sem þeir tengja umræddu óveðri hvort sem það eru afföll skepna eða tjón á ræktarlöndum, túnum eða ökrum. Góð skráning er forsenda þess að bændur fái tjón sitt bætt, að því marki sem hægt verður. Landbúnaðar- og innviðanefnd vonast til að vinna nýja starfshópsins gangi hratt og vel þó ljóst sé að ekki verður hægt að leggja endanlegt mat á tjónið fyrr en að loknum smalamennskum í haust.

Rætt um öryggi fyrir gangandi vegfarendur við leikskólann Ársali eldra stig og mikilvægi þess að það verði tryggt með viðeigandi hætti.
Landbúnaðar- og innviðanefnd samþykkir samhljóða að fela sviðsstjóra veitu- og framkvæmdasviðs að koma með tillögu að framkvæmdum og kostnaðaráætlun fyrir næsta fund nefndarinnar.

Lagt var fram bréf frá Jóhannesi H. Ríkharðssyni formanni veiðifélags Miklavatns og Fljótaár í Fljótum þar sem hann lýsir áhyggjum af rísandi vatnsyfirborði Miklavatns.
Landbúnaðar- og innviðanefnd samþykkir samhljóða að fela sviðsstjóra veitu- og framkvæmdasviðs að skoða málið með landeigendum.

Landbúnaðar- og innviðanefnd tók fyrir erindi frá Helgu Rósu Guðjónsdóttur sem lýsir áhyggjum sínum vegna lausagöngu hunda við Áshildarholtsvatn á varptíma. Lausaganga hunda er bönnuð innan þéttbýlismarka en á ábyrgð hundaeiganda í dreifbýli.
Landbúnaðar- og innviðanefnd vill árétta mikilvægi þess að eigendur hunda sýni ábyrgð og tryggi að hundar valdi ekki ónæði eða skaða á dýralífi.

Nefndin fór yfir fjárhagsramma vegna málaflokks 11 umhverfismál.
Helga Gunnlaugsdóttir garðyrkjustjóri tók þátt í fundinum í gegnum fjarfundarbúnað.