Áform um sameiningu heilbrigðisstofnana innan heilbrigðisumdæma

Lagt fram bréf frá velferðarráðuneytinu um áform um sameiningu heilbrigðisstofnana innan heilbrigðisumdæma. Sveitarfélaginu er gefinn kostur á að tjá sig um fyrrgreind áform um sameiningu og er óskað eftir að athugasemdir eða ábendingar berist eigi síðar en 15. október n.k.
Byggðarráð vísar erindinu til umræðu og afgreiðslu á fundi sveitarstjórnar sem hefst eftir þennan fund byggðarráðs.

Forseti, Bjarni Jónsson kynnti bréf velferðarráðuneytis er varða fyrirhuguð áform um sameiningu heilbrigðisstofnanna innan heilbrigðisumdæma.
Stefán Vagn Stefánsson kvaddi sér hljóðs og kynnti ályktun sveitarstjórnar.

Sveitarstjórn Sveitarfélagsins Skagafjarðar hefur móttekið bréf velferðarráðuneytisins dags. 25. september sl., þar sem fram kemur að ráðuneytið stefni að sameiningu heilbrigðisstofnana, m.a. sameiningu 6 stofnana á Norðurlandi í eina í heilbrigðisumdæmi Norðurlands.


Sveitarstjórn Sveitarfélagsins Skagafjarðar hafnar alfarið framkomnum áformum velferðarráðuneytis um sameiningu heilbrigðisstofnana á Norðurlandi. Þá er ljóst að það framlag sem heilbrigðistofnuninni á Sauðárkróki er ætlað í fjárlögum fyrir árið 2014 mun þýða áframhaldandi niðurskurð og fækkun starfa og mikla þjónustuskerðingu fyrir íbúa héraðsins. Við slíkt verður ekki unað.
Sveitarstjórn skorar á heilbrigðisráðherra að endurskoða framkomnar hugmyndir og óskar formlega eftir viðræðum við ráðherra um yfirtöku stofnunarinnar og leiðir til að núverandi þjónusta skerðist ekki frekar en orðið er.

Sveitarstjórn Sveitarfélagsins Skagafjarðar hafnar alfarið áformum stjórnvalda og bendir á að þau gangi þvert gegn tveimur mjög viðamiklum og metnaðarfullum stefnumiðum stjórnvalda sem boðuð hafa verið og unnið að á liðnum árum. Er þar annars vegar um að ræða aukinn tilflutning verkefna frá ríki til sveitarfélaga, þ.m.t. tilfærslu heilsugæslu og öldrunarþjónustu frá ríki til sveitarfélaga til að tryggja góða þjónustu og stuðla að samþættingu nærþjónustu við íbúana og hins vegar Sóknaráætlun landshluta þar sem Norðurland vestra er skilgreint sem eitt sóknarsvæði.

Sveitarstjórn Sveitarfélagsins Skagafjarðar bendir á að enginn landshluti hafi orðið jafn illa fyrir barðinu á niðurskurði í ríkisrekstri eins og Norðurland vestra, líkt og staðfest er í nýrri skýrslu Hagfræðistofnunar Háskóla Íslands. Langverst hefur niðurskurðurinn bitnað á heilbrigðisþjónustu á svæðinu og þá ekki síst á Heilbrigðisstofnuninni á Sauðárkróki. Á sama tíma hefur ársverkum ríkisstarfsmanna fjölgað verulega á höfuðborgarsvæðinu, suðurnesjum og Suðurlandi.

Sameining heilbrigðisstofnana þvert yfir svæði sóknaráætlana er aðeins til þess fallin að skerða enn frekar þjónustu við íbúa í Skagafirði og draga úr samkeppnishæfni svæðisins. Er það þvert á stefnuyfirlýsingu ríkisstjórnarinnar sem leggur áherslu á jafnrétti til búsetu og að íbúar landsins fái notið þeirrar grunnþjónustu sem gera á kröfu um í nútímasamfélagi. Í stefnuyfirlýsingu ríkistjórnarinnar segir að unnið verði að opinberum áætlunum í samvinnu við sveitarfélögin og hlutverk þeirra aukið sem og að heimamenn komi að forgangsröðun verkefna í héraði.
Gengur það jafnframt gegn niðurstöðum um skipulag heilbrigðisþjónustu á Norðurlandi sem unnin var af stjórnendum og fagfólki á heilbrigðisstofnunum á Norðurlandi en það fagfólk telur ekki skynsamlegt að allar heilbrigðisstofnanir á Norðurlandi verði sameinaðar í eina stofnun.

Við Heilbrigðisstofnunina á Sauðárkróki er rekin saman heilsugæsla, sjúkrarými og öll hjúkrunar- og dvalarrými í umdæminu. Við stofnunina er húsnæði fyrir dagvist aldraðra sem Sveitarfélagið Skagafjörður rekur, einnig er samstarf stofnunarinnar við sveitarfélagið mikið, sem er hentugt fyrir báða aðila. Í ljósi framangreinds óskar Sveitarstjórn Sveitarfélagsins Skagafjarðar eftir viðræðum við velferðarráðuneytið um að sveitarfélagið taki við rekstri Heilbrigðisstofnunarinnar á Sauðárkróki og núverandi verkefnum hennar, samkvæmt samningi við ríkið. Verði það unnið með svipuðum hætti og gert er vegna mögulegrar yfirtöku Vestmannaeyjabæjar á heilbrigðisþjónustu í Vestmannaeyjum.

Bjarki Tryggvason
Bjarni Jónsson
Jón Magnússon
Sigríður Svavarsdóttir
Sigurjón Þórðarson
Stefán Vagn Stefánsson
Viggó Jónsson
Þorsteinn Tómas Broddason
Þórdís Friðbjörnsdóttir

Sigurjón Þórðarson, Þorsteinn Tómas Broddason, Jón Magnússon, Bjarni Jónsson með leyfi forseta, Sigurjón Þórðarson tóku til máls.

Forseti bar upp framkomna ályktun sveitarstjórnar og var hún samþykkt með níu atkvæðum.

Afgreiðsla 638. fundar byggðaráðs staðfest á 307. fundi sveitarstjórnar með níu atkvæðum.

Byggðarráð Sveitarfélagsins Skagafjarðar skorar á heilbrigðisráðherra að svara erindi er sveitarfélagið sendi ráðherra þann 11. október 2013 vegna fyrirhugaðra sameininga heilbrigðisstofnana á Norðurlandi og ósk sveitarstjórnar um viðræður um yfirtöku Heilbrigðisstofnunarinnar Sauðárkróki. Byggðarráð ítrekar andstöðu sína við fyrirhugaðar sameiningar og hvetur ráðherra til samráðs við hlutaðeigandi.

Sigurjón Þórðarson sveitarstjórnarfulltrúi leggur fram eftirfarandi bókun.
Það algera áhugaleysi sem ráðherrar í ríkisstjórn Íslands undir forystu Framsóknarflokksins sýna málefnum Heilbrigðisstofnunarinnar á Sauðárkróki er vægast sagt sláandi. Fyrir síðustu Alþingiskosningar blésu þingmenn núverandi stjórnarflokka sig út og þóttust vera á móti niðurskurði og vanhugsuðum skipulagsbreytingum HS. Núna eftir Alþingiskosningar þá heyrist ekki múkk frá fyrrgreindum þingmönnum sem nú skarta sumir hverjir ráðherranafnbót, þrátt fyrir að það vofi yfir stofnuninni að vera lögð niður í núverandi mynd.


Afgreiðsla 647. fundar byggðaráðs staðfest á 310. fundi sveitarstjórnar með níu atkvæðum.

Byggðarráð Sveitarfélagsins Skagafjarðar ítrekar ósk sína til heilbrigðisráðherra um svör við erindum sem send voru 11. október 2013 og 9. janúar 2014. Þar mótmælti sveitarfélagið framkomnum hugmyndum um sameiningar heilbrigðisstofnana innan heilbrigðisumdæma og óskaði eftir viðræðum við ráðuneytið um að sveitarfélagið yfirtæki rekstur stofnunarinnar með samningi við ríkið.
Með öllu er ólíðandi að erindum sé ekki svarað og skorar byggðarráð á heilbrigðisráðuneytið að svara erindi sveitarfélagsins og koma á samráðsvettvangi til lausnar málsins hið fyrsta.
Heilbrigðisstofnunin á Sauðárkróki er Skagfirðingum hjartfólgin og ein af grunnstoðum samfélagsins í Skagafirði. Heilbrigðisstofnunin Sauðárkróki er sú heilbrigðisstofnun sem hvað mest hefur þurft að skera niður þjónustu frá árinu 2008 og nú er svo komið að ekki verður lengra gengið. Afar brýnt er að ríkið og sveitarfélagið taki höndum saman með það að markmiði að verja og efla þá þjónustu sem stofnunin veitir í dag.
Stefán Vagn Stefánsson
Bjarni Jónsson
Jón Magnússon
Sigurjón Þórðarson
Gréta Sjöfn Guðmundsdóttir

Stefán Vagn Stefánsson ítrekar bókun frá 649.fundi byggðarráðs, þann 30.janúar sl.

Sveitarstjórn Sveitarfélagsins Sveitarfélagsins Skagafjarðar ítrekar ósk sína til heilbrigðisráðherra um svör við erindum sem send voru 11. október 2013 og 9. janúar 2014. Þar mótmælti sveitarfélagið framkomnum hugmyndum um sameiningar heilbrigðisstofnana innan heilbrigðisumdæma og óskaði eftir viðræðum við ráðuneytið um að sveitarfélagið yfirtæki rekstur stofnunarinnar með samningi við ríkið.
Með öllu er ólíðandi að erindum sé ekki svarað og skorar byggðarráð á heilbrigðisráðuneytið að svara erindi sveitarfélagsins og koma á samráðsvettvangi til lausnar málsins hið fyrsta.
Heilbrigðisstofnunin á Sauðárkróki er Skagfirðingum hjartfólgin og ein af grunnstoðum samfélagsins í Skagafirði. Heilbrigðisstofnunin Sauðárkróki er sú heilbrigðisstofnun sem hvað mest hefur þurft að skera niður þjónustu frá árinu 2008 og nú er svo komið að ekki verður lengra gengið. Afar brýnt er að ríkið og sveitarfélagið taki höndum saman með það að markmiði að verja og efla þá þjónustu sem stofnunin veitir í dag.

Stefán Vagn Stefánsson
Bjarki Tryggvason
Sigríður Magnúsdóttir
Viggó Jónsson
Bjarni Jónsson
Jón Magnússon
Sigríður Svavarsdóttir
Sigurjón Þórðarson
Gréta Sjöfn Guðmundsdóttir

Sigurjón Þórðarson og Gréta Sjöfn Guðmundsdóttir kvöddu sér hljóðs, þá Bjarni Jónsson með leyfi varaforseta, Jón Magnússon, Sigurjón Þórðarson, Gréta Sjöfn Guðmundsdóttir, Stefán Vagn Stefánsson, Sigurjón Þórðarson, Stefán Vagn Stefánsson og Sigurjón Þórðarson og Jón Magnússon.

Afgreiðsla 649. fundar byggðaráðs staðfest á 311. fundi sveitarstjórnar þann 12.febrúar 2014 með níu atkvæðum.

Formaður byggðarráðs, Stefán Vagn Stefánsson skýrði frá fundi sem fulltrúar sveitarfélagins áttu með velferðarráðherra nýlega um Heilbrigðisstofnunina Sauðárkróki.
Byggðarráð samþykkir að fela sveitarstjóra að fá Hafstein Sæmundsson, forstjóra Heilbrigðisstofnunarinnar Sauðárkróki til fundar við byggðarráð til að ræða málefni stofnunarinnar.

Lagt fram bréf frá velferðarráðuneytinu, dagsett 26. febrúar 2014 varðandi viðræður um rekstur Heilbrigðisstofnunarinnar Sauðárkróki. Ráðuneytið hefur fallist á að hefja viðræður við sveitarafélagið um hugsanlega yfirtöku þess á rekstri Heilbrigðisstofnunarinnar Sauðárkróki, að hluta eða öllu leyti, með rekstrarsamningi við Sjúkratryggingar Íslands.
Byggðarráð Sveitarfélagsins Skagafjarðar óskar eftir fundi með heilbrigðisráðherra vegna mögulegrar yfirtöku sveitarfélagsins á rekstri heilbrigðisstofnunarinnar með samningi við ríkið og taka ákvörðun um framhaldið.

Afgreiðsla 653. fundar byggðaráðs staðfest á 312. fundi sveitarstjórnar 20. mars 2014 með níu atkvæðum.

Afgreiðsla 655. fundar byggðaráðs staðfest á 312. fundi sveitarstjórnar 20. mars 2014 með níu atkvæðum.

Byggðarráð samþykkir að fela sveitarstjóra að fá sérfræðing til viðræðna við ráðið um aðstoð við sveitarfélagið í samningaviðræðum við ríkið um framtíð Heilbrigðisstofnunarinnar Sauðárkróki.

Afgreiðsla 656. fundar byggðaráðs staðfest á 313. fundi sveitarstjórnar 9. apríl 2014 með níu atkvæðum.