Umhverfis- og samgöngunefnd Svf Skagafjarðar

Hallbjörn Ægir Björnsson frá Siglingaklúbbnum Drangey kom á fund nefndarinnar og kynnti hugmyndir klúbbsins um uppbyggingu við smábátahöfnina. Byggðarráð hefur samþykkt að hús við Eyrarveg 14, sem áður var í eigu Kiwanisklúbbsins Drangey, verði flutt að smábátahöfninni og siglingaklúbbnum verði veitt afnot af húsinu gegn því að öll tilskilin leyfi fáist.
Nefndin tekur mjög vel í hugmyndir klúbbsins og felur sviðstjóra að vinna að umsókn til skipulags- og bygginganefndar varðandi flutning hússins.

Lögð var fram til kynningar samþykkt Skipulags- og byggingarnefdnar á erindi varðandi stofnun lóðar og uppsetningu spennistöðvar á lóðinni við Háeyri 2. Stærð lóðarinnar er 42m2 og mun RARIK koma upp spennistöð á lóðinni. Uppsetning spennistöðvarinnar er nauðsynleg til að anna aukinni raforkunotkun skipa í Sauðárkrókshöfn.

Lagt fram til kynningar.

Lagt var fyrir fundinn erindi frá landeigendum við Höfðavatn á Höfðaströnd. Í erindinu kemur fram að í aftakaveðri þann 7. desember 2015 hafi há sjávarstaða og mikil ölduhæð gert það að verkum að Bæjarmöl rofnaði á um 70m kafla og síðan þá hafi sjór borist óhindrað inn í Höfðavatn. Skarðið hefur síðan breikkað stöðugt og er nú orðið 170m breitt. Í erindinu óska landeigendur eftir stuðningi Sveitarfélagsins upp á 1 milljón króna vegna tilfærslu á efni á Bæjarmöl til þess að loka skarðinu. Heildarkostnaður vegna verksins er áætlaður 6,5 til 7 milljónir.
Nefndin tekur jákvætt í erindið og vísar því til byggðarráðs þar sem ekki er gert ráð fyrir verkefninu í fjárhagsáætlun.

Lagðar voru fyrir fundinn teikningar frá Verkfræðistofunni Stoð ehf. vegna sorpmóttökusvæðis í Varmahlíð ásamt kostnaðaráætlun verksins. Hönnun gerir ráð fyrir að á svæðinu verði 6 opnir gámar fyrir sorp og fleiri minni gámar fyrir spilliefni, rafgeyma, raftæki o.fl. Steyptir verða stoðveggir við gáma til að auðvelda losun í þá. Gert er ráð fyrir að svæðið verði afgirt og læst en opið á fyrirfram ákveðnum tímum. Einn gámur fyrir almennt óflokkað heimilissorp verði aðgengilegur utan opnunartíma.
Sviðsstjóra er falið að bjóða verkið út þegar útboðsgögn liggja fyrir.

Lögð voru fyrir fundinn útboðsgögn vegna gatnagerðar í iðnaðarhverfi á Sauðárkróki. Um er að ræða hliðargötu við Borgarflöt ásamt framlengingu á Borgarlandi. Sviðsstjóra er falið að bjóða út verkið.

Lagðar voru fyrir fundinn til kynningar tillögur að skipulagi á útivistarsvæði í og við Sauðárgil á Sauðárkróki ásamt frumhugmyndum af útikennslusvæði neðarlega í gilinu. Tillögurnar eru unnar af Arnari Birgi Ólafssyni, landslagsarkitekt á Teiknistofu Norðurlands.
Sviðstjóra falið að halda áfram vinnu við tillögurnar í samráði við garðyrkjustjóra og fulltrúa Árskóla.