Byggðarráð Svf. Skagafjarðar

Byggðarráð samþykkir að hafinn verði undirbúningur að gerð fjárhagsáætlunar 2011 og stefnt að því að rammi að henni verði tilbúinn um mánaðamótin september/október 2010.

Byggðarráð samþykkir að endurskoða fjárhagsáætlun ársins 2010. Við endurskoðun áætlunarinnar skal taka inn breytingar sem orðið hafa vegna ákvarðana byggðarráðs og sveitarstjórnar á árinu, ásamt breytingum sem orðið hafa vegna ákvarðana sem teknar hafa verið af ríkisvaldinu og áhrif hafa haft á rekstur sveitarfélagsins. Ekki skulu gerðar breytingar á liðum sem lítur út fyrir að framúrkeyrsla verði á, ef ekki liggja fyrir heimildir byggðarráðs eða sveitarstjórnar.

Endurskoðun skal lokið fyrir mánaðamótin september/október 2010.

Lagt fram bréf frá Önnu Jónu Guðmundsdóttur, leigjanda Jöklatúns 22, Skr. þar sem hún annars vegar óskar eftir viðræðum um kaup á fasteigninni og hins vegar óskar eftir leyfi til að setja á eigin kostnað, rafmagnsnuddpott á lóð fasteignarinnar.

Byggðarráð gerir ekki athugasemdir við að rafmagnspotturinn verði settur á lóð Jöklatúns 22 og vísar erindinu til afgreiðslu skipulags- og byggingnefndar. Ekki hefur verið tekin ákvörðun um sölu eigna, en hafin er heildstæð skoðun á möguleikum til sölu á fasteignum sveitarfélagsins. Fram að því er þessi íbúð ekki í sölumeðferð.

Lagt fram til kynningar erindi frá mennta- og menningarmálaráðuneyti þar sem tilkynnt er að það hyggist láta gera stofnanaúttektir á þremur leikskólum og þremur grunnskólum á haustmisseri 2010, sbr.lög nr. 90/2008, 91/2008 og gildandi reglugerðir um mat og eftirlit. Auglýst er eftir sveitarfélögum sem hafa áhuga á því að fram fari úttekt á starfi leik- og/eða grunnskóla inna þeirra. Umsóknarfrestur er til 16. september nk.

Lagt fram til kynningar bréf frá Sambandi íslenskra sveitarfélaga þar sem kynnt er nýútgefin handbók um gerð skólastefnu fyrir sveitarfélög.

Lagt fram til kynningar bréf frá sýslumanninum á Sauðárkróki þar sem tilkynnt er um aðilaskipti á jörðinni Innstalandi, landnr. 145940. Seljendur eru Heimspekistofa dr. Helga Pjeturs og Jón Skagfjörð Stefánsson. Kaupendur eru 1001 minkur ehf og Pétur Ingi Grétarsson.

Lagt fram til kynningar bréf frá Þjóðskjalasafni Íslands þar sem kynnt er útgáfa á nýju leiðbeiningarriti um skjalavörslu sveitarfélaga, Handbók um skjalavörslu sveitarfélaga.

Lögð fram til kynningar skýrsla stjórnar Hafnasambands Íslands fyrir starfsárið 2009-2010.