Landbúnaðarnefnd Svf. Skagafjarðar

Lagður fram tölvupóstur dagsettur 20. maí 2020 frá Andrési H. Helgasyni bónda í Tungu, varðandi endurnýjun girðingar á milli Tungu og Kálfárdals. Andrés kom á fundinn til að fylgja erindi sínu eftir.
Landbúnaðarnefnd samþykkir að taka þátt í endurnýjun girðingarinnar samkvæmt girðingalögum og framkvæmdin verði á höndum Andrésar Helgasonar.

Lagður fram samningur milli Umhverfisstofnunar og Sveitarfélagsins Skagafjarðar um refaveiðar árin 2020 til 2022 ásamt áætlun sveitarfélagsins um veiði tímabilsins.
Landbúnaðarnefnd samþykkir framlagðan samning og mun halda kynningarfund með ráðnum veiðimönnum sveitarfélagsins þann 15. júní n.k.

Landbúnaðarnefnd fór yfir áætlun að úthlutun veiðikvóta til minka- og refaveiðimanna árið 2020.
Landbúnaðarnefnd samþykkir framlagða áætlun.

Lagður fram tölvupóstur dagsettur 2. mars 2020 frá Jóni Árna Friðjónssyni formanni veiðifélags Kolku og Hjaltadalsár varðandi minkaveiði í Hjaltadal.
Landbúnaðarnefnd samþykkir að fela starfsmanni nefndarinnar að kanna hvort hægt sé að fá sama veiðimanninn til að sinna öllu vatnasvæði veiðifélagsins.

Lagt fram erindi sem vísað var frá 914. fundi byggðarráðs til umsagnar. Lagður fram tölvupóstur dagsettur 16. apríl 2020 frá Valdísi Hálfdánardóttur og Rúnari Þór Númasyni þar sem þau óska eftir að kaupa eða nýta landspildu sem er norðan við Árhólsland.
Landbúnaðarnefnd leggst gegn því að landið verði selt en gerir ekki athugasemdir við að það verði leigt til landbúnaðarnota.

Lagður fram tölvupóstur dagsettur 19. mars 2020 frá Landgræðslunni. Stofnunin er að vinna ástandsmat gróðurs og jarðvegs á öllu Íslandi byggð á fyrirliggjandi gögnum. Einnig er verið að kortleggja þau svæði sem eru nýtt fyrir sauðfjárbeit og þau svæði sem ekki geta flokkast sem beitilönd. Óskað er eftir athugasemdum ef einhverjar eru.
Landbúnaðarnefnd samþykkir að fela starfsmanni nefndarinnar að senda erindið áfram til fjallskilastjóra og leggja þeim fyrir að gera athugasemdir við Landgræðsluna ef við á.

Lagt fram afrit af bréfi til Atvinnuvega- og nýsköpunarráðuneytis frá Bændasamtökum Íslands, dagsett 18. maí 2020 varðandi umsögn um fjallskilasamþykkt Skagafjarðar.
Landbúnaðarnefnd samþykkir að fela Jóhannesi H. Ríkharðssyni og Valdimar Sigmarssyni að fara yfir athugasemdirnar ásamt fulltrúa Akrahrepps.

Viðhald skilarétta rætt og samþykkt að forgangsraða uppbyggingu og viðhaldi skilarétta í Skagafirði.

Lagður fram til kynningar ársreikningur fjallskilasjóðs Hegraness fyrir árið 2019.

Lagður fram til kynningar ársreikningur fjallskilasjóðs Sauðárkróks fyrir árið 2019.

Lagður fram til kynningar tölvupóstur dagsettur 3. mars 2020 frá Umhverfisstofnun varðandi meðhöndlun úrgangs og smithættu af úrgangi vegna heimsfaraldurs COVID-19.