Umhverfis- og samgöngunefnd Svf Skagafjarðar

Kynnt var fyrir fundarmönnum ástand Norðurgarðs á Hofsósi. Löndunarkrani er á bryggjunni og er hún aðallega notuð til löndunar, lítið er um viðlegu báta við bryggjuna.
Bryggjan, sem er um 100m að lengd, er að mestu steypt og er steypan farin að láta verulega á sjá. Á nokkrum stöðum hefur myndast holrúm undir steypta þekju og ljóst að fara verður í lagfæringar á bryggjunni.
Ástand bryggjunar var kannað í síðustu viku og teknar ljósmyndir af skemmdum.
Í kjölfarið var sent óformlegt erindi til siglingasviðs Vegagerðarinnar og hefur því verið svarað. Í svarinu er farið yfir mögulegar leiðir til viðgerða á bryggjunni og líst yfir vilja til að aðstoða við mat og undirbúning á þeim.
Sviðstjóra falið að vinna að kostnaðarmati á viðgerðum í samráði við Vegagerðina.

40. Hafnasambandsþing Hafnasambands Íslands verður haldið á Ísafirði dagana 13. og 14. október nk. og verður þingið haldið á Ísafirði að þessu sinni.
Fulltrúar Skagafjarðarhafna á þinginu verða Ásta Pálmadóttir, sveitarstjóri, Einar Ágúst Gíslason, yfirhafnavörður, Indriði Þór Einarsson, sviðstjóri veitu- og framkvæmdasviðs og Sigríður Magnúsdóttir, formaður umhverfis- og samgöngunefndar.
Yfirhafnavörður og formaður umhverfis- og samgöngunefndar fara með atkvæðisrétt fyrir hönd Skagafjarðarhafna.

Sviðstjóri fór yfir stöðu mála vegna flokkunar í dreifbýli.
Verið er að vinna í útfærslu á flokkun í dreifbýli sem tekin verður fyrir á næsta fundi.

Hafin er undirbúningsvinna vegna hönnunar á gámasvæði í Varmahlíð.
Hönnunardrög verða lögð fyrir næsta fund nefndarinnar.

Á Sauðárkróki hefur um árabil verið boðið upp á geymslustað fyrir gáma og aðra stærri hluti gegn vægu árgjaldi. Svæðið er staðsett á milli Borgarteigs og Sauðárkróksbrautar, sunnan við geymslulóð Vegagerðarinnar. Nú er svo komið að gámasvæðið hefur verið fullnýtt í nokkurn tíma og eftirspurn eftir geymslusvæði er enn til staðar. Möguleiki er að stækka núverandi svæði til suðurs um a.m.k. helming.
Nefndin leggur til að stækkun á gámasvæði verði sett inn á fjárhagsáætlun fyrir árið 2017.

Lagt var fyrir fundinn erindi frá Ó.K. Gámaþjónustu um geymslusvæði fyrir gáma upp á Gránumóum við Sauðárkrók.
Nefndin tekur jákvætt í erindið en felur sviðstjóra að kanna nánar umfang og útfærslu á geymslusvæðinu.

Lagt var fyrir fundinn erindi frá Trausta Jóel Helgasyni, formanni Húsnæðissamvinnufélags Skagafjarðar, fyrir hönd íbúa í Sauðármýri 3. Í erindinu er óskað eftir því að Sveitarfélagið gangi betur frá svæðinu í kringum Sauðá á milli Skagfirðingabrautar og Borgargerðis, sunnan við Sauðármýri 3.
Nefndin þakkar fyrir erindið og felur sviðstjóra að afmarka svæðið frekar og koma með tillögu að úrbótum fyrir gerð fjárhagsáætlunar fyrir árið 2017.