Félags- og tómstundanefnd Svf. Skagafjarðar

Frístundastjóri kynnir samning milli stjórnar Golfklúbbs Sauðárkróks og Sveitarfélagsins um þátttöku í almennum rekstri klúbbsins á golfvellinum að Hlíðarenda árið 2012, sem byggður er á fyrri samningum og gert er ráð fyrir í fjárhagsáætlun ársins. Félags-og tómstundanefnd samþykkir heildarupphæð samningsins, sem nemur 2,8 milljónum króna.

Frístundastjóri kynnir tillögu að þjónustusamningi milli stjórnar Golfklúbbs Sauðárkróks um slátt á íþróttaleikvanginum á Sauðárkróki sumarið 2012. Kostnaður við slátt nemur 1.386.000 . Nefndin samþykkir framlagðan samning en hann er 11% hærri en fjárhagsáætlun gerði ráð fyrir og er sú hækkun tilkomin vegna aukins kostnaðar við rekstur sláttuvélar GSS. Stjórn golfklúbbsins hefur komið þeim ábendingum á framfæri við Frístundastjóra að klúbburinn telji sig ekki geta sinnt þessum slætti áfram án hærri greiðslu sveitarfélagsins. Félags-og tómstundanefnd felur Frístundastjóra að leita allra leiða til að lækka annan rekstrarkostnað íþróttavallarins svo aukin útgjöld vegna sláttarins rúmist innan fjárhagsramma hans.

Lagður fram samningur um rekstur skíðasvæðis í Tindastóli milli Sveitarfélagsins og skíðadeildar UMF. Tindastóls. Þar skuldbindur sveitarfélagið sig til að greiða skíðadeild 8.000.000.- króna til uppbyggingar á skíðasvæðinu í ár, auk 2.000.000.-króna í rekstrarstyrk. Þá leggur sveitarfélagið til starfsmann í 8 mánuði á árinu og að greiða viðhald á troðara allt að 1,5 milljón króna. Skíðadeild skuldbindur sig til að annast rekstur skíðasvæðisins til ársloka 2012. Félags-og tómstundanefnd samþykkir samninginn fyrir sitt leyti enda rúmast hann innan fjárhagsáætlunar ársins.

Frístundastjóri kynnir bréf frá nokkrum gestum sundlaugarinnar á Hofsósi sem óska eftir að afgreiðslutími laugarinnar verði lengdur enn frekar en fjárhagáætlun gerir ráð fyrir. Frístundastjóri leggur til að sundlaugin verði opin í sumar, frá 1. maí - 31.ágúst, alla daga frá klukkan 9 - 21 og látið reyna á að rýmri opnun, meiri markaðssetning og kynning á lauginni muni skila henni enn meiri tekjum sem réttlæti lengri afgreiðslutíma. Félags-og tómstundanefnd samþykkir tillöguna. Ákveðið er að fara yfir árangur þessa markaðsátaks og áhrif á fjárhagsáætlun að loknu sumri.

Ingi Björgvin Kristjánsson sækir um f.h. Sjávarasælu að taka íþróttahúsið á Sauðárkróki á leigu fyrir sjómannadagshátíðarhöld, 2. júní n.k. Félags-og tómstundanefnd samþykkir erindið fyrir sitt leyti en minnir á að í gildi er samþykkt sveitarstjórnar frá ársbyrjun 2008 um að íþróttahúsið sé ekki leigt út undir skemmtanir sem eru fámennari en 400 manns. Þessar reglur byggja á samkeppnissjónarmiðum.

Frístundastjóri kynnir áform um öryggisráðstafanir vegna starfsemi Sumar T.Í.M. í íþróttahúsinu á Sauðárkróki í sumar, og eru tilkomin vegna fyrirhugaðra byggingaframkvæmda við íþróttahús og Árskóla. Fela þau m.a. í sér strangari reglur um aðkomu bíla að íþróttahúsinu og að foreldrum verði kynntar þær reglur. Einnig að fundað verði með verktökum þannig að allir leggist á eitt um að tryggja öryggi barna í og við þessar byggingar í sumar.

Útprentuð áætlunin lögð fram. Ákveðið að dreifa áætluninni á vinnustöðum sveitarfélagsins, sérstaklega í elstu bekkjum grunnskólanna og í FNV og á helstu samstarfsstofnunum, biðstofum, bókasöfnum og þar sem fólk safnast saman. Farið yfir framkvæmdaliði og tímasetningar. Formanni og félagsmálsatjóra falið að fylgja málinu eftir í ljósi umræðna á fundinum.

Félagsmálastjóri fer yfir framkvæmd nýrra reglna og kynnir bréf sem leigjendum hafa verið send. Jafnframt dæmi um hvernig reglurnar virka í einstökum tilvikum.

Lögð fram tillaga að endurskoðuði matsblaði sem notað er við forgangsröðun umsókna og til grundavallar mati á þörf umsækjenda fyrir félagslegt leiguhúsnæði, sbr 6. grein reglna um húsnæðismál. Tillagan samþykkt.

Félagsmálastjóri gerir grein fyrir rekstrarstöðu félagsmálalið fyrir fjóra mánuði ársins.

Samþykktar 4 umsóknir í fjórum málum, ein umsókn samþykkt að hluta og einni umsókn synjað.