Félags- og tómstundanefnd Svf. Skagafjarðar

Ivano Tasin kynnir stöðu Vinnuskólans í upphafi sumars. Metþátttaka er í skólann að þessu sinni, nú þegar hafa nærri 180 unglingar í 7.-10.bekkjum sótt um. Það jafngildir 70% allra unglinga í Skagafirði en 95% unglinga á Sauðárkróki í þessum árgöngum munu sækja Vinnuskólann í sumar. Fimmtán hafa sótt um vinnu í gegnum átakið V.I.T. fyrir 16-18 ára unglinga og fá þeir allir vinnu.

Lagt fram til kynningar bréf frá ÍSÍ en á síðasta ársþingi sambandsins eru sveitarfélög hvött til að draga ekki úr stuðningi til rekstur íþróttafélaga og niðurgreiðslum æfingagjalda til barna og unglinga.

Frístundastjóri kynnir niðurstöður lífsháttakönnunar sem lögð var fyrir unglinga 8.9.og 10.bekkja í síðasta mánuði, sú sjötta sem lögð er fyrir síðan 2005. Árangur er afar ánægjulegur og eru skagfirskir unglingar langt undir landsmeðaltali í reykingum, drykkju og notkun fíkniefna.

Lagt fram til kynningar niðurstaða verkefnisins "Allt hefur áhrif- einkum við sjálf" sem Sveitarfélagið Skagafjörður tók þátt í ásamt 24 öðrum sveitarfélögum í landinu.Samkvæmt niðurstöðum kannana sem gerðar voru á tímabilinu hefur náðst góður árangur hér í þeim þáttum sem lögð var áhersla á í verkefninu, þ.e. næringu og hreyfingu leik-og grunnskólabarna.

Félagsmálastjóri kynnir tillögur að reglum velferðarsjóðs íþróttahreyfingarinnar sem eru samin af formönnum UMSS og UMFT ásamt félagsmálastjóra. Áherslan er á að greiða niður ferðakostnað fyrir börn að 18 ára aldri á íþróttamót. Lögð er áhersla á að umsóknar- og afgreiðsluferlið sé einfalt, að umsækjendum sé sýnt traust til að meta þörf sína sjálfir og mið tekið af nýlegum neysluviðmiðum og reiknivél í skýrslu Velferðarráðuneytisins. Lögð er áhersla á að gæta trúnaðar um persónuupplýsingar.Um tímabundið verkefni er að ræða sem verður endurmetið í árslok. Félags- og tómstundanefnd stendur að því mati ásamt stjórnum UMSS/UMFT. Nefndin staðfestir reglurnar fyrir sitt leyti og vísar þeim til Byggðarráðs til kynningar.

Lagt er fram bréf áhugahóps um aðgengismál sem vísað var frá Byggðarráði. Farið yfir aðgengismál þeirra mannvirkja á Sauðárkróki sem undir nefndina heyra og gerðar eru athugasemdir við í skýrslu áhugahópsins ,sem eru: Íþróttahúsið og Sundlaugin á Sauðárkróki. Nefndin vísar þessum athugasemdum til Framkvæmdaráðs og felur starfsmönnum að gera nefndinni grein fyrir niðurstöðum. Nefndin óskar jafnframt eftir því að framkvæmdaráð sjái til þess að gerð verði sambærileg úttekt á öðrum mannvirkjum í eigu sveitarfélagsins utan Sauðárkróks.

Fundargerðin lögð fram til kynningar.

Lagt fram bréf Jöfnunarsjóðs sveitarfélaga varðandi eignirnar að Grundarstíg 22 og Fellstúni 19 ásamt minnisblaði félagsmálastjóra. Taka þarf afstöðu til erindis Jöfnunarsjóðs innan mánaðar frá móttöku þess. Málið er á forræði byggðarráðs/stjórnar eignasjóðs og er vísað þangað.

Lögð fram 3 erindi. Sjá trúnaðarbók.