Byggðarráð Svf. Skagafjarðar

Lagt fram fundarboð um aðalfund Eyvindarstaðaheiðar ehf., föstudaginn 7. júní 2013.
Byggðarráð samþykkir að Margeir Friðriksson sviðsstjóri stjórnsýslu- og fjármálasviðs fari með atkvæðisrétt sveitarfélagsins á fundinum.

Stjórn Náttúrustofu Norðurlands vestra hefur fært Sveitarfélaginu Skagafirði veglegt fuglahús að gjöf. Smíði hússins var kostuð af Náttúruverndarsjóði Pálma Jónssonar, stofnanda Hagkaups, Verkfræðistofunni Stoð, Tréiðnaðardeild Fjölbrautaskóla Norðurlands vestra og Menningarsjóði Kaupfélags Skagfirðinga, auk þess lagði NNV fé og vinnu í verkið.
Byggðarráð þakkar þeim sem að málinu komu fyrir þessa veglegu gjöf sem mun nýtast vel til að auka fjölbreytileika í afþreyingu fyrir íbúa og gesti í héraðinu.

Lagt fram bréf frá Hagsmunasamtölum heimilanna, þar sem skorað er á sveitarfélögin á landsvísu að að hefja sem fyrst
aðgerðir til að stemma stigu við heimilisleysi í sveitarfélaginu, sem rekja má til skorts á aðgæslu að réttindum neytenda við nauðungarsölur og aðrar fullnustugerðir.
Byggðarráð mun hér eftir sem hingað til styðja við þá íbúa sveitarfélagsins sem eiga i vök að verjast vegna félagslegra aðstæðna samkvæmt lögum um félagsþjónustu.

Lögð fram drög að texta varðandi sættir við óbyggðanefnd um Almenning á Skaga.
Byggðarráð samþykkir að unnið verði áfram að málinu samkvæmt fyrirliggjandi drögum.

Erindinu vísað til byggðarráðs frá 85. fundi umhverfis- og samgöngunefndar, þar sem svo hljóðandi bókun var gerð:
"Erindi frá Gunnari Steingrímssyni, yfirhafnaverði, vegna malbikunnar á geymslusvæði hafnarinnar lagt fram til kynningar.
Samþykkt að vísa til Byggðarráðs og fjárhagsáætlunnar fyrir árið 2014."
Byggðarráð samþykkir að taka erindið til skoðunar við gerð fjárhagsáætlunar 2014.

Stefán Vagn Stefánsson vék af fundi undir afgreiðslu þessa dagskrárliðar.
Samningi um umsjón Sauðárkróksvallar milli sveitarfélagsins og knattspyrnudeildar Umf. Tindastóls vísað til byggðarráðs frá 196. fundi félags- og tómstundanefndar.
Byggðarráð samþykkir fyrirliggjandi samning með fyrirvara um samþykki og undirritun aðalstjórnar Umf. Tindastóls. Gildistími samningsins er til 30. september 2013.

Þorsteinn Broddason gerir svohljóðandi bókun:
Samningur sá er hér um ræðir hefur ekki farið í formlega kynningu hjá þeim hagsmunaaðilum sem nýta íþróttavöllinn ásamt knattspyrnudeildinni. Það er lágmarks kurteisi við þá sem nýta mannvirki sveitarfélagsins að kynna fyrir þeim breytingar á umsjón þeirra. Völlurinn er í verulega slæmu ástandi og skýrsla Knattspyrnusambands Íslands (KSÍ) um ástandið og aðgerðir til að koma vellinum í nothæft ástand verða bæði kostnaðarsamar og tímafrekar. Það er því undarlegt að ekki sé gerður viðauki við þennan samning sem tekur á þeirri framkvæmd. Í meðförum byggðarráðs hefur samningnum verið breytt frá því sem samþykkt var í Félags- og tómstundanefnd sem væntanlega verður til kostnaðarauka fyrir málaflokkinn. Eðlilegt væri því að samningurinn færi aftur til umræðu í nefndinni áður en skrifað er undir hann.

Lagt fram erindi frá sýslumanninum á Sauðárkróki, þar sem óskað er umsagnar um umsókn Róberts Óttarssonar um endurnýjun á rekstrarleyfi fyrir Sauðárkróksbakarí, Aðalgötu 5, 550 Sauðárkróki. Kaffihús, veitingaleyfi - flokkur II.
Byggðarráð gerir ekki athugasemd við umsóknina.

Lagt fram erindi frá sýslumanninum á Sauðárkróki, þar sem óskað er umsagnar um umsókn Sigurpáls Aðalsteinssonar um endurnýjun á rekstrarleyfi fyrir Kaffi Krók, Aðalgötu 16, 550 Sauðárkróki. Veitingahús, veitingaleyfi - flokkur III.
Byggðarráð gerir ekki athugasemd við umsóknina.

Lögð fram samantekt veitu- og framkvæmdasviðs um ástand Mælifellsréttar og mögulegar leiðir til úrbóta.
Byggðarráð samþykkir tillögu veitu- og framkvæmdasviðs um úrbætur sem fyrirhugaðar eru á árinu 2013. Áætlaður kostnaður er 8.700.000 kr. og rúmast innan fjárfestingaliðs eignasjóðs í fjárhagsáætlun 2013.

Lagt fram bréf frá Sambandi íslenskra sveitarfélaga um nýsköpunarráðstefnu og nýsköpunarverðlaun í opinberri þjónustu og stjórnsýslu 2013. Óskað er eftir formlegum tilnefningum frá sveitarfélögunum og frestur til að leggja þær fram er til 1. nóvember 2013.

Lagt fram til kynningar bréf frá Öldu - félagi um sjálfbærni og lýðræði. Í bréfinu kalla Alda eftir því að sveitarfélög tryggi grasrótar- og félagasamtökum húsnæði. Í bréfinu segir einnig: "Alda telur óheppilegt að grasrótarfélög séu háð fjárframlagi tiltekinna félaga eða stjórnmálasamtaka og þurfi að reiða sig á slíkt. Betra sé að aðgengi að húsnæði sé tryggt á jafnræðisgrundvelli af hálfu hins opinbera. Nóg er til af húsnæði sem stendur alltaf autt eða einhvern hluta úr degi/viku/ári. Alda telur afar mikilvægt að finna lausn til að nýta það húsnæði betur en nú er gert í þágu félagsstarfs fullorðinna."

Lögð fram til kynningar fundargerð stjórnar SSNV frá 24. maí 2013.

Lagt fram til kynningar bréf frá Sambandi íslenskra sveitarfélaga þar sem fram koma leiðbeiningar til sveitarstjórna um viðauka við fjárhagsáætlun.

Lagðar fram til kynningar upplýsingar úr rekstri sveitarfélagsins og stofnana fyrir tímabilið janúar-apríl 2013.

Lögð fram til kynningar stjórnsýsluskoðunarskýrsla KPMG til sveitarstjóra vegna ársins 2012.

Lögð fram til kynningar fundargerð stjórnar Markaðsskrifstofu Norðurlands ehf. frá 18.apríl 2013.