Byggðarráð Svf. Skagafjarðar

Byggðarráð samþykkir að lóðaleiga frístundahúsa í skipulögðum sumarhúsahverfum verði óbreytt árið 2018, þ.e. 10% af lóðarhlutamati.

Lögð fram drög að samstarfssamningi milli Heilbrigðiseftirlits Norðurlands vestra og aðildarsveitarfélaga að HNv.; Húnaþing vestra, Húnavatnshreppur, Blönduósbær, Sveitarfélagið Skagaströnd, Skagabyggð, Sveitarfélagið Skagafjörður, Akrahreppur og Fjallabyggð.
Byggðarráð samþykkir framlögð drög að samstarfssamningi.

Lagður fram tölvupóstur frá nefndasviði Alþingis, dagsettur 21. desember 2017 þar sem óskað er umsagnar um frumvarp til laga um kosningar til sveitarstjórna (kosningaaldur), 40. mál. Einnig lagður fram tölvupóstur dagsettur 22. desember 2017 frá Sambandi íslenskra sveitarfélaga.

Lagður fram tölvupóstur frá nefndasviði Alþingis, dagsettur 22. desember 2017 þar sem óskað er umsagnar um frumvarp til laga um tekjustofna sveitarfélga (fasteignasjóður), 11. mál.

Lagt fram afrit af bréfi Einars Sigurjónssonar hdl. til Lögmannafélags Íslands, dagsett 13. desember 2017, varðandi erindi Dómstólasýslunnar til lögmannafélagsins um fækkun reglulegra dómþinga.
Byggðarráð þakkar Einari Sigurjónssyni hdl. fyrir erindið og tekur undir áhyggjur hans í einu og öllu.
Byggðarráð skorar á ráðherra að standa vörð um Héraðsdóm Norðurlands vestra og tryggja að tíðni reglulegra dómþinga verði ekki skert. Ljóst er að með því að fækka reglulegum dómþingum myndi þjónusta við íbúa svæðisins skerðast og er það verulega afleit byggðastefna. Samfara boðaðri eflingu dómstiga í landinu skorar byggðarráð á ráðherra að líta til að styrkja Héraðsdóm Norðurlands vestra frekar en að veikja hann.

Lagt fram kauptilboð frá Regínu Jóhannesdóttur, þar sem hún gengur að gagntilboði sveitarfélagsins vegna fasteignarinnar, Birkimelur 8a, Varmahlíð, fastanúmer 214-0786.
Byggðarráð samþykkir framlagt kauptilboð.

Sýslumörk á Skaga. Lagðar fram upplýsingar um að Ólafur Björnsson hrl. muni boða til sáttafundar í málinu fyrir hönd Sveitarfélagsins Skagafjarðar með fulltrúum Sveitarfélagsins Skagastrandar og Skagabyggðar.

Lagðar fram til kynningar upplýsingar úr rekstri sveitarfélagsins og stofnana fyrir tímabilið janúar-nóvember 2017.