Umhverfis- og samgöngunefnd Svf Skagafjarðar

Lagt fram bréf frá Hestamannafélaginu Léttfeta dagsett 11. janúar 2009 þar sem ítrekaðar eru óskir félagsins um úrbætur í hesthúsahverfinu við Flæðagerði varðandi lýsingu, gatnakerfi og snjómokstur. Á fundi Byggðarráðs 15. janúar sl var erindinu vísað til umhverfis- og samgöngunefndar til úrlausnar. Guðmundur Sveinsson kom til fundar við nefndina vegna þessa erindis.Guðmundur lagði áherslu á að í þriggja ára fjárhagsáætlun Sveitarfélagsins verði gert ráð fyrir fjármunum til uppbyggingar og viðhalds svæðisins. Á fjárhagsáætlun þessa árs er áætlað að veita 5 milljónum til gatnagerðar á svæðinu. Þá er áformað að fara í vinnu við gerð nýs deiliskipulags fyrir svæðið.

Jón Örn gerði grein fyrir stöðu mála varðandi framkvæmdir við Suðurgarð, sem ganga samkvæmt áætlun.

Stálþil Sauðárkrókshöfn. Samþykkt að láta mynda stálþilin til að skoða ástand þeirra.

Lagt fram minnisblað frá Siglingastofnun um skemmdir sem urðu í Haganesvík, á Hofsósi og Sauðárkróki af völdum sjógangs þann 24 október 2008. Þar kemur fram skoðun Siglingastofnunarmanna að ekki sé nauðsyn að fara strax í að byggja sandfangara upp í fyrra horf. Hagkvæmast sé að viðgerð fari fram um leið og sandfangari verður lengdur. Lenging sandfangara er nú á áætlun 2010.

Um áramótin síðustu tóku gildi ákvæði laga um ábyrgð framleiðanda og innflytjenda raf- og rafeindatækja á meðhöndlun raf- og raftækjaúrgangs. Reglugerð um raf- og raftækjaúrgang lögð fram.

Lagt fram bréf Páls Dagbjartssonar varðandi reiðvegi og reiðvegamál í Skagafirði. Hvetur Páll til að Sveitarfélagið skipi starfshóp t.d. þriggja manna, sem hefði það verkefni að yfirfara reiðvegamál í héraðinu og gera tillögur til úrbóta. Óskar Páll eftir að umhverfis- og samgöngunefnd hafi forgöngu um það mál. Umhverfis- og samgöngunefnd telur ekki ástæðu til að Sveitarfélagið hafi forgöngu um stofnun slíks vinnuhóps. Eðlilegra sé að hagsmunaaðilarnir sjálfir komi sér saman og myndi slíkan hóp. Umhverfis- og samgöngunefnd bendir á að í tillögum að Aðalskipulagi Skagafjarðar er tillaga að reiðvegakerfi um héraðið.